Connect with us

សេដ្ឋកិច្ច

ចិនពង្រីកការអភិវឌ្ឍពាណិជ្ជកម្ម​អេឡិចត្រូនិកផ្លូវសូត្រ​ នៅ​តំបន់​សេដ្ឋកិច្ចពិសេស​ក្រុងព្រះសីហនុ

បានផុស

នៅ

លោក CHEN Jiangang ប្រធានក្រុមប្រឹក្សាភិបាលតំបន់សេដ្ឋកិច្ចពិសេសក្រុងព្រះសីហនុបានមានប្រសាសន៍ថា ក្រុមហ៊ុនតំបន់សេដ្ឋកិច្ចពិសេស នឹងបន្តពង្រីកការអភិវឌ្ឍពាណិជ្ជកម្មអេឡិចត្រូនិកផ្លូវសូត្រ បន្ទាប់ពីមានសហគ្រាសបច្ចេកវិទ្យាប្រទេសចិនមកវិនិយោគនៅតំបន់សេដ្ឋកិច្ចពិសេសបន្ថែមទៀត។

នៅក្នុងកិច្ចប្រជុំស្តាប់របាយការណ៍ ស្តីពីស្ថានភាពអភិវឌ្ឍរបស់តំបន់សេដ្ឋកិច្ចពិសេសក្រុងព្រះសីហនុ កាលពីរសៀលថ្ងៃ​ទី ០២ សីហា ដោយមានការចូលរួមពីលោក គួច ចំរើន អភិបាលនៃគណៈអភិបាលខេត្តព្រះសីហនុ លោក CHEN Jiangang បានបន្តថា ការពង្រីកការអភិវឌ្ឍពាណិជ្ជកម្មអេឡិចត្រូនិចផ្លូវសូត្រនេះ ដោយសារខេត្តព្រះសីហនុមានហេដ្ឋារចនាសម្ព័ន្ធ និងសន្តិសុខសណ្តាប់ធ្នាប់សាធារណៈល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តទៀតថា តំបន់សេដ្ឋកិច្ចពិសេសដើរតួនាទីជាស្ពាន ពង្រឹងពង្រីកកិច្ចសហប្រតិបត្តិការរវាងខេត្តព្រះសីហនុ និងខេត្តជាំងស៊ូ មានវិស័យមួយចំនួនដូចជា សុខាភិបាល អប់រំ និងទេសចរណ៍ ពិសេសធ្វើជាស្ពានក្នុងការសម្របសម្រួល​​ក្នុងកិច្ចប្រជុំទំនាក់ទំនងរវាងខេត្តព្រះសីហនុ និងខេត្តជាំងស៊ី នៅខែកញ្ញាខាងមុខដែលជាខេត្តបានចុះ MOU រួចហើយកាន់តែស៊ីជំរៅ និងត្រៀមបើកជើងហោះហើពីក្រុងវ៉ូស៊ីត្រង់មកកាន់ខេត្តព្រះសីហនុឡើងវិញ បន្ទាប់ពីការខកខានដោយសារវិបត្តិកូវីដ-១៩។

ទោះបីកូវីដ១៩ ខេត្តជាំងស៊ូ និងខេត្តព្រះសីហនុនៅតែរក្សាទំនាក់ទំនងនឹងគ្នាយ៉ាងជិតស្និត និងរៀបចំប្រជុំតាមប្រព័ន្ធ​អនឡាញ​ក្នុងកិច្ចសហប្រតិបត្តិការរវាងខេត្ត នៃប្រទេសទាំងពីរ លើវិស័យពាណិជ្ជកម្ម និងសេដ្ឋកិច្ច។

ប្រធានក្រុមប្រឹក្សាភិបាលតំបន់សេដ្ឋកិច្ចពិសេសក្រុងព្រះសីហនុ បានបញ្ជាក់ថាទោះបីជួបនឹងវិបត្តិកូវីដក៏ដោយក៏តំបន់សេដ្ឋកិច្ចពិសេសនៅតែដំណើរការរបស់ខ្លួនបានល្អ។ ចាប់ពីឆ្នាំ២០២០ ដល់២០២២ ទំហំទឹកប្រាក់នៃការនាំចេញនាំចូលរបស់តំបន់សេដ្ឋកិច្ចពិសេសក្រុងព្រះសីហនុ មានការកើនឡើងជាង ២០ភាគរយ។ ចាប់ពីខែមករា ដល់ខែមិថុនា ឆ្នាំ​២០២២ ទំហំទឹកប្រាក់នៃការនាំចេញនាំចូលមានចំនួន ១.៤០០លានដុល្លាសហរដ្ឋអាមេរិក កើនឡើង៣៨ភាគរយ បើប្រៀបធៀបឆ្នាំ២០២១។

លោកប្រធានក្រុមប្រឹក្សាភិបាលបានបន្តថា «ឥឡូវតំបន់សេដ្ឋកិច្ចពិសេសមានគម្រោងធំមួយទៀត គឺបង្កើតរោងចក្រផលិត​​សំបកកង់រថយន្ត ប្រហែលនៅឆមាសទី១ ឆ្នាំ ២០២៣ ខាងមុខ រោងចក្រនឹងបើកដំណើរការសាកល្បង និងស្នើសុំការគាំទ្រពីឯកឧត្តមអភិបាលខេត្ត ព្រោះរោងចក្រត្រូវការបុគ្គលិកជាច្រើននាក់ផងដែរ»។

លោក គួច ចំរើន បានថ្លែងអំណរគុណតំបន់សេដ្ចកិច្ចពិសេសក្រុងព្រះសីហនុ ដែលបានរាយការណ៍ពីទំហំនៃការនាំចេញនាំចូលពិសេសរយៈពេល ៦ខៃដើមឆ្នាំ២០២២នេះ មានការកើនឡើងគួរឱ្យកត់សំគាល់ ជាសកម្មភាពមួយក្នុងការចូលរួមចំណែកជំរុញការអភិវឌ្ឍប្រកបដោយជោគជ័យ ដើម្បីកំណើនសេដ្ឋកិច្ចជាតិរបស់កម្ពុជា ពិសេសបានជួយដោះស្រាយការងារជូនយុវជនកម្ពុជា។

លោកអភិបាលខេត្តបានគាំទ្រគម្រោងបង្កើតរោងចក្រផលិតសំបកកង់រថយន្ត និងជួយផ្សព្វផ្សាយដល់យុវជនរបស់យើងចូលធ្វើការនៅរោងចក្រតាមតម្រូវការនៅពេលខាងមុខ។

ពាក់ព័ន្ធនឹងកិច្ចសហការជាមួយខេត្តជាំងស៊ូវិញលោកអភិបាលខេត្តបានបញ្ជាក់ថាតាមរយៈកាកបាទក្រហមខេត្តជាំងស៊ូ បានជួយគម្រោងជំនួយវិស្វកម្មកសាងសួនកុមារ បន្ទប់ទឹក និងការកែលម្អរ សោភ័ណភាពក្នុងបរិវេណសាលាបឋមសិក្សា អនុវិទ្យាល័យបិតត្រាំងមិត្តភាពជាំងស៊ូ ព្រះសីហនុ នៅឃុំបិតត្រាំង ស្រុកព្រៃនប់។

លោកអភិបាលខេត្តទទួលស្គាល់ថាតំបន់សេដ្ឋកិច្ចពិសេសដើរតួនាទីយ៉ាងសំខាន់ក្នុងការនាំចេញផលិតកម្មកសិកម្មរបស់កម្ពុជាទៅកាន់ប្រទេសចិន។ តំបន់សេដ្ឋកិច្ចពិសេសបានជួយសម្របសម្រួលជំរុញឱ្យខេត្តបងប្អូនបានដំណើរការល្អហើយ​​សង្ឃឹមថា កិច្ចប្រជុំនៅខែកញ្ញាខាងមុខទទួលបានការរីកចម្រើន ផ្តល់ឱកាសជួបពិភាក្សានូវសកម្មភាពជាច្រើន ហើយ កម្ពុជាបានបើកសេដ្ឋកិច្ចសង្គមឡើងវិញ បើកជើងហោះហើរ។ ដោយឡែកប្រទេសចិននៅមានរបាំងកូវីដ សង្ឃឹមថានៅពេលខាងមុខប្រទេសចិននឹងបើករបាំងកូវីដ បង្កើតជើងហោះហើរត្រង់មកកាន់ខេត្តព្រះសីហនុ៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម