ផលិតកម្មអំបិលកើនឡើងជាង ១៣ ម៉ឺនតោន ខណៈតម្លៃបានធ្លាក់ចុះ

សមាគមផលិតអំបិលកម្ពុជាបានអះអាងថា ទិន្នផលអំបិលនៅក្នុងឆ្នាំ ២០២៤ សម្រេចបានជាង ១៣ ម៉ឺនតោន មានការកើនឡើងជាងឆ្នាំមុន ដែលមានចំនួនតែជិត ៨ ម៉ឺនតោន ខណៈតម្លៃបានធ្លាក់ចុះបើធៀបនឹងឆ្នាំមុន។

លោក ប៊ុន ណារិន ប្រធាន​សមាគម​ផលិត​អំបិល​កម្ពុជា បានប្រាប់ឱ្យដឹងនៅថ្ងៃទី ២៥ ខែមិថុនានេះថា ខេត្តកំពត និងខេត្តកែបជាទីតាំងផលិតអំបិលនៅកម្ពុជា ក្នុងនោះខេត្ត​កំពត​ផលិតបាន ១០ ម៉ឺនតោន និងខេត្ត​កែបសម្រេច​បានចំនួនជាង ៣ ម៉ឺនតោន សរុបជាង ១៣ ម៉ឺនតោន​ពោលគឺ​លើស​​ឆ្នាំមុន​ដែល​មាន​ជិត ៨ ម៉ឺនតោន។

បើតាមលោក ប៊ុន ណារិន បច្ចុប្បន្ន ផលិតកម្មអំបិនៅខេត្តកំពត និងកែប ត្រូវបានផ្អាកហើយ បន្ទាប់​​​​ពីធ្លាក់​ភ្លៀងតាំងពីដំណាច់ខែឧសភា។

លោក ប៊ុន ណារិន បញ្ជាក់ថា ទោះបីទិន្នផលកើនពិតមែន ប៉ុន្តែតម្លៃអំបិល​បានធ្លាក់ចុះ​ខ្លាំង បើ​ធៀប​នឹងឆ្នាំមុន ដែលតម្លៃជាមធ្យមកាលពីឆ្នាំមុនអាចលក់បាន ១ ម៉ឺន ៥ ពាន់រៀល ក្នុងមួយបាវ ៥០ គីឡូក្រាម ខណៈបច្ចុប្បន្នតម្លៃបានធ្លាក់ចុះចាប់តាំងពីខែឧសភាមក ចន្លោះពី ៧ ពាន់រៀល ទៅ ១ ម៉ឺនរៀល ក្នុងមួយបាវ ៥០ គីឡូក្រាម។

យោងតាមរបាយការណ៍​របស់​​​ក្រសួង​ឧស្សាហកម្ម​ ​វិទ្យាសាស្ត្រ​ ​បច្ចេកវិទ្យា​ ​និង​ន​វា​នុ​វត្ត​ន៍​បង្ហាញ​ថា ​នៅក្នុងឆ្នាំ ២០២៣ កម្ពុជាផលិតអំបិលបានជាង ៨ ម៉ឺនតោន (៨​១​.​១​៥​៤​) កើន​ឡើង​ ​១​៤​៨​.​៩​ ​ភាគរយ​​ធៀប​នឹង​ចំនួន​ ​៣​២​.​៩​០​០​ ​តោន​ក្នុង​ឆ្នាំ​២​០​២​២​។

ផ្ទៃដីផលិតអំបិលនៅកម្ពុជាមានចំនួនជិត ៤ ពាន់ហិកតា (៣,៩៨៧.៣៥) ក្នុងនោះនៅ​ខេត្តកំពត ៣ ៤៨៩.៤៨ ហិកតា និងខេត្តកែប ៤៩៧.៨៧ ហិកតា។

យោងតាមរបាយការណ៍​របស់​​​ក្រសួង​ឧស្សាហកម្ម​ ក្នុង​មួយ​ឆ្នាំៗ​ កម្ពុជា​ត្រូវការ​អំបិល​ចន្លោះ​ពី​ ៧-១០​ ម៉ឺន​តោន ​ដើម្បី​បំពេញតម្រូវការ​​ក្នុងស្រុក​។ ក្រៅពី​ផល​អំបិល​ក្នុងស្រុក បណ្តា​ខេត្ត​នៅជាប់​ព្រំដែន​ថៃ និង​វៀតណាម ក៏​តែង​នាំចូល​អំបិល​មក​ដាក់លក់​ផងដែរ​៕

អត្ថបទ៖ ឡេង ដេត