ក្រោយដកខ្លួនពី CLV សម្តេចធិបតី បញ្ជាក់ជាថ្មីនឹងជំរុញការអភិវឌ្ឍទៅខេត្តជាប់ព្រំដែន

ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត​ បញ្ជាក់ជាថ្មីថា ទោះបីជាកម្ពុជាបានដកខ្លួនចេញពីកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា ឡាវ និងវៀតណាម (CLV) ក៏ដោយ ប៉ុន្តែរដ្ឋបានដាក់ចេញនូវយុទ្ធសាស្រ្តអភិវឌ្ឍនៅតាមព្រំដែនតាមរយៈការកសាងហេដ្ឋារចនាសម្ព័ន្ធ ដើម្បីរុញប្រជាពលរដ្ឋទៅរស់នៅទីនោះ ដែលជាខឿនការព្រំដែនដ៏រឹងមាំ ជាជាងធ្វើរបងការពារ។

អញ្ជើញជាអធិបតីដ៏ខ្ពង់ខ្ពស់សម្ពោធអគារសិក្សា និងសមិទ្ធផលនានា នៅខេត្តរតនគិរី នៅព្រឹកថ្ងៃទី ៧ ខែមិថុនានេះ សម្តេចធិបតី ហ៊ុន ម៉ាណែត បានថ្លែងថា ក្រោយពីកម្ពុជាដកខ្លួនចេញពី CLV រដ្ឋបានជំរុញការអភិវឌ្ឍន៍ប្រទេសរបស់យើងទៅតាមព្រំដែន ដើម្បីលើកកម្ពស់ជីវភាពពលរដ្ឋមូលដ្ឋាន និងបង្កើនទំនាក់ទំនងល្អជាមួយប្រទេសជិតខាង។ សម្តេចថ្លែងថា៖« ពិតណាស់ទំនាក់ទំនងទ្វេភាគី ត្រីភាគីជាមួយប្រទេសជិតខាងយើងមិនចោលទេ គ្មានអ្នកណាបិទរបងទេ។ អ្នកចង់ឱ្យយើងធ្វើរបង ចាំបាច់ទៅធ្វើរបងធ្វើស្អី​ របងនៅលើពិភពលោកប្រទេសមួយធ្វើ ប៉ុន្តែបិទមនុស្សមិនជាប់ទេ ។ តែផ្ទុយទៅវិញគឺការអភិវឌ្ឍនៅតាមព្រំដែន អភិវឌ្ឍខេត្តព្រំដែនគឺជាយុទ្ធសាស្រ្តដែលល្អបំផុត នៅក្នុងការការពារបូរណភាពទឹកដី រយៈពេលវែង គឺយើងយកប្រជាពលរដ្ឋ យកការអភិវឌ្ឍនៅទីនោះ គឺជាអ្នកចាំដីឱ្យយើង ជាជាងដាក់ទ័ពចាំដី»។

បើតាមសម្តេចធិបតី៖«យើងគ្មានទ័ពទៅពង្រាយនៅតាមព្រំដែននរាប់ពាន់គីឡូទេ អញ្ចឹងមានតែការអភិវឌ្ឍន៍នៅតាមព្រំដែន រុញប្រជាពលរដ្ឋទៅរស់នៅ បើកច្រកសេដ្ឋកិច្ច ដើម្បីឱ្យមនុស្សទៅរស់នៅ ហើយទំនាក់ទំនងជាមួយប្រទេសជិតខាង និងគោរពគ្នាទៅវិញទៅមកជាមួយប្រជាជនប្រទេសជិតខាង នេះគឺជាគោលនយោបាយក្នុងការអភិវឌ្ឍ និងការពារទឹកដីរបស់យើងនៅតាមបណ្តោយព្រំដែន»។

គួរជម្រាបថា បន្ទាប់ពីកម្ពុជាបានដកខ្លួនពីកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា ឡាវ និងវៀតណាម រដ្ឋបានបង្កើតមូលនិធិកសាងហេដ្ឋារចនាសម្ព័ន្ធតាមក្រវាត់ព្រំដែន ដោយទទួលបានថវិកាពីសប្បុរសជនប្រមាណ ២៧ លានដុល្លារ។

បច្ចុប្បន្ននេះ កងឯកភាពស្ថាបនាថ្នល់-ស្ពាន របស់បញ្ជាការដ្ឋានវិស្វកម្ម កំពុងមមាញឹកលើការស្ថាបនាផ្លូវក្រវាត់ព្រំដែន ថ្វីត្បិតមានភ្លៀងធ្លាក់ជោគជាំនារដូវវស្សា ដែលបង្កជាផលរំខានខ្លះៗ ជាពិសេសនៅតាមការដ្ឋានសំណង់មុខទឹក ដែលតែងតែជួបបញ្ហាជំនន់ទឹកភ្លៀង ក៏ដូចជាផលលំបាកក្នុងការដឹកជញ្ជូន ដែលត្រូវឆ្លងកាត់ទឹកហូរ កាត់ព្រៃ និងជ្រលងភ្នំជាដើម ៕