ព័ត៌មានជាតិ

ទុរេនស្រុកស្ទឹងត្រង់ មួយដើមអាចប្រមូលផលបានពី ៨០ គីឡូក្រាម ទៅ ១០០ គីឡូក្រាម

បានផុស

១២ ខែ មុន

នៅ

ថ្ងៃសុក្រ ២០ មិថុនា ២០២៥

ដោយ

ម្ចាស់ចម្ការទុរេនដ៏ធំមួយនៅស្រុកស្ទឹងត្រង់ ខេត្តកំពង់ចាមបានអះអាងថា ភូមិសាស្រ្តស្រុកស្ទឹងត្រង់ដែលជាតំបន់ខ្ពង់រាបដីក្រហម ការដាំដុះដំណាំទុរេនមួយដើមអាចផ្តល់ផលបានចន្លោះពី ៨០ គីឡូក្រាម ទៅ ១០០ គីឡូក្រាម។

លោក ស៊ីវ ថា ម្ចាស់ចម្ការទុរេននាគខៀវនៅស្រុកស្ទឹងត្រង់ ខេត្តកំពង់ចាមបានបញ្ជាក់ថា ដំណាំទុរេនចាយទុនច្រើនបន្តិចលើការដាំដុះនិងថែទាំ ប៉ុន្តែផ្តល់ផលចំណូលឆ្លើយតបការចំណាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្តល់បទសម្ភាសន៍ដល់ក្រុមអ្នកសារព័ត៌មាន ក្នុងឱកាសចុះទស្សនកិច្ចផ្សព្វផ្សាយពីសក្តានុពលកសិកម្មនៅស្រុកស្ទឹងត្រង់លោក ស៊ីវ ថា បានបញ្ជាក់ថា នៅស្រុកស្ទឹងត្រង់ លោកបានដាំដុះពូជទុរេន ៣ ប្រភេទលើផ្ទៃដីជាង ២០០ ហិកតា ក្នុងនោះមានពូជម៉ាន់ថង ម៉ូសាងឃីង និងប្លេកថន។ លោកអះអាងថា នៅស្រុកស្ទឹងត្រង់ដែលជាតំបន់ខ្ពស់រាបដីក្រហម ការដាំដុះទុរេនមួយដើមបើសិនមានការថែទាំដិតដល់ អាចផ្តល់ផលបានចន្លោះពី ៨០ ទៅ ១០០ គីឡូក្រាម។

ទិន្នផលទុរេនដែលកំពុងផ្តល់ផលលើផ្ទៃដីរាប់រយហិកតា ក្រៅពីសម្រាប់ផ្គត់ផ្គង់ទីផ្សារក្នុងស្រុក លោក ស៊ីវ ថា បានប្រាប់ថា ក៏មានគម្រោងក្នុងការនាំចេញទៅទីផ្សារក្រៅប្រទេសជាពិសេសទីផ្សារប្រទេសចិន ស្របពេលដែលលោកក៏កំពុងពិនិត្យលទ្ធភាពក្នុងការពង្រីកផ្ទៃដីដាំដុះបន្ថែមទៀត៕