ព័ត៌មានអន្ដរជាតិ

ឥណ្ឌូណេស៊ីរំពឹងវិនិយោគិនបរទេសចាប់ផ្ដើមគម្រោងនៅរដ្ឋធានីថ្មី ក្រោយប្រធានាធិបតីថ្មីចូលកាន់អំណាច

បានផុស

២ years មុន

នៅ

ថ្ងៃពុធ ៣១ កក្កដា ២០២៤

ដោយ

រដ្ឋមន្ត្រីក្រសួងវិនិយោគរបស់ឥណ្ឌណេស៊ី លោក Bahlil Lahadalia បានឱ្យដឹងថា វិនិយោគិនបរទេសទំនងនឹងចាប់ផ្តើមសាងសង់គម្រោងផ្សេងៗរបស់ពួកគេនៅទីក្រុង នូសានតារ៉ា ដែលជារដ្ឋធានីថ្មីរបស់ប្រទេស ក្រោយប្រធានាធិបតីថ្មីចូលកាន់អំណាចចាប់ពីខែតុលាទៅ។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Bahlil បានប្រាប់អ្នកយកព័ត៌មាននៅទីក្រុងហ្សាកាតា កាលពីថ្ងៃចន្ទថា៖ «ខ្ញុំគិតថា [វិនិយោគិនបរទេសសម្រាប់ក្រុងនូសានតារ៉ា] នឹងចាប់ផ្តើមការសាងសង់ចាប់ពីខែតុលាតទៅ»។

គួរគូសបញ្ជាក់ថា ប្រធានាធិបតីថ្មីរបស់ឥណ្ឌូណេស៊ី លោក Prabowo Subianto នឹងស្បថចូលកាន់ដំណែងចាប់ពីថ្ងៃទី ២០ ខែតុលា តទៅ ដោយស្នងពីលោកប្រធានាធិបតី ចូកូ វីដូដូ ដែលផ្ដួចផ្ដើមផ្លាស់ប្ដូររដ្ឋធានី ពីទីក្រុងហ្សាកាតា ទៅសង់ក្រុងថ្មីកណ្ដាលព្រៃ នូសានតារ៉ា ក្នុងខេត្តកាលីម៉ាន់តាន់ខាងកើត នៃកោះបរនេអូ ដោយត្រូវចំណាយប្រាក់ប្រមាណ ៣៣ ប៊ីលានដុល្លារ។ លោក វីដូដូ បានចាប់ផ្ដើមធ្វើការនៅទីក្រុងថ្មីដដែល កាលពីថ្ងៃចន្ទកន្លងទៅ ទោះបីការសាងសង់ធំៗមិនទាន់បញ្ចប់ហើយក៏ដោយ។

បើតាម Jakarta Globe រដ្ឋាភិបាលឥណ្ឌូណេស៊ីកំពុងសាងសង់ហេដ្ឋារចនាសម្ព័ន្ធសំខាន់ៗរបស់រដ្ឋធានីថ្មី ដោយគម្រោងមួយចំនួនបានដាក់ឱ្យដំណើរការរួចហើយ ទោះបីជាភាគច្រើនជារបស់វិនិយោគិនក្នុងស្រុកក៏ដោយ។ លោក Bahlil ក៏បានប្រាប់សារព័ត៌មានថា គម្រោងរបស់វិនិយោគិនបរទេស នឹងចាប់ផ្តើមសាងសង់នៅពេលដែលហេដ្ឋារចនាសម្ព័ន្ធសំខាន់ៗ ត្រូវបានដាក់មូលដ្ឋានត្រូវបានដាក់ឱ្យដំណើរការ។

រដ្ឋមន្រ្តីដដែលបានអះអាងថា វិនិយោគិនបរទេសដែលចាប់អារម្មណ៍វិនិយោគនៅក្រុងនូសានតារ៉ា មកពីអឺរ៉ុប អាស៊ី ក៏ដូចជាអាស៊ាន។ យ៉ាងណាមិញ លោកមិនបានបង្ហើបឱ្យលម្អិតថា វិនិយោគិនទាំងនោះមកពីប្រទេសណា ឬឈ្មោះរបស់ពួកគេនោះទេ។

គួរគូសបញ្ជាក់ថា កន្លងមកមានការរិះគន់ផ្សេងៗពាក់ព័ន្ធនឹងការកសាងទីក្រុងថ្មី រួមទាំងការបំផ្លិចបំផ្លាញជីវចម្រុះរបស់កោះបរនេអូ។ ដោយសារតែការសាងសង់យឺតយ៉ាវ ក៏ដូចជាសន្ទុះវិនិយោគខ្សោយ ទើបបណ្ដាលឱ្យមានការព្រួយបារម្ភថា វិនិយោគិនបរទេសតិចណាស់ដែលនឹងចាប់អារម្មណ៍លើការបោះទុនរបស់ខ្លួន ហើយសេដ្ឋកិច្ចនឹងនៅតែផ្ដុំក្នុងក្រុងហ្សាកាតា៕