រដ្ឋមន្ត្រីកសិកម្មជំរុញការវិនិយោគវិស័យស្រូវអង្ករ និងម្រេច ទៅប្រទេសហ្វីលីពីន

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជំរុញការវិនិ​យោគ​លើវិស័យ​​ស្រូវអង្ករ និងម្រេចទៅប្រទេសហ្វីលីពីន។

លោក ឌិត ទីណា បានលើកឡើងក្នុងជំនួបជាមួយលោស្រី Flerida Ann P.Mayo ឯកអគ្គរដ្ឋ​ទូតហ្វីលីពីន​ប្រចាំ​កម្ពុជានៅថ្ងៃទី ០៣ ខែកញ្ញា ឆ្នាំ ២០២៤។

រដ្ឋមន្ត្រីក្រសួងកសិកម្មបានស្វាគមន៍ឯកអគ្គរដ្ឋទូតថ្មីក្នុងការមកបន្តពង្រឹងកិច្ច​សហប្រតិបត្តិការរវាង​ប្រទេសទាំងពីរ និងជំរុញការវិនិយោគលើវិស័យស្រូវអង្ករ និងម្រេចទៅប្រទេសហ្វីលីពីន។

លោក ឌិត ទីណា ក៏បានណែនាំឱ្យភាគីហ្វីលីពីន​សហការធ្វើការជាមួយ​សហព័ន្ធស្រូវ​អង្ករ​កម្ពុជា ដែលមានបទពិសោធក្នុងការវេចខ្ចប់ និងមានបច្ចេកទេសក្នុងការនាំចេញស្រូវអង្ករ​ទៅ​ក្រៅប្រទេស ព្រមទាំងសិក្សាពីនីតិវិធីអនាម័យ ភូតគាមអនាម័យ និងច្បាប់រវាងប្រទេសទាំងពីរ​ឱ្យបានច្បាស់លាស់ និងស៊ីជម្រៅ។

លោកស្រី Flerida Ann P.Mayo ក៏បានលើកឡើងពីសំណើ​បន្តពង្រឹង​អនុស្សារណៈយោគយល់ (MoU) រវាងប្រទេសហ្វីលីពីន និងប្រទេសកម្ពុជា ព្រមទាំងបង្កើនកិច្ច​សហប្រតិបត្តិវិនិយោគលើវិស័យកសិកម្ម និងកសិពាណិជ្ជកម្មនៅកម្ពុជាផងដែរ។

ជាការឆ្លើយតប លោករដ្ឋមន្ត្រីក្រសួងកសិកម្ម​បានគូសបញ្ជាក់ចំពោះសំណើ​បន្តពង្រឹង​អនុស្សា​រណៈ​​យោគយល់ (MoU) ដោយត្រូវផ្តោតលើអ្វីដែលប្រទេសទាំង​ពីរអាចធ្វើបាន​ជាមួយ​គ្នា ជាពិ​សេសជំរុញការធ្វើកសិពាណិជ្ជកម្មឱ្យចេញជារូបរាងពិតប្រាកដ ដែលមាន​ភាព​បុរេសកម្ម និងមាន​ប្រសិទ្ធភាព។

លោករដ្ឋមន្ត្រី បានបន្ថែមថា កម្ពុជាស្វាគមន៍វិស័យឯកជន ដែលមានបំណងវិនិយោគលើវិស័យ​ស្រូវអង្ករ ហើយកម្ពុជាមានកសិផលដែលមានគុណភាពល្អប្រណិត សម្រាប់ផ្គត់ផ្គង់ដល់​ការនាំ​ចេញផងដែរ៕