កម្ពុជា កំពុងសិក្សាកែលើកកម្រិតផ្លូវដែក​សព្វថ្ងៃឱ្យទៅជាផ្លូវដែកល្បឿនលឿន

លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានលើកឡើងថា ក្រសួងកំពុងសិក្សាកែ​លើកកម្រិតផ្លូវដែកសព្វថ្ងៃ ឱ្យទៅជាផ្លូវដែកល្បឿនលឿន ដើម្បីសម្រួលដល់ការដឹកជញ្ជូនតាមផ្លូវដែក។

លោករដ្ឋមន្រ្តី បានគូសបញ្ជាក់ថា សព្វថ្ងៃនេះ ការដឹកជញ្ជូនតាមផ្លូវដែកកន្លែងខ្លះបើកបានល្បឿន ៣០គីឡូម៉ែត្រ កន្លែងខ្លះ ៥០គីឡូម៉ែត្រ និងកន្លែងខ្លះទៀតបាន ៩០គីឡូម៉ែត្រ ក្នុងមួយម៉ោង ដែលល្បឿនប៉ុណ្ណេះ លោក​រដ្ឋមន្រ្តីសង្កត់ធ្ងន់ថា យឺតណាស់។

បើតាមលោក ស៊ុន ចាន់ថុល កម្ពុជា ចង់លើកកម្រិតផ្លូវដែក ឱ្យរត់បានក្នុងល្បឿន ១៦០គីឡូម៉ែត្រ ក្នុងមួយម៉ោង ដូចទៅនឹងប្រទេសឡានដែរ។

សព្វថ្ងៃនេះ ក្រសួងសាធារណការកំពុងសិក្សាគម្រោងផ្លូវដែកពីប៉ោយប៉ែត មកភ្នំពេញ និងទៅក្រុងព្រះសីហនុ។ លើសពីនេះទៀត ក្រសួងក៏បានសិក្សាចប់សព្វគ្រប់ទៅលើគម្រោងផ្លូវដែកលើអាកាស និងប្រព័ន្ធរថភ្លើងក្រោមដី ដោយកំពុងធ្វើការកែកុនមួយចំនួន និងស្វែងរកដៃគូរដាក់ទុនវិនិយោគរថភ្លើងក្រោមដីនៅរាជធានីភ្នំពេញ ដើម្បីកាត់បន្ថយការកកស្ទះ។ នេះបើតាមការបញ្ជាក់របស់លោក ស៊ុន ចាន់ថុល នៅក្នុងសន្និសីទសារព័ត៌មានស្ដីពី «សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងសាធារណការ និងដឹកជញ្ជូន» នៅព្រឹកថ្ងៃទី ២៧ ខែ តុលា ឆ្នាំ ២០២២៕