ព័ត៌មានអន្ដរជាតិ

Hyundai គ្រោងបោះទុន ២៨ លានដុល្លារ ដើម្បីដាក់រោងចក្រដំឡើងរថយន្តអគ្គិសនីនៅថៃ

បានផុស

២ ខែ មុន

នៅ

ថ្ងៃពុធ ៧ សីហា ២០២៤

ដោយ

ក្រុមប្រឹក្សាវិនិយោគថៃ (BOI) បានឱ្យដឹងនៅថ្ងៃថ្ងៃពុធនេះថា ក្រុមហ៊ុនផលិតរថយន្តកូរ៉េខាងត្បូង Hyundai Motor Company នឹងវិនិយោគ ១ ប៊ីលានបាត (២៨ លានដុល្លារ) ដើម្បីដាក់រោងចក្រដំឡើងរថយន្តអគ្គិសនី និងអាគុយរថយន្តអគ្គិសនីនៅក្នុងប្រទេសថៃ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

BOI បាននិយាយនៅក្នុងសេចក្ដីថ្លែងការណ៍ថា Hyundai គ្រោងដាក់ទីតាំងរោងចក្រនៅភាគអាគ្នេយ៍នៃទីក្រុងបាងកក ដោយនឹងចាប់ផ្តើមផលិតកម្មនៅឆ្នាំ ២០២៦។

អគ្គលេខាធិការ BOI លោក Narit Therdsteerasukdi បាននិយាយថា៖ «ខ្សែសង្វាក់ផ្គត់ផ្គង់ដ៏រឹងមាំដែលមានស្រាប់របស់ថៃ នឹងអនុញ្ញាតឱ្យ Hyundai ទទួលបានប្រភពមិនតិចជាង១/៣នៃវត្ថុធាតុដើម និងគ្រឿងបន្លាស់ ដែលក្រុមហ៊ុនត្រូវការពីក្នុងប្រទេសថៃ ដូច្នេះវាជួយដល់ឧស្សាហកម្មក្នុងស្រុក»។

គួរបញ្ជាក់ថា វិស័យរថយន្តអគ្គិសនីរបស់ថៃ ដែលកំពុងរីកចម្រើននាពេលបច្ចុប្បន្ន ត្រូវបានគ្របដណ្តប់ដោយក្រុមហ៊ុនផលិតរថយន្តចិន រួមទាំងក្រុមហ៊ុន BYD និង Great Wall Motors ដែលប្រើប្រាស់ប្រទេសនេះជាមូលដ្ឋានផលិតកម្ម សម្រាប់ការនាំចេញរថយន្តរបស់ខ្លួននៅទូទាំងអាស៊ីអាគ្នេយ៍។

ការបោះទុនរបស់Hyundai នៅថៃនាពេលនេះ ធ្វើឡើងចំពេលដែលការលក់រថយន្តអគ្គិសនី កំពុងកើនឡើងនៅទូទាំងតំបន់អាស៊ីអាគ្នេយ៍ ដែលវាយលុកទីផ្សារដោយរក្រុមហ៊ុន BYD ដែលបង្កើនការប្រកួតប្រជែងយ៉ាងសស្រាក់សស្រាំចំពោះក្រុមហ៊ុនអន្តរជាតិជើងចាស់ប្រចាំតំបន់ផ្សេងៗទៀត។ យោងតាមក្រុមហ៊ុនស្រាវជ្រាវ Counterpoint Research ប្រទេសថៃ ដែលជាមជ្ឈមណ្ឌលផលិតរថយន្តដ៏ធំបំផុតក្នុងតំបន់ រួមចំណែក ៥៥ ភាគរយ នៃការលក់រថយន្តអគ្គិសនី នៅអាស៊ីអាគ្នេយ៍ទាំងមូលក្នុងត្រីមាសទី១ ឆ្នាំនេះ៕