កសិករដាំទុរេន គាំទ្រ​ចំណាត់ការហាមឃាត់នាំចូលទុរេនស្រស់ពីបរទេស

កសិករដាំទុរេនក្នុងស្រុកស្ទឹងត្រង់ ខេត្តកំពង់ចាម បានបង្ហាញការគាំទ្រ និងពេញចិត្តចំពោះការហាមឃាត់ការនាំចូលទុរេនស្រស់ពីប្រទេសជិតខាង ព្រោះពួកគាត់យល់ថា ទុរេនបែកអន្លូងដាំតាមធម្មជាតិ មានរសជាតិឈ្ងុយឆ្ងាញ់ មិនប៉ះពាល់ដល់សុខភាព ម្យ៉ាងបើគ្មានការនាំចូលទុរេនបែកអន្លូងនឹងកាន់តែល្បីសុសសាយ ហើយមានទីផ្សារល្អ។

កន្លងទៅថ្មីៗនេះ អគ្គនាយកដ្ឋានគយ និងរដ្ឋាករកម្ពុជា បានចេញសេចក្តីណែនាំស្តីពីការហាមឃាត់ការនាំចូលផ្លែទុរេនស្រស់ពីប្រទេសជិតខាងមាន វៀតណាម និងថៃ ក្រោយពេលពិនិត្យឃើញមានផ្ទុកសារធាតុគីមីប៉ះពាល់ដល់សុខភាព (Bacsic Yallow2 )។

ជុំវិញវិធានការនេះ អ្នកដាំទុរេនបែកអន្លូង ស្រុកស្ទឹងត្រង់ បានសម្តែងការគាំទ្រយ៉ាងពេញទំហឹង។ ក្នុងនោះដែរ ម្ចាស់ចំការទុរេនក្នុងឃុំអារក្សត្នោត ស្រុកស្ទឹងត្រង់ បានលើកឡើងថា ការដាំទុរេននេះគឺរាប់សិបឆ្នាំមកហើយ ពេញចិត្តណាស់ បើរាជរដ្ឋាភិបាលហាមឃាត់ ឬធ្វើការរិតបន្តឹងការនាំចូលទុរេនពីប្រទេសជិតខាង ព្រោះទី១ ពួកគាត់ចង់ឲ្យទេសចរមកពីតាមបណ្តាខេត្ត និងភ្ញៀវអន្តរជាតិ មកលេងខេត្តកំពង់ចាម បានទទួលទានទុរេនធម្មជាតិរបស់ស្រុកយេីងពិតៗ ដែលមានឱជារសឈ្ងុយឆ្ងាញ់ មិនប៉ះពាល់ដល់សុខភាព។ ទី២. កេរ្តិ៍ឈ្មោះទុរេនបែកអន្លូង ខេត្តកំពង់ចាម នឹងកាន់តែផ្សព្វផ្សាយឲ្យបានល្បីរន្ទឺកាន់តែខ្លាំង ហើយតម្លៃទីផ្សារក៏បានខ្ពស់សមរម្យផងដែរ។

កាលពីថ្មីៗនេះ លោក ឃីម ហ្វីណង់ អនុរដ្ឋលេខាធិការក្រសួងកសិកម្ម រុក្ខប្រមាញ់ និងនេសាទ ក៏បានចុះមកពន្យល់ណែនាំដល់ប្រជាកសិករដាំទុរេននៅស្រុកស្ទឹងត្រង់នេះពីផលប្រយោជន៍ពេលចូលរួមជាមួយសហគមន៍កសិកម្មទំនើប ខណៈ​សហគមន៍កសិកម្មទំនើប មានទីផ្សារដើមទុន និងបច្ចេកទេសច្បាស់លាស់ ដូច្នោះទាមទារឲ្យម្ចាស់ចំការទុរេនធានាឲ្យបាននូវគុណភាពស្តង់ដា សុវត្ថិភាព និងអាចបំពេញតម្រូវការទីផ្សារបាន៕

អត្ថបទ៖​ឡេក​ ចាន់ពេជ្រ