​មន្ត្រីអាកាសចរស៊ីវិល​ និង​សហភាពអឺរ៉ុប​ទស្សនកិច្ច​អាកាសយានដ្ឋាន​អន្តរជាតិ​តេជោ ​លើកកម្ពស់សមត្ថភាព​ដឹកជញ្ជូន​តាមផ្លូវអាកាស​

រដ្ឋលេខាធិការដ្ឋានអាកាសចរណ៍ស៊ីវិល នៅថ្ងៃទី ២៤ ​ខែមេសា ​២០២៦ ​បានសហការជា​ មួយ​សហ​ភាពអឺរ៉ុបប្រចាំកម្ពុជា ​និង​រដ្ឋាភិបាលសហព័ន្ធអាល្លឺម៉ង់ រៀបចំទស្សនកិច្ចរួមគ្នា​នៅ​អាកាស​យានដ្ឋានអន្តរជាតិតេជោ ​ស្តីពីការសម្រួលពាណិជ្ជកម្ម និងប្រតិបត្តិការដឹកជញ្ជូន​ទំនិញរហ័ស​តាម​ផ្លូវ​អាកាស ​ដោយមានគោលបំណងបង្ហាញពីវឌ្ឍនភាពនៃការកែលម្អប្រព័ន្ធគយ និងឡូជីស្ទីក ព្រមទាំងលើកកម្ពស់សមត្ថភាពប្រតិបត្តិការ​ដឹកជញ្ជូនទំនិញក្នុង​បរិបទសេដ្ឋកិច្ច​ឌីជីថល និង e-commerce​។ ​

​​ទស្សនកិច្ចនេះ មានការចូលរួមជាអធិបតីពីមន្ត្រីជាន់ខ្ពស់មកពីរដ្ឋលេខាធិការដ្ឋាន​អាកាសចរណ៍​ស៊ីវិល ក្រសួង​ពាណិជ្ជកម្ម,​ អគ្គនាយកដ្ឋានគយ និងរដ្ឋាករកម្ពុជា, ​ឯកអគ្គរដ្ឋទូតសហភាព​អឺរ៉ុប​ប្រចាំកម្ពុជា, ឯក​អគ្គរដ្ឋ​ទូត​អាល្លឺម៉ង់ ប្រចាំកម្ពុជា, តំណាងក្រុមហ៊ុន CAIC​ និងក្រុមហ៊ុន SCA, តំណាងក្រុមហ៊ុន DHL ព្រមទាំង​សមាស​ភាព​តំណាងស្ថាប័ន ចំនួនសរុបប្រមាណ ៩០ រូប។

លោកស៊ិន ចាន់សិរីវុត្ថា រដ្ឋលេខាធិការ និងជាអ្នកនាំពាក្យនៃ​រដ្ឋលេខាធិការដ្ឋានអាកាសចរស៊ីវិល​ មាន​ប្រសាសន៍ថា ​ទស្សនកិច្ចនេះ ​បង្ហាញពីទំនុកចិត្តភាពជាដៃគូ ​និងសមិទ្ធផលរួម ​ដែលការ​សហការ​បានបម្លែង​ចក្ខុវិស័យ​ទៅជាការរីកចម្រើនជាក់ស្ដែង​ សម្រាប់ពាណិជ្ជកម្ម ​ភស្ដុភារកម្ម ​និងកំណើនសេដ្ឋកិច្ច។

លោកបានថ្លែងបន្ថែមថា ភាពជាដៃគូរបស់សហភាពអឺរ៉ុប និងរដ្ឋាភិបាលអាល្លឺម៉ង់ មិនត្រឹមតែឆ្លុះបញ្ចាំងពីឧត្តមភាពផ្នែកបច្ចេកទេសប៉ុណ្ណោះទេ ប៉ុន្តែថែមទាំងបង្ហាញពីការប្ដេជ្ញាចិត្តរួមគ្នាចំពោះតម្លាភាព និងការធ្វើសមាហរណកម្មកាន់តែស៊ីជម្រៅរបស់កម្ពុជា ទៅក្នុងប្រព័ន្ធពាណិជ្ជកម្មសាកល។​

ក្នុងពិធីនោះដែរ ​ក៏មានការធ្វើបទបង្ហាញបច្ចេកទេសពីតំណាងក្រុមហ៊ុន ​CAIC ស្តីពី Cargo Terminal Facilities នៅអាកាសយានដ្ឋានអន្តរជាតិតេជោ និងបទបង្ហាញពីតំណាងក្រុមហ៊ុន DHL Express Cambodia ស្តីពីប្រតិបត្តិការ ដឹកជញ្ជូនទំនិញរហ័ស និងនិន្នាការអភិវឌ្ឍន៍ (Express Operation and Trends) ព្រមទាំងការចុះទស្សនកិច្ចជាក់ស្តែងនៅតំបន់ឃ្លាំងទំនិញ (Terminal Cargo) និងសេវាគយ ដើម្បីបង្ហាញពីដំណើរការនាំចូល-នាំចេញ និងការអនុវត្តប្រព័ន្ធទំនើប៕