ព័ត៌មានអន្ដរជាតិ

អាល្លឺម៉ង់អំពាវនាវរុស្ស៊ី ឱ្យឈប់វាយអ៊ុយក្រែន ហើយវិលមកតុចរចាបញ្ចប់សង្គ្រាម

បានផុស

១៣ វិនាទី មុន

នៅ

ថ្ងៃអង្គារ ១៤ កក្កដា ២០២៦

ដោយ

សង្រ្គាមរុស្ស៊ី-អ៊ុយក្រែន ដែលមានរយៈពេលជាង៤ឆ្នាំ ក្នុងទ្រង់ទ្រាយធំមិនធ្លាប់មាន ចាប់តាំងពីសង្គ្រាមលោកលើកទី២បានបញ្វប់ទៅកាលពីជាង៨០ឆ្នាំមុន។ គ្រប់ភាគីនៃជម្លោះប្រដាប់អាវុធទ្រង់ទ្រាយធំនេះ មិនបានចំណេញអ្វីជាងគ្នាទេ មានតែបន្សល់មនុស្សស្លាប់ ក្មេងកំព្រា និងប៉ះពាល់ដល់សេដ្ឋកិច្ចយ៉ាងធ្ងន់ធ្ងរ និង បង្កអសន្តិសុខទូទាំងសកលលោក។

ដើម្បីឈានទៅបញ្ចប់សង្គ្រាម អធិការបតីអាល្លឺម៉ង់ លោក Friedrich Merz បានអំពាវនាវដល់ប្រធានាធិបតីរុស្ស៊ី លោក វ៉្លាឌីមៀរ ពូទីន ឱ្យបញ្ឈប់ការវាយប្រហារលើអ៊ុយក្រែន ហើយវិលត្រឡប់មកតុចរចាវិញ។ នេះបើយោងតាមទីភ្នាក់ងារសារព័ត៌មាន Anadolu ផ្សាយនៅថ្ងៃទី១៣ ខែកក្កដា ឆ្នាំ២០២៦ ។

អធិការបតីអាល្លឺម៉ង់ លោក Friedrich Merz ។ រូបភាព៖ AA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទសារព័ត៌មានរួមគ្នាមួយនៅទីក្រុងប៉ារីស ជាមួយមេដឹកនាំមកពីប្រទេសបារាំង អ៊ុយក្រែន និងចក្រភពអង់គ្លេស លោក Merz និយាយថា៖ « សមាជិកនៃសម្ព័ន្ធមិត្តបានយល់ព្រមរក្សាការគាំទ្រយ៉ាងរឹងមាំ ចំពោះទីក្រុងកៀវ ខណៈយើងកំពុងបង្កើនសម្ពាធលើទីក្រុងមូស្គូតាមរយៈវិធានការថ្មីៗ។ យើងកំពុងធ្វើបែបនេះមិនមែនដើម្បីពន្យារសង្គ្រាមនោះទេ ប៉ុន្តែដើម្បីបញ្ចប់វាឱ្យបានឆាប់រហ័សតាមដែលអាចធ្វើទៅបាន»។

លោកបន្ថែមថា៖ « សាររបស់យើងទៅកាន់ប្រទេសរុស្ស៊ីគឺ ដល់ពេលត្រូវមកតុចរចាហើយ ដល់ពេលត្រូវព្រមព្រៀងគ្នាលើបទឈប់បាញ់។ ដល់ពេលត្រូវបញ្ចប់ការបង្ហូរឈាមដែលមិនចាំបាច់នៅអ៊ុយក្រែនហើយ»។

មេដឹកនាំអាល្លឺម៉ង់រូបនេះអះអាងថា សង្គ្រាមរុស្ស៊ី-អ៊ុយក្រែនបានចូលដល់ដំណាក់កាលថ្មីមួយ ដោយទីក្រុងកៀវសម្រេចបានភាពជោគជ័យផ្នែកយោធាយ៉ាងច្រើនក្នុងរយៈពេលប៉ុន្មានខែថ្មីៗនេះ ដោយមានជំនួយពីការគាំទ្រផ្នែកយោធារបស់លោកខាងលិច។

លោក Merz និយាយថា៖ « វាកាន់តែច្បាស់ឡើងៗ ហើយពលរដ្ឋរុស្ស៊ីកាន់តែច្រើនកំពុងដឹងថា ទីក្រុងមូស្គូនឹងមិនទទួលបានជ័យជម្នះក្នុងសង្គ្រាមនេះទេ។ រុស្ស៊ីនឹងមិនសម្រេចបាននូវគោលបំណងសង្គ្រាមរបស់ខ្លួនទេ»។

លោកក៏បានប្រាប់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ថា ប្រទេសអាល្លឺម៉ង់ និងសម្ព័ន្ធមិត្តលោកខាងលិចនឹងបន្តផ្តល់ការគាំទ្រផ្នែកសេដ្ឋកិច្ច និងយោធាយ៉ាងរឹងមាំដល់ទីក្រុងកៀវ។

លោក Merz សង្កត់ថា៖ « យើងឈរជាមួយអ្នក[អ៊ុយក្រែន] មិនត្រឹមតែដោយសារតែសេរីភាពរបស់អ៊ុយក្រែនស្ថិតក្នុងគ្រោះថ្នាក់ប៉ុណ្ណោះទេ ប៉ុន្តែដោយសារតែសេរីភាពរបស់យើងនៅទូទាំងទ្វីបអឺរ៉ុបទាំងមូលក៏ស្ថិតក្នុងគ្រោះថ្នាក់ ក្នុងសង្គ្រាមឈ្លានពានដ៏គួរឱ្យភ័យខ្លាចនេះផងដែរ»៕

សម្រួល៖ ណឺ មិនា