ព័ត៌មានអន្ដរជាតិ

សង្គ្រាម រុស្ស៊ី-អ៊ុយក្រែន ក្លាយជាសង្រ្គាមដ៏ខ្លាំងបំផុតនៅអឺរ៉ុប ចាប់តាំងបញ្ចប់សង្រ្គាមលោកទី២

បានផុស

៤៣ វិនាទី មុន

នៅ

ថ្ងៃព្រហស្បតិ៍ ២ កក្កដា ២០២៦

ដោយ

ការវាយប្រហារដោយមីស៊ីល និង ដ្រូន របស់រុស្ស៊ីជាប្រចាំ ទៅលើទីក្រុងនានារបស់អ៊ុយក្រែន អំឡុងពេលឈ្លានពានជាង ៤ឆ្នាំមកនេះ បានក្លាយជាជម្លោះដ៏ខ្លាំងក្លាបំផុតរបស់អឺរ៉ុប ចាប់តាំងពីសង្គ្រាមលោកលើកទីពីរ។

ការវាយប្រហារនេះកើតឡើង បន្ទាប់ពីកងទ័ពអាកាសអ៊ុយក្រែន បានព្រមានថា មីស៊ីលបាលីស្ទីកកំពុងតម្រង់ទៅកាន់រដ្ឋធានីក្នុងប្រទេសអ៊ុយក្រែន មុនឈានចូលថ្ងៃទី០២ ខែកក្តដា ឆ្នាំ២០២៦ ។

ការវាយប្រហាររបស់រុស្ស៊ីលើអ៊ុយក្រែន។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកកាសែត AFP នៅទីក្រុងកៀវ បានឮសំឡេងផ្ទុះជាងដប់ដង ហើយឃើញអ្នកស្រុក ខ្លះមានកូន និងសត្វចិញ្ចឹម កំពុងប្រញាប់ប្រញាល់រត់ទៅជ្រកកោននៅក្នុងស្ថានីយរថភ្លើងក្រោមដី។

ការវាយប្រហារទាំងនេះបានសម្លាប់មនុស្ស ១០នាក់ និងរបួសយ៉ាងហោចណាស់ ៥០នាក់ រួមទាំងកុមារក្នុងមួយយប់។ នេះបើតាមការលើកឡើងរបស់ប្រធានរដ្ឋបាលយោធាក្រុង Tymur Tkachenko ។

រដ្ឋបាលបានថ្កោលទោស ចំពោះការកំណត់គោលដៅដោយចេតនាលើជនស៊ីវិល និងតំបន់លំនៅដ្ឋាន។ យោងតាមអភិបាលតំបន់ លោក Mykola Kalashnyk ឱ្យដឹងថា ស្រុកចំនួន៥ ក្នុងតំបន់កៀវត្រូវបានវាយប្រហារ។

លោក Kalashnyk និយាយថា៖ « នៅពេលយប់ សត្រូវបានបើកការវាយប្រហារដ៏ធំមួយម្តងទៀតលើតំបន់កៀវ ដោយប្រើដ្រូនវាយប្រហារ មីស៊ីលផ្លោង និងមីស៊ីលបញ្ជា។

លោកបន្ថែមថា ក្រុមអ្នកសង្គ្រោះបន្ទាន់កំពុងប្រយុទ្ធប្រឆាំងនឹងអគ្គិភ័យនៅឃ្លាំងនិងផ្ទះមួយខ្នងក្នុងស្រុក Bucha ខណៈការវាយប្រហារបានបំផ្លាញផ្ទះសម្បែង អន្តេវាសិកដ្ឋាននិស្សិត និងយានយន្តនៅកន្លែងផ្សេងទៀតក្នុងតំបន់។

ប៉ុន្មានម៉ោងមុនពេលកើតហេតុ អ្នកយកព័ត៌មាន AFP ម្នាក់បានឃើញការផ្ទុះមួយ នៅកណ្តាលទីក្រុងកៀវ អំឡុងពេលមានការជូនដំណឹងអំពីការវាយប្រហារតាមអាកាស បន្ទាប់មកដោយពពកផ្សែងនិងអណ្តាតភ្លើង។

ការផ្ទុះលើកទីពីរបានផ្ទុះឡើងប្រហែល ៥០នាទីក្រោយ នៅជិតកន្លែងប៉ះទង្គិចដំបូង ដោយបញ្ជូនកម្ទេចកម្ទីឡើងលើអាកាស៕

សម្រួល៖ ណឺ មិនា