សេដ្ឋកិច្ច

កម្ពុជាស្វាគមន៍អ្នកដំណើរជាង ២,៤ លាននាក់ ចេញ-ចូល តាមផ្លូវអាកាសនៅរយៈពេល ៤ ខែ

បានផុស

២ ខែ មុន

នៅ

ថ្ងៃសុក្រ ១៥ ឧសភា ២០២៦

ដោយ

អ្នកដំណើរជាង ២,៤ លាននាក់ ចេញ-ចូលតាមផ្លូវអាកាសកម្ពុជានៅក្នុងរយៈពេល ៤ ខែ(មករា-មេសា) ២០២៦ ធ្លាក់ចុះ៤% ធៀបនឹងរយៈពេលដូចគ្នា កាលពីឆ្នាំមុន ខណៈចំនួនជើងហោះហើរ និងការដឹកជញ្ជូនទំនិញ កើនឡើងខ្ពស់។ នេះបើយោងតាមរបាយការណ៍របស់អាកាសចរណ៍ស៊ីវិល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់អាកាសចរណ៍ស៊ីវិលបង្ហាញថា គិតចាប់ពីខែមករា ដល់ខែមេសា ២០២៦ ជើងហោះហើរចេញ-ចូល តាមផ្លូវអាកាសកម្ពុជា មានចំនួនជាង ២ ម៉ឺនជើង (២៣ ២០៤) កើនឡើង ២%, អ្នកដំណើរចេញ-ចូលចំនួន ២ ៤២៨ ០០៩ នាក់ ខណៈទំនិញចេញ-ចូល មានចំនួនជាង ៣០ ពាន់តោន កើនឡើង ៣៦%។

លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល មានប្រសាសន៍ថា វិស័យអាកាសចរណ៍ កំពុងដើរតួនាទីសំខាន់លើការដឹកជញ្ជូនអ្នកដំណើរ និងទំនិញតាមផ្លូវអាកាស ក្នុងការចូលរួមចំណែកដល់វិស័យទេសចរណ៍ ពាណិជ្ជកម្ម វិនិយោគ និងការតភ្ជាប់ធ្វើដំណើររបស់ប្រជាជន។

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល មានប្រសាសន៍ថា កំណើនដ៏រឹងមាំនៃវិស័យអាកាសចរណ៍ ដោយសារការងើបឡើងវិញ នៃចំនួនទេសចរចិនដែលធ្វើដំណើរចេញក្រៅប្រទេស, និរន្តរភាពតម្រូវការធ្វើដំណើរតាមផ្លូវអាកាសក្នុងតំបន់ជាអាទិ៍ពីប្រទេសថៃ វៀតណាម កូរ៉េ និងជប៉ុន និងការបន្ធូរបន្ថយការរឹតបន្តឹងក្នុងការធ្វើដំណើរ និងការស្តារ និងពង្រឹងសមត្ថភាពក្រុមហ៊ុនអាកាសចរណ៍ឡើងវិញ។

យោងតាមអាកាសចរស៊ីវិល នៅក្នុងឆ្នាំ ២០២៥ កម្ពុជាទទួលបានជើងហោះហើរចេញ-ចូល (ទ្វេទិស) ចំនួន ៦៤ ៨២១ ជើង កើនឡើង ១១%, អ្នកដំណើរចេញ-ចូល (ទ្វេទិស) ចំនួនជិត ៧ លាននាក់ (៦៩៨៨២៥៩) កើនឡើង ១២% និងទំនិញតាមផ្លូវអាកាសមានចំនួន ៩៣ ៨៨៩ តោន កើន ២១% ប្រៀបធៀបនឹងឆ្នាំ ២០២៤៕