សេដ្ឋកិច្ច

កម្ពុជាចាប់ដៃជាមួយ ADB ស្វែងរកលទ្ធភាពជួយអ្នកប្រកបរបរកង់បី ក្នុងពេលមានវិបត្តិប្រេង និងឧស្ម័ន

បានផុស

៣ ខែ មុន

នៅ

ថ្ងៃសៅរ៍ ៤ មេសា ២០២៦

ដោយ

កម្ពុជាសហការជាមួយធនាគារអភិវឌ្ឍន៍អាស៊ី (ADB) ស្វែងរកលទ្ធភាពក្នុងការជួយដល់អ្នកប្រកបរបររត់កង់បី ដោយធ្វើយ៉ាងណាឱ្យពួកគាត់ងាកមកប្រើថាមពលអគ្គិសនី ជំនួសឱ្យថាមពលប្រេង និងឧស្ម័នឥន្ធនៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ រតនៈ រដ្ឋមន្ត្រីក្រសួងរ៉ែ និងថាមពល នៅថ្ងៃទី ០៣ ខែមេសា ២០២៦ បានជួបពិភាក្សាការងារជាមួយលោកស្រី Yasmin Siddiqi នាយកប្រចាំប្រទេសរបស់ធនាគារអភិវឌ្ឍន៍អាស៊ី (ADB)។

កិច្ចប្រជុំពិភាក្សាបានវាយតម្លៃអំពីផលប៉ះពាល់ពីវិបត្តិនៅមជ្ឈិមបូព៌ា ប្រេង និងឧស្ម័នឥន្ធនៈ ចំពោះសេដ្ឋកិច្ចកម្ពុជា និងការឆ្លើយតបរបស់រាជរដ្ឋាភិបាលកម្ពុជា ដើម្បីចូលរួមជួយសម្រាលបន្ទុករបស់ប្រជាពលរដ្ឋ។

លោក កែវ រតនៈ ថ្លែងថា៖ «យើងខ្ញុំកំពុងរកលទ្ធភាព ដើម្បីជួយបងប្អូនរត់កង់បី ថាតើមុខរបរកង់បីថ្ងៃក្រោយ យើងអាចធ្វើម៉េច ដើម្បីឱ្យបងប្អូនយើងកុំពឹងពាក់ទៅលើតែប្រេង និងឧស្ម័នឥន្ធនៈ ហើយងាកត្រឡប់មករកលទ្ធភាពដោយប្រើប្រាស់ E-Tuk Tuk ហើយថាតើរដ្ឋាភិបាល និង ADB អាចមានចលនារួមគ្នាយ៉ាងម៉េច អាចជួយសម្រួលដល់បងប្អូនយើង»។

កិច្ចប្រជុំក៏បានពិនិត្យមើលបញ្ហាផលប៉ះពាល់សេដ្ឋកិច្ចកម្ពុជា ជារួមក្នុងវិបត្តិនេះ ហើយនិងតួនាទីរបស់ ADB ក្នុងការជួយគាំទ្រក្នុងដំណាក់កាលលំបាក។

ភាគីទាំងពីរក៏បានជជែកគ្នាអំពីអនាគត ពាក់ព័ន្ធជាមួយនឹងគម្រោង ADB ត្រៀមវិនិយោគក្នុងការជួយពង្រឹងនូវវិស័យថាមពលអគ្គិសនីរបស់កម្ពុជា ការវិនិយោគទៅលើខ្សែបញ្ជូន ដែលកំពុងសាងសង់ និងការភ្ជាប់រវាងកម្ពុជា និងប្រទេសជិតខាង ដើម្បីសម្រេចបាននូវគោលដៅអាស៊ានមួយដែលមានការតភ្ជាប់គ្នា ហើយអាស៊ានមួយដែលមានភាពបៃតង។

ក្រៅពីនេះ ភាគីទាំងពីរក៏បានពិភាក្សាអំពីការដែលអាចឈានទៅលទ្ធភាពដាក់ឱ្យគម្រោងដើរដោយធ្យូងថ្ម នៅខេត្តព្រះសីហនុ ១០០ ជាងមេហ្គាវ៉ាត់ ដែលយើងបានដំណើរការពីមុនហើយ ហើយអាចឱ្យវាឈប់ដំណើរការមុនឆ្នាំ ២០៤០ ដោយសារយើងអាចយកជំនួសដោយថាមពលស្អាត និងថាមពលកកើតឡើងវិញ ដោយមិនឱ្យប៉ះពាល់ដល់លំនឹងរបស់បណ្ដាញជាតិ ក៏ដូចជាថ្លៃរបស់ប្រទេស។