ព័ត៌មានអន្ដរជាតិ

វៀតណាមកំណត់គោលដៅឱ្យមានរោងចក្រផលិតបន្ទះឈីប ត្រឹមឆ្នាំ ២០៣០

បានផុស

២ years មុន

នៅ

ថ្ងៃអង្គារ ២៤ កញ្ញា ២០២៤

ដោយ

វៀតណាមបានកំណត់គោលដៅឱ្យមានរោងចក្រផលិតបន្ទះឈីបខ្នាតតូចមួយ និងរោងចក្រដំឡើងការវេចខ្ចប់ និងសាកល្បងបន្ទះឈីប (APT) ចំនួន ១០ នៅត្រឹមឆ្នាំ ២០៣០ ខណៈដែលប្រទេសអាស៊ីអាគ្នេយ៍មួយនេះព្យាយាមបញ្ជ្រៀតខ្លួនចូលឱ្យជ្រៅទៅក្នុងខ្សែសង្វាក់ផ្គត់ផ្គង់ពិភពលោក។ នេះបើតាមការចុះផ្សាយរបស់កាសែត The Investor កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ វៀតណាមក៏មានគោលបំណងផលិតបន្ទះឈីបឯកទេសជាច្រើនសម្រាប់វិស័យមួយចំនួនផងដែរ។ នេះបើយោងទៅតាមយុទ្ធសាស្ត្រអភិវឌ្ឍន៍គ្រឿងអេឡិចត្រូនិករបស់ប្រទេសរហូតដល់ឆ្នាំ ២០៣០ ជាមួយនឹងចក្ខុវិស័យសម្រាប់ឆ្នាំ ២០៥០ ដែលចុះហត្ថលេខាដោយនាយករដ្ឋមន្ត្រីវៀតណាម កាលពីថ្ងៃសៅរ៍។

គួរគូសបញ្ជាក់ថា បច្ចុប្បន្ន វៀតណាមមិនទាន់មានរោងចក្រផលិតបន្ទះឈីបនៅឡើយទេ។ យ៉ាងណាមិញ ក្រុមហ៊៊ុនផលិតបន្ទះឈីបយក្សជាច្រើន ដូចជា ក្រុមហ៊ុន Intel ក្រុមហ៊ុន Amkor Technology និងក្រុមហ៊ុន Hana Micron បានដាក់ប្រតិបត្តិការរោងចក្ររដំឡើងការវេចខ្ចប់ និងសាកល្បងបន្ទះឈីបរបស់ខ្លួននៅក្នុងប្រទេសនេះ។

មួយនៅក្នុងគោលដៅសំខាន់ វៀតណាមមានបំណងចង់ទាក់ទាញក្រុមហ៊ុនរចនាបន្ទះឈីប យ៉ាងហោចណាស់ ឱ្យបាន ១០០ ក្រុមហ៊ុន នៅត្រឹមឆ្នាំ ២០៣០ ខណៈរំពឹងថា ប្រាក់ចំណូលប្រចាំឆ្នាំពីឧស្សាហកម្មបន្ទះឈីប នឹងកើនដល់ ២៥ ប៊ីលានដុល្លារនៅឆ្នាំ ២០៣០ ហើយចំណូលពីឧស្សាហកម្មអេឡិចត្រូនិក រំពឹងថានឹងកើនដល់ ២២៥ ប៊ីលានដុល្លារ នៅ រយៈពេលដូចគ្នា។

បើតាមកាសែត The Investor យុទ្ធសាស្ត្ររបស់វៀតណាម គឺធ្វើយ៉ាងណាឱ្យប្រទេសមានប្រព័ន្ធអេកូឡូស៊ីបន្ទះឈីប ដែលអាចផ្គត់ផ្គង់សម្រាប់ប្រទេសខ្លួនឯងគ្រប់គ្រាន់ និងនាំមុខក្នុងផ្នែកមួយចំនួននៃសង្វាក់ផ្គត់ផ្គង់បន្ទះឈីប៕