សេដ្ឋកិច្ច

កម្ពុជា ដាក់គោលដៅដឹកអ្នកដំណើរតាមផ្លូវអាកាស ៨ លាននាក់ នៅឆ្នាំ ២០២៦

បានផុស

៤ ខែ មុន

នៅ

ថ្ងៃសុក្រ ២៧ កុម្ភៈ ២០២៦

ដោយ

រដ្ឋលេខាធិការដ្ឋានអាកាសចរណ៍ស៊ីវិលនៅថ្ងៃសុក្រនេះ បានកំណត់គោលដៅដឹកអ្នកដំណើរចេញ-ចូលតាមផ្លូវអាកាសឱ្យបានចំនួន ៨ លាននាក់ នៅក្នុងឆ្នាំ ២០២៦ ដោយសារមានតម្រូវការពាណិជ្ជកម្ម ទេសចរណ៍ និងការដោះដូរវប្បធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានលើកឡើងក្នុងពិធីសន្និបាតបូកសរុបលទ្ធផលការងារ ឆ្នាំ ២០២៥ និងលើកទិសដៅការងារឆ្នាំ ២០២៦ នៅថ្ងៃទី ២៧ ខែកុម្ភៈថា វិស័យអាកាសចរណ៍ នៅតែបន្តទទួលផលប្រយោជន៍ នៃកេរ្ដិ៍ដំណែលរបស់សម្ដេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី ក្នុងការដាក់ឱ្យអនុវត្តគោលនយោបាយបើកចំហជើងមេឃនៅឆ្នាំ ១៩៩៩ និងកំពុងបន្តក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដោយបានជំរុញឱ្យមានសន្ទុះរីកចម្រើនដល់ការដឹកជញ្ជូនតាមផ្លូវអាកាស ឆ្លើយតបនឹងតម្រូវការទេសចរណ៍ ធុរកិច្ច ពាណិជ្ជកម្ម និងការផ្សារភ្ជាប់ទំនាក់ទំនងសង្គម-វប្បធម៌។

នៅក្នុងសន្និបាតនោះ លោករដ្ឋមន្ត្រីក៏បានលើកឡើងនូវបញ្ហាប្រឈម និងដំណោះស្រាយមួយចំនួនរួមាន៖

ការប្រឈមក្នុងការបណ្តុះបណ្តាលមន្ត្រីបច្ចេកទេស និងអធិការកិច្ច នៅរាយប៉ាយតាមបណ្តាអង្គភាព លោកបានប្រគល់ភារកិច្ចជូនអគ្គនាយកដ្ឋានរដ្ឋបាលនិងហិរញ្ញវត្ថុ ពង្រឹងការងារនេះបន្ថែម ដើម្បីឲ្យឆ្លើយតបនឹងការតម្រូវរបស់ ICAO។

ការប្រឈមទី សម្រាប់ថវិកាបណ្តុះបណ្តាលមន្រ្តីបច្ចេកទេសចាំបាច់ និងអធិការកិច្ច ជាពិសេសសម្រាប់វគ្គបណ្តុះបណ្តាលរក្សាជំនាញ (Recurrent Training) នៅមានកម្រិត។

លោកបណ្ឌិត ម៉ៅ ហាវណ្ណាល់បានស្នើឱ្យអគ្គនាយកដ្ឋានរដ្ឋបាលនិងហិរញ្ញវត្ថុ សិក្សាសេចក្តីត្រូវការថវិកាបណ្តុះបណ្តាលមន្រ្តីបច្ចេកទេសចាំបាច់ និងមន្រ្តីអធិការកិច្ចរួមទាំងវគ្គបណ្តុះបណ្តាលរក្សាជំនាញ (Recurrent Training) ដើម្បីលើកសំណើសុំទៅរាជរដ្ឋាភិបាល។

យោងតាមអាកាសចរណ៍ស៊ីវិល នៅក្នុងឆ្នាំ ២០២៥ កម្ពុជាទទួលបានអ្នកដំណើរចេញ-ចូលតាមផ្លូវអាកាសជិត ៧ លាននាក់ (៦ ៩៨៨ ២៥៩) កើនឡើង ១២% និងទំនិញតាមផ្លូវអាកាសចំនួនជាង ៩៣ ពាន់តោន (៩៣ ៨៨៩) កើនឡើង ២១% ប្រៀបធៀបនឹងឆ្នាំ ២០២៤៕