លក្ខណៈមួយចំនួនដែល វៀតណាម ទាញអ្នកទេសចរ​ទៅកម្សាន្តតិចជាង ថៃ

នៅក្នុងតំបន់អាស៊ាន មិនមានប្រទេសណាអាចប្រជែងទេសចរបរទេស​បានច្រើនដូចជាថៃឡើយ សូម្បីតែវៀតណាម ។ កាលពីឆ្នាំ​ ២០២២ កន្លងទៅ​ វៀតណាម​ទទួលភ្ញៀវទេសចរបានត្រឹមតែជាង ៣.៦៦ លាននាក់ប៉ុណ្ណោះ ខណៈថៃវិញ​ទទួលបានច្រើនជាងវៀតណាមគុណនឹងបី ។

តាមរយៈទេសចរបរទេសដែលបានទៅលេងនៅថៃ ​និងវៀតណាម​បង្ហាញថា វៀតណាម គឺមានទេស​ភាពស្អាត​រួមជាមួយម្ហូបឆ្ងាញ់ ប៉ុន្តែចំពោះសេវាកម្សាន្ត​អារម្មណ៍ និងដឹកជញ្ជូនវិញមិនសូវជាសម្បូរបែបឡើយ ។

នៅវៀតណាម​ មធ្យោបាយធ្វើដំណើរមានតែតាមម៉ូតូ​ ឬ​រថយន្តក្រុង​សារធារណៈប៉ុណ្ណោះ​​ ខណៈខ្សែរថភ្លើងនៅក្នុងទីក្រុង មិនអាចតភ្ជាប់ទៅកាន់តំបន់ទេសចរណ៍​សំខាន់ៗមួយចំនួនបានឡើយ ។ ដូចនេះ នាំឲ្យមធ្យោបាយ​ធ្វើដំណើរសម្រាប់ទេសចរ​នៅមានកម្រិត ។

ដោយឡែក តំបន់សេវាកម្សាន្តពេលរាត្រីនៅវៀតណាម​ គឺនៅមានកម្សោយ​ជាងថៃ ។ នៅទីក្រុងហាណូយ ផ្លូវដើរនាពេលរាត្រី គឺបើកតែចុងសប្តាហ៍ប៉ុណ្ណោះ ហើយមិនមានសកម្មភាពកម្សាន្តច្រើនសម្រាប់ជនបរទេសនោះឡើយ ខណៈដែលបារ និងក្លឹបរាំនៅតាមដងផ្លូវសម្រាប់អ្នកទេសចរ ដូចជា វិថី Bui Vien នៅទីក្រុងហូជីមិញ ឬវិថី Ta Hien ក្នុងទីក្រុងហាណូយ ត្រូវបិទនៅត្រឹមម៉ោង ២ ​ទៀបភ្លឺ ។

លើសពីនេះ តំបន់អភិរក្ស​ក្នុង​ប្រទេស​វៀតណាម​នៅ​មាន​ការ​អភិវឌ្ឍ​តិចតួចនៅឡើយ​ ។ នៅប្រទេសថៃ ទេសចរអាចទៅឧទ្យានជាតិ ហើយងាយស្រួលមើលសត្វព្រៃដូចជា ខ្លា និងដំរី ខណៈនៅប្រទេសវៀតណាម សត្វខ្លាស្ទើរតែផុតពូជទៅហើយ ហើយដំរីព្រៃអាចមើលឃើញតែនៅកន្លែងមួយចំនួនប៉ុណ្ណោះដូចជា ឧទ្យាន Yok Don នៅខេត្ត Dak Lak ដែលជាតំបន់ខ្ពង់រាបកណ្តាល ។

គួរបញ្ជាក់ថា នោក្នុងឆ្នាំនេះ វៀតណាមរំពឹងទទួលបានទេសចរបរទេសចំនួនជាង ៨ លាននាក់ប៉ុណ្ណោះ​ ខណៈថៃវិញរំពឹងដល់ទៅ ៣០ លាននាក់ ពោលខុសគ្នា ២២ លាននាក់ឯណោះ ៕

ប្រែសម្រួល៖​ នាង​ រតនៈ

ប្រភព៖​ VN Express