ព័ត៌មានជាតិ

កសិករចាំបាច់ចងក្រងគ្នាជាសហគមន៍ ទើបមានប្រសិទ្ធភាពក្នុងការគាំទ្រពីរដ្ឋ ទៅលើទុន និងទីផ្សារ

បានផុស

៤៦ វិនាទី មុន

នៅ

ថ្ងៃចន្ទ ២ មិថុនា ២០២៥

ដោយ

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ការផ្លាស់ប្តូរមុខដំណាំឱ្យបានជោគជ័យពិតជាពិបាក ជាពិសេសប្រសិនបើធ្វើវាតែម្នាក់ឯង ក្រសួងត្រៀមខ្លួនជួយលើការងារនេះ មិនថាជាទុន បច្ចេកទេស ឬទីផ្សារនោះទេ តែចាំបាច់ត្រូវចងក្រងគ្នាជាទម្រង់សហគមន៍ ទើបការជួយគាំទ្រនេះមានប្រសិទ្ធភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងឱកាសចុះជួបជាមួយកសិករសមាជិកនៃសហគមន៍កសិកម្មទំនើប ពីសារៈសំខាន់នៃការវិវត្តន៍ខ្លួនទៅតាមតម្រូវការទីផ្សារ និងការធ្វើពិពិធកម្មមុខរបររបស់ខ្លួន ដើម្បីការពារពីហានិភ័យនៃការបន្តធ្វើផលិតកម្មលើប្រភេទដំណាំ ដែលតែងតែជួបបញ្ហាប្រឈម លោក ឃឹម ហ្វីណង់ បានមានប្រសាសន៍ថា ការងារដែលត្រឹមត្រូវ មិនមែនឃើញកសិករដាំដំណាំណាមួយដែលរកទីផ្សារបានហើយ ទៅជួយដោះស្រាយដើម្បីឱ្យកសិករបន្តដាំដំណាំដែលរកទីផ្សារមិនបាននោះទេ ការដោះស្រាយបែបនោះដោះបានតែមួយគ្រាប៉ុណ្ណោះ។

អ្នកនាំពាក្យរូបនេះ បានសង្កត់ធ្ងន់ថា «ការងារដែលត្រឹមត្រូវបំផុត គឺការវិវត្តន៍ខ្លួនពីដំណាំដែលគ្មានទីផ្សារ ងាកទៅដាំដំណាំដែលមានទីផ្សារ ការវិវត្តន៍ខ្លួនពីការដាំដំណាំដែលមិនសូវចំណេញ ងាកទៅដំណាំដែលចំណេញជាងមុន ងាកពីស្រូវទៅម្ទេស ងាកពីស្រូវទៅបន្លែ ងាកពីដំឡូងមី ទៅកាន់ដំណាំដែលមានគុណតម្លៃ»។

លោក ឃឹម ហ្វីណង់ បានមានប្រសាសន៍បន្តថា កន្លងមកតែងមានប្រជាកសិករដែលតែងតែសួរថា ប្រសិនបើធ្វើបែបនេះ តើដាំដំណាំអ្វីទើបទទួលបានផលចំណេញ? បកស្រាយជុំវិញបញ្ហានេះ លោក បានអះអាង ចម្លើយគឺមិនមាននោះទេ ព្រោះប្រសិនបើដាំដំណាំណាមួយត្រូវក្នុងពេលបច្ចុប្បន្ននេះ ក៏គង់តែខុសនៅក្នុងពេលណាមួយដែរ អ្វីៗតែងតែមានការប្រែប្រួលទៅតាមពេលវេលាជាក់ស្តែង។

ក្រសួងមិនមានចម្លើយណាដែលបញ្ជាក់ថា ដាំដំណាំអ្វីទៅចំណេញនោះទេ ប៉ុន្តែក្រសួងមានលទ្ធផលនៅក្នុងការជួយកាច់ចង្កូត និងជួយផ្តល់ដំបូន្មាន ដើម្បីនៅពេលដែលទីផ្សារចាល់ទៅលើដំណាំណាមួយក្រសួងនឹងជួយទៅបញ្ហាដើមទុន បញ្ហាបច្ចេកទេសនៅក្នុងការដាំដុះ បញ្ហាទីផ្សារ និងការគ្រប់គ្រងខ្សែចង្វាក់ផលិតកម្មតម្លៃ។ មិនតែប៉ុណ្ណោះ ក្រសួងកសិកម្មក៏នឹងជួយទៅលើការគ្រប់គ្រងបន្ថែមទៀតផងដែរ។ លោក ឃឹម ហ្វីណង់ បន្ថែមបែបនេះ។

បកស្រាយជុំវិញចម្ងល់ដែលចោទថា ហេតុអ្វីចាំបាច់ចូលជាសហគមន៍? លោក ឃឹម ហ្វីណង់ បានបកស្រាយថា ក្រសួងក៏ចង់ជួយទៅដល់ប្រជាកសិករម្នាក់ៗដែរ ប៉ុន្តែប្រជាពលរដ្ឋមានរាប់លាននាក់ ដូច្នេះការជួយម្នាក់ៗ គឺកំពុងមានប្រសិទ្ធភាពនោះទេ ហើយក្រសួងក៏មិនដឹងថា តភ្ជាប់ទីផ្សាររបៀបណាដែរ និងដាក់ដើមទុនឱ្យខ្ចីនៅក្នុងរបៀបណាដែរ ហើយប្រសិនជួយម្នាក់ៗថ្ងៃណាទើបក្រសួងអាចជួយអស់។

ហេតុដូចនេះហើយ ពាក់ព័ន្ធនឹងរឿងនេះ មិនមែនក្រសួងកំណាញ់ទេ មន្ត្រីកសិកម្មភូមិក៏ចុះទៅជួយណែនាំដល់កសិករម្នាក់ៗនោះដូចគ្នាដែរ ប៉ុន្តែការជួយដល់កសិករម្នាក់ៗ គឺមានភាពយ៉ើតយ៉ាវ ដូច្នេះចាំបាច់ត្រូវប្រមូលផ្តុំជាសហគមន៍កសិកម្ម ក្រសួងជួយម្តងទាំងអស់តែម្តងដើម្បីឱ្យការងារនោះកាន់តែមានប្រសិទ្ធភាព៕