ពលរដ្ឋឃុំត្រពាំងរូង រកចំណូលបាន ១០ ទៅ ២០ ម៉ឺនរៀល ប្រចាំថ្ងៃ ពីការលក់នំស្លឹកចាក

នំ​ស្លឹក​ចាក នៅ​ឃុំ​ត្រពាំងរូង ស្រុក​កោះកុង ខេត្ត​កោះកុង ជា​ផលិតផល​សម្គាល់​អត្តសញ្ញាណ​មួយ​ពី​ជីវភាព​រស់នៅ​របស់​ប្រជាពលរដ្ឋ​ដែល​បន្សល់ទុក​ពី​ដូនតា​ពួកគាត់។

អ្នកស្រី រឹម ដានី បាន​រៀបរាប់​ទាំង​ក្តី​រាក់ទាក់ កាលពី​រសៀល​ថ្ងៃទី ២២ ខែ​កុម្ភៈ ឆ្នាំ ២០២៥ ថា ក្នុង ១ ថ្ងៃ រកចំណូល​បាន​ពី ១០ ទៅ ២០ ម៉ឺន​រៀល ប្រចាំថ្ងៃ។ ដោយឡែក​បុណ្យទាន​តូច-ធំ អាច​រក​បាន​ដល់ ៣០ ម៉ឺន​រៀល។

តំណាង​ពលរដ្ឋ​ដដែល បន្ត​ថា ស្រប​ពេល​ផ្លូវជាតិ​លេខ​ ៤៨ ជិត​ស្ថាបនា​រួចរាល់ មាន​អ្នកដំណើរ​ចេញ​ចូល​ទិញ​ច្រើន​ ការលក់​ក៏​ដាច់​ទៅ​តាម​នោះ​ដែរ។ នំ​ស្លឹក​ចាក ១ ថង់​ តម្លៃ​ ១០.០០០ រៀល។ នំ​ស្លឹក​ចាក ផ្សំ​ឡើង​អង្ករដំណើប​ត្រាំ ហើយ​កិន​ជា​ម្សៅ ​រួច​លាយ​ជាមួយ ស្ករត្នោត ដូង ល្ង ស្ករស និង​អំបិល​បន្តិច និង​វេច​ខ្ចប់​ដោយ​ស្លឹក​ចាក​មុន​នឹង​យក​ទៅ​អាំង។ អ្នក​ដែល​ធ្លាប់​បរិភោគ​នំ​ប្រភេទ​នេះ​សរសើរ​ថា ឆ្ងាញ់ និង​មាន​ក្លិន​ឈ្ងុយ។

បច្ចុប្បន្ន ប្រជាពលរដ្ឋ​ឃុំ​ត្រពាំងរូង ប្រមាណ ១០ គ្រួសារ​ប៉ុណ្ណោះ ដែល​ចាប់​មុខរបរ​ធ្វើ​នំ​ស្លឹក​ចាក​លក់ ក្រៅ​ធ្វើស្រែ​ចម្ការ នេសាទ និង​អាជីវកម្ម​បន្តិចបន្តួច៕

អត្ថបទ ៖ សិរីវឌ្ឍនៈ