ព័ត៌មានអន្ដរជាតិ

អាមេរិកគំរាមបង្កើនពន្ធលើឥណ្ឌា ប្រសិនការចរចាត្រាំ-ពូទីន បរាជ័យ

បានផុស

១១ ខែ មុន

នៅ

ថ្ងៃសុក្រ ១៥ សីហា ២០២៥

ដោយ

រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent បានព្រមានថា សហរដ្ឋអាមេរិកអាចបង្កើន «ពន្ធបន្ទាប់បន្សំ» លើប្រទេសឥណ្ឌា ដែលជាអតិថិជនប្រេងរបស់រុស្ស៊ី ប្រសិនគ្មានដំណោះស្រាយសន្តិភាពជុំវិញសង្រ្គាមឈ្លានពានលើអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបាននិយាយថាការសម្រេចចិត្តបន្ថែមពន្ធពីលើអត្រា ៥០ ភាគរយ ដែលមានស្រាប់ នឹងអាស្រ័យទៅលើលទ្ធផលនៃកិច្ចប្រជុំរបស់ប្រធានាធិបតីលោក ដូណាល់ ត្រាំ និងសមភាគីរុស្ស៊ី លោក វ៉្លាឌីមៀរ ពូទីន នៅរដ្ឋអាឡាស្កា នាថ្ងៃសុក្រនេះ។

លោក Bessent បាននិយាយក្នុងបទសម្ភាសន៍មួយទៅកាន់ទូរទស្សន៍ Bloomberg កាលពីថ្ងៃពុធ ថា៖ «យើងបានដាក់ពន្ធបន្ទាប់បន្សំលើឥណ្ឌាសម្រាប់ការទិញប្រេងពីរុស្ស៊ី។ ហើយខ្ញុំអាចមើលឃើញថា ប្រសិនបើអ្វីៗមិនដំណើរការល្អ នោះទណ្ឌកម្ម ឬពន្ធបន្ទាប់បន្សំអាចនឹងត្រូវបង្កើនឡើង»។ ពន្ធបន្ទាប់បន្សំ សំដៅលើការដាក់ពន្ធលើប្រទេសទី៣ ដែលពាក់ព័ន្ធនឹងប្រទេសដែលរងទណ្ឌកម្ម ពោលគឺរុស្ស៊ីដែលជាអ្នកលក់ប្រេងឱ្យឥណ្ឌាក្នុងបរិបទនេះ។

កាលពីដើមខែនេះ លោក ត្រាំ បានដាក់ពន្ធពិន័យ ២៥ ភាគរយ លើឥណ្ឌា បន្ថែមពីលើពន្ធ ២៥ ភាគរយ ដែលមានស្រាប់ ចំពោះការទិញប្រេង និងអាវុធរបស់រុស្ស៊ី។ ចំណាត់ការបែបនេះ ធ្វើឡើងខណៈសហរដ្ឋអាមេរិកកំពុងព្យាយាមសម្រុះសម្រួលបទឈប់បាញ់រវាងរុស្ស៊ី និងអ៊ុយក្រែន។

កាលពីថ្ងៃពុធផងដែរ លោក ត្រាំ បានព្រមានអំពី «ផលវិបាកធ្ងន់ធ្ងរ» ប្រសិនបើរុស្ស៊ី មិនយល់ព្រមចំពោះកិច្ចព្រមព្រៀងសន្តិភាព។

គួរគូសបញ្ជាក់ថា ប្រេងរបស់រុស្ស៊ីរួមចំណែកពី ៣៥-៤០ ភាគរយ នៃការនាំចូលប្រេងសរុបរបស់ប្រទេសឥណ្ឌា ក្នុងឆ្នាំ ២០២៤ ដែលកើនឡើង ៣ ភាគរយ ធៀបនឹងឆ្នាំ ២០២១។ កន្លងមក ឥណ្ឌាតែងតែទទូចថា ការទិញប្រេងថោកៗរបស់រុស្ស៊ី ជួយដោះស្រាយបន្ទុកសន្ដិសុខថាមពលរបស់ប្រជាជនឥណ្ឌាជាង ១,៤ ប៊ីលាននាក់ និងកុំឱ្យប្រេងអន្តរជាតិឡើងថ្លៃ៕