សេដ្ឋកិច្ច

តម្លៃហាងឆេងមាស បន្តកើនឡើងបំបែកកំណត់ត្រាថ្មី

បានផុស

៩ ខែ មុន

នៅ

ថ្ងៃចន្ទ ៨ កញ្ញា ២០២៥

ដោយ

តម្លៃមាសបានហក់ឡើងជាបន្តបន្ទាប់ចាប់តាំងពីដំណាច់ខែសីហា ឆ្នាំ ២០២៥ រហូតមកដល់ពេលនេះ ដោយសារតែព័ត៌មាននៃការត្រៀមទម្លាក់អត្រាការប្រាក់នៅសហរដ្ឋអាមេរិកនៅថ្ងៃទី ១៧ ខែកញ្ញា ឆ្នាំ ២០២៥ និងស្ថានភាពសង្គ្រាមពិភពលោកនៅតែបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមម៉ោង ៩ ព្រឹកថ្ងៃទី ០៨ ខែកញ្ញា ឆ្នាំ ២០២៥ តម្លៃហាងឆេងមាសនៅតាមបណ្ដាហាងនានា ក្នុងរាជធានីភ្នំពេញ លក់ចេញក្នុងតម្លៃ ៤៣២ ដុល្លារ ក្នុងមួយជី។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities មានប្រសាសន៍ថា តម្លៃមាសនឹងបន្តកើនឡើងដល់ជាង ៤៥០០ ដុល្លារ ក្នុងមួយតម្លឹង ដោយសារតែវិនិយោគគិន និងធនាគារធំៗ បានដឹងព័ត៌មាននៃការដែលអាមេរិកត្រៀមកាត់បន្ថយអត្រាការប្រាក់នៅថ្ងៃទី ១៧ ខែកញ្ញានេះ ពួកគាត់ចាប់ផ្ដើមដកលុយចេញពីការសន្សំយកការប្រាក់ ឬការប្រើលុយដុល្លារយកផលចំណេញ យកទៅទិញលើតម្លៃហាងឆេងមាស។

លោក ឡុង សំណាង បញ្ជាក់ថា៖ «ដោយសារពួកគាត់គិតថា អត្រាការប្រាក់នឹងកាត់បន្ថយ ហើយលុយដុល្លារត្រូវតែធ្លាក់ចុះ អញ្ចឹងពួកគាត់ធ្វើសកម្មភាពមុន ឥទ្ធិពលនេះ គឺជាឥទ្ធិពលអត្រាការប្រាក់ ហើយក្នុងឆ្នាំនេះ ការកាត់បន្ថយអត្រាការប្រាក់រហូតដល់ ៣ ដង អញ្ចឹងវានៅបន្តទៀត»។

រីឯតម្លៃមាសអន្តរជាតិឯណោះវិញ ក៏មានទំនោរកើនឡើងផងដែរចាប់តាំងពីដំណាច់ខែសីហា ឆ្នាំ ២០២៥។ ក្នុងវគ្គជួញដូរលើទីផ្សារអាស៊ីនៅព្រឹកថ្ងៃច័ន្ទនេះ តម្លៃមាសជួញដូរដោយផ្ទាល់បានកើនឡើងប្រហែល ៣៥៩១ ក្នុងមួយអោននៅលើទីផ្សារអន្តរជាតិ ឬស្មើនឹង ៤៣២៦ ដុល្លារ ក្នុងមួយតម្លឹង នៅកម្ពុជា៕

អត្ថបទ៖ ឡេង ដេត