សេដ្ឋកិច្ច

ជើងហោះហើរអាកាសយានដ្ឋានភ្នំពេញ ចាប់ផ្ដើមរុះរើទៅព្រលានថ្មី

បានផុស

១១ ខែ មុន

នៅ

ថ្ងៃអង្គារ ២២ កក្កដា ២០២៥

ដោយ

ក្រុមហ៊ុនអាកាសចរណ៍នៅអាកាសអន្តរជាតិភ្នំពេញ (ពោធិ៍ចិតុង) ចំនួន ៣១ បានចាប់ផ្ដើមផ្ទេរប្រតិបត្តិការរបស់ខ្លួន ទៅអាកាសយានដ្ឋានអន្តរជាតិតេជោជាបណ្ដើរៗ ខណៈអាកាសយានដ្ឋានថ្មីនឹងបើកឱ្យដំណើរការនៅថ្ងៃទី ០៩ ខែកញ្ញ ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល ប្រាប់កម្ពុជាថ្មីថា ក្រុមហ៊ុនអាកាសចរណ៍នៅអាកាសអន្តរជាតិភ្នំពេញចាប់ផ្ដើមរៀបចំបណ្ដើរៗពីឥឡូវទៅហើយ ពីព្រោះការរុះរើមិនមែនធ្វើតែមួយថ្ងៃទេ ព្រោះការផ្ទេរវាត្រូវការពេលវេលា។

លោកបញ្ជាក់ថា៖ «សម្ភារណាដែលមានការឯកភាពនៅក្នុងកិច្ចសន្យា ដែលអាចយកទៅប្រើប្រាស់នៅព្រលានថ្មីបានគេយកទៅ ប៉ុន្តែភាគច្រើនឥវ៉ាន់គេអត់យកទៅច្រើនទេ ដោយសារឧបករណ៍សម្ភារដែលបំពាក់នៅព្រលានថ្មី គឺជាឧបករណ៍ថ្មីទាំងអស់ ការផ្ទេរប្រតិបត្តិការសំដៅទៅលើមនុស្ស ការហាត់រៀន ដែលបុគ្គលិកកំពុងហ្វឹកហ្វឺននៅព្រលានថ្មី»។

ក្រុមហ៊ុន សូស៊ីយេតេ កុងសេស្យូនែរ ដឺ ឡាអេរ៉ូព័រ (SCA) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនចុះបញ្ជីនៅបារាំង VINCI ទទួលបានសិទ្ធិគ្រប់គ្រងសេវាកម្មមួយចំនួន នៅអាកាសយានដ្ឋានអន្តរជាតិតេជោ។

អាកាសយានដ្ឋានអន្តរជាតិតេជោលំដាប់ 4F តម្លៃ ២ ពាន់លានដុល្លារ ដំណាក់កាលទី១ បានបិទបញ្ចប់ការសាងសង់ទាំងស្រុង និងត្រៀមបើកឱ្យដំណើរការនៅថ្ងៃទី ០៩ ខែកញ្ញា ឆ្នាំ ២០២៥។

អាកាសយានដ្ឋានអន្តរជាតិតេជោ នឹងមកជំនួសអាកាសយានដ្ឋានអន្តរជាតិភ្នំពេញបច្ចុប្បន្ន ដែលមានសមត្ថភាពបម្រើសេវាកម្មដឹកភ្ញៀវទេសចរណ៍បានរហូតដល់ទៅ ៦ដងលើសព្រលានបច្ចុប្បន្ន។

អាកាសយានដ្ឋានអន្តរជាតិតេជោមាន៣ដំណាក់កាល គឺដំណាក់កាលទី១ តម្លៃ ២ ពាន់លានដុល្លារ សាងសង់រួចរាល់នៅឆ្នាំ ២០២៥ អាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ។

យោងតាមរដ្ឋលេខាធិការដ្ឋានអាកាសចរស៊ីវិល នៅក្នុងឆមាសទី១ ឆ្នាំ ២០២៥កម្ពុជាទទួលបានអ្នកដំណើរជាតិ និងអន្តរជាតិតាមផ្លូវអាកាសចំនួនជាង ៣,៦៥ លាននាក់ កើនឡើង ២០% ធៀបនឹងរយៈពេលដូចគ្នា កាលពីឆ្នាំ ២០២៤។

រដ្ឋលេខាធិការដ្ឋានអាកាសចរណ៍ស៊ីវិលបានព្យាករណ៍ថា ការដឹកជញ្ជូនអ្នកដំណើរតាមផ្លូវអាកាសនឹងកើនដល់ចំនួន ៧,៥លាននាក់ និងទំនិញចំនួន ៨០ពាន់តោន នៅក្នុងឆ្នាំ ២០២៥៕