មន្រ្តី៖ តំបន់អភិវឌ្ឍត្រីកោណ CLV ធ្វើឡើងក្នុង​គោលដៅពន្លឿនការអភិវឌ្ឍសេដ្ឋកិច្ច

លោកស្រី ចម និម្មល រដ្ឋមន្ត្រីក្រសួងពាណិជ្ជកម្មបានអះអាងថា កិច្ចសហប្រតិបត្តិការ​តំបន់ត្រី​កោណអភិវឌ្ឍ កម្ពុជា-ឡាវ-វៀតណាម (CLV-DTA) គឺជាបុព្វហេតុ ធ្វើឱ្យ​តំបន់ដែល​ដាច់ស្រ​យាល និងតំបន់ដែលអភិវឌ្ឍយឺត ទៅជាតំបន់ដែលអភិវឌ្ឍទាន់ពេលវេលា និងទាញ​យកនូវសក្ដា​នុ​ពល​របស់ខ្លួន ដោយការតភ្ជាប់សេដ្ឋកិច្ច។

ថ្លែងនៅក្នុងបទសម្ភាសន៍ជាមួយទូរទស្សន៍ជាតិកម្ពុជា​ លោកស្រី ចម និម្មលថា កិច្ចប្រ​ជុំតំបន់ត្រី​កោណអភិវឌ្ឍ កម្ពុជា-ឡាវ-វៀតណាមបានរៀប​ចំធ្វើឡើងចំនួន ១១ លើកមកហើយចាប់តាំងពីឆ្នាំ ១៩៩៩ ក្នុងនោះ គឺជាការ​តភ្ជាប់សេដ្ឋកិច្ច និង​បង្កើនពាណិជ្ជកម្ម និងកសិ​ពាណិជ្ជ​​​​​​កម្ម​​​របស់ត្រីភាគី។ ហើយថា ផលិតផលក្នុងស្រុកសរុបក្នុងខេត្តទាំង ៤ (ក្រចេះ ស្ទឹងត្រែង រតនគិរី មណ្ឌលគិរី) របស់កម្ពុជា មានកំ​ណើន​នាំឱ្យមាន​តុល្យភាព នៃការអភិវឌ្ឍ។

ចំណូលជាមធ្យមសម្រាប់មនុស្សម្នាក់ៗ (GDP) នៅក្នុងខេត្តទាំង ៤ ស្ថិតនៅក្នុងចន្លោះ ១៦៣០ ដុល្លារ នៅឆ្នាំ ២០២២ គឺជាមធ្យមភាគប្រហាក់ប្រហែលជាមួយប្រជាពលរដ្ឋនៅក្នុង ខេត្ត​ផ្សេងៗទៀតនៅកម្ពុជា។

លោកស្រី ចម និម្មល មានប្រសាសន៍ថា៖ «ពីមុនជាតំបន់ដាច់ស្រយាល មិនមានការអភិវឌ្ឍ ឥឡូវ មានការតភ្ជាប់ ទើបធ្វើឱ្យកំណើនប្រជាជន និងផលិតផលនៃអាជីវកម្ម​ក៏កើនឡើង​ដូច​គ្នា»។

លោកស្រីបានចោទសួរថា៖«​ ចុះបើយើងដកខ្លួនមិនអភិវឌ្ឍ ទុកឱ្យនរណាអភិវឌ្ឍជំនួសយើងវិញនោះ កម្ពុជាមានឯករាជ្យរបស់ខ្លួន បូរណភាព និងម្ចាស់ការក្នុងការអភិវឌ្ឍដែនដីរបស់ខ្លួន ក្នុងនោះយើងបានចាយកញ្ចប់ថវិកាអភិវឌ្ឍភូមិ ឃុំ»។

បើតាមលោកស្រីរដ្ឋមន្ត្រី កិច្ចសហប្រតិបត្តិការ​តំបន់ត្រី​កោណអភិវឌ្ឍ កម្ពុជា-ឡាវ-វៀតណាម គឺជាការបន្ថែមអត្ថប្រយោជន៍ និងទាញប្រសិទ្ធភាពនៃការតភ្ជាប់គ្នា។

លោកស្រីបន្ថែមថា៖ «កាលដែលយើងចូលក្នុងកិច្ចសហប្រតិបត្តិការនៅក្នុង​តំបន់ត្រី​កោណទិសដៅគឺមានន័យថា ជាភាពប្រទាក់ក្រឡានៃការកសាងនូវគម្រោង ឥឡូវយើងស្រមៃថា ប្រជាពលរដ្ឋលោកតាំងលំនៅឋាននៅកន្លែងមួយនៅខាងយើង ហើយនៅផ្នែកប្រទេសភាគីទាំងសងខាង ហើយបើយើងមានបំណងថា ធ្វើផ្លូវដើម្បីតភ្ជាប់ឱ្យប្រជាពលរដ្ឋដោះដូរទំនិញ ឬឆ្លងកាត់ទៅព្យាបាល ឬសេវាផ្សេងៗ យើងធ្វើផ្លូវតែខាងយើង ពីព្រោះយើងអត់បានទៅចែកជាមួយអ្នកជិតខាងទេ ហើយអ្នកជិតខាងក៏គេធ្វើផ្លូវតែគេ»។

យោងតាម​ទិន្នន័យ​របស់​អគ្គនាយកដ្ឋានគយ និងរដ្ឋាករកម្ពុជា ​(GDCE) នៅក្នុងឆមាសទី០១ ឆ្នាំ ២០២៤ ​ការនាំចេញទំនិញរបស់កម្ពុជាទៅកាន់ទីផ្សារ​ប្រទេស​វៀត​​ណាម​សម្រេច​​បានទឹកប្រាក់ជាង ២,០២ ពាន់លានដុល្លារ មានការកើនឡើង ៤១,៨ ភាគរយ ដែលមានទឹកប្រាក់ ១,៤២ ពាន់លាន​ដុល្លារ ធៀបនឹងរយៈ​ពេល​ដូចគ្នានៅឆ្នាំ ២០២៣។

ក្នុងនោះការនាំចូលរបស់វៀតណាមមកកម្ពុជា​ក៏មានទំហំទឹកប្រាក់ប្រដំប្រសង​​​គ្នា​​ប្រមាណ ២,០២ ពាន់លានដុល្លារ មានកំណើនជិត ៨ ភាគរយ៕

អត្ថបទ៖ ឡេង ដេត