សេដ្ឋកិច្ច

កម្ពុជា គ្រោងសាងសង់រោងចក្រចម្រាញ់ប្រេង ផ្គត់ផ្គង់ទីផ្សារ

បានផុស

៤ ខែ មុន

នៅ

ថ្ងៃព្រហស្បតិ៍ ៥ មីនា ២០២៦

ដោយ

កម្ពុជាគ្រោងសាងសង់រោងចក្រចម្រាញ់ប្រេងដែលនឹងអាចលេចចេញជារូបរាងនៅក្នុងរយៈពេល ៣ ឆ្នាំ ខាងមុខ ដើម្បីផ្គត់ផ្គង់ទីផ្សារក្នុងស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ រតនៈ រដ្ឋមន្ត្រីមន្ត្រីក្រសួងរ៉ែ និងថាមពល ប្រាប់សារព័ត៌មាននៅថ្ងៃពុធទី ០៤ ខែមីនា ឆ្នាំ ២០២៦ថា រាជរដ្ឋាភិបាលកំពុងពិភាក្សាជាមួយក្រុមហ៊ុនវិនិយោគមួយចំនួន ដើម្បីឈានទៅបង្កើតរោងចក្រចម្រាញ់ប្រេង។

លោក កែវ រតនៈ បញ្ជាក់ថា៖ «ដើម្បីសាងសង់រោងចក្រចម្រាញ់ប្រេងកាត ត្រូវតែមានមាត្រដ្ឋានសេដ្ឋកិច្ចមួយធំ ទីផ្សារធំ»។

លោករដ្ឋមន្ត្រីបន្ថែមថា ប៉ុន្មានឆ្នាំកន្លងមកសម្ដេចតេជោ ហ៊ុន សែន ក៏មានគម្រោងសាងសង់រោងចក្រប្រេងនេះដែរ ប៉ុន្តែទីផ្សារនៅកម្ពុជាមានមាត្រដ្ឋានតូច មិនទាន់អាចធ្វើបានទេ ខណៈការវិនិយោគនេះ ត្រូវការទីផ្សារធំ។

កន្លងមក រដ្ឋមន្ត្រីក្រសួងរ៉ែ និងថាមពល លោក កែវ រតនៈ បានលើកឡើងថា មានក្រុមហ៊ុនបរទេសចំនួន៤បានដាក់សំណើសុំអភិវឌ្ឍន៍ និងប្រតិបត្តិការរុករកប្រេងនៅទីតាំងប្លុកអេរបស់កម្ពុជា បន្ទាប់ពីក្រុមហ៊ុនបូមប្រេង Kris Energy ប្រកាសក្ស័យធន។

ដំណើរការបូមប្រេងឆៅក្នុងតំបន់ប្លុកអេ ត្រូវបានផ្អាកបណ្តោះអាសន្ន កាលពីពាក់កណ្តាលខែមិថុនា ឆ្នាំ២០២១ បន្ទាប់ពីក្រុមហ៊ុនស្តុក និងផ្ទេរប្រេងឆៅ MT Strovolos លួចដឹកប្រេងឆៅរបស់កម្ពុជាជាង៣០ម៉ឺនបារ៉ែល។

មូលហេតុនៃការលួចប្រេង បន្ទាប់ពីក្រុមហ៊ុនបូមប្រេង Kris Energy ប្រកាសក្ស័យធន និងមិនបានបង់ប្រាក់ឱ្យក្រុមហ៊ុន MT Strovolos ដែលជាអ្នកស្តុក និងផ្ទេរប្រេងឆៅ។

ក្រោយមក កម្ពុជាបានសហការជាមួយប្រទេសក្នុងតំបន់ និងប៉ូលីសអាំងទែប៉ូល ដើម្បីតាមចាប់នាវា ដឹកប្រេង របស់កម្ពុជា។ ជាលទ្ធផល កម្ពុជាទទួលបានប្រេងមកវិញក្នុងចំនួន២៩ ម៉ឺន៥ពាន់ បារ៉ែលដែល គិត ជាទឹកប្រាក់ប្រមាណ២០លានដុល្លារអាមេរិក៕

អត្ថបទ៖ ឡេង ដេត