អ្នកស្រី ឈាវ ឡើយ ដែលជាអ្នកប្រកបរបរខាងលើ បានឱ្យថា គិតមកដល់ពេលនេះ មានរយៈពេលប្រមាណ ៣០ឆ្នាំមកហើយ ដែលអ្នកស្រីចាប់យករបរត្បាញជាលនេះ ដោយបានបន្ដវេនពីម្ដាយ ដើម្បីរកប្រាក់ចំណូលក្នុងគ្រួសារ និងជួយលើកកម្ពស់ជីវភាពប្រជាពលរដ្ឋក្នុងមូលដ្ឋាន។

របរនេះបានផ្ដល់ការងារដល់ពួកគាត់អាចធ្វើនៅតាមលំនៅឋានរៀងៗខ្លួន ដោយអ្នកស្រី ទទួលយកតែផលិតផលសម្រេចប៉ុណ្ណោះ។

អ្នកស្រី ឈាវ ឡើយ បានឱ្យដឹងទៀតថា ការប្រមូលផ្ដុំប្រជាពលរដ្ឋក្នុងមូលដ្ឋានដើម្បីផលិតជាលនេះ មិនត្រឹមតែជាការថែរក្សានូវរបរប្រពៃណី លើកកម្ពស់ផលិតផលខ្មែរ របស់អ្នកភូមិនេះប៉ុណ្ណោះទេ តែក៏ជារបរបន្ទាប់បន្សំមួយដែលអាចរកប្រាក់កម្រៃបន្ថែមផងដែរ ដោយក្នុងជាលមួយ អាចលក់បានក្នុងតម្លៃ ១ ៥០០រៀល ទៅតាមទំហំនៃសម្ភារ ដោយក្នុងមួយខែអ្នកស្រីអាចរកចំណូលបានប្រមាណ ៣លានរៀល។

អ្នកស្រី ឈាវ ឡើយ ក៏បានលើកទឹកចិត្តដល់ប្រជាពលរដ្ឋក្នុងភូមិទឹកវិល សង្កាត់ទឹកវិល អាចចាប់យកមុខរបរត្បាញជាលនេះ ដោយអ្នកស្រីមានមហិច្ឆតាចង់ពង្រីកអាជីវកម្មនេះឱ្យកាន់រីកដុះដាលបន្ថែមទៀត ដើម្បីផ្គត់ផ្គង់ទៅកាន់ទីផ្សារកាន់តែទូលំទូលាយ និងជួយបង្កើតការងារដល់ប្រជាពលរដ្ឋក្នុងមូលដ្ឋាន ជាពិសេសស្រ្តីមេផ្ទះ និងប្រជាពលរដ្ឋដែលមានវ័យចំណាស់មិនមានការងារធ្វើ ឱ្យពួកគាត់អាចរកប្រាក់ចំណូលបន្ថែមក្នុងគ្រួសារ៕

អត្ថបទ៖ជុន កុសល

The post សិប្បកម្មជាលខ្មែរ ក្នុងសង្កាត់ទឹកវិល ផ្ដល់ឱកាសការ​ងារដល់ពលរដ្ឋក្នុងមូលដ្ឋាន appeared first on Kampuchea Thmey Daily.

លោក សៅ មករា ជាប្រជាកសិកររស់នៅក្នុងស្រុកបាណន់ ខេត្តបាត់ដំបង បានរៀបរាប់ថា បច្ចុប្បន្នលោកមានដីចម្ការមួយកន្លែងទំហំប្រមាណមួយហិកតា នៅចំណុចភូមិរូង ឃុំកន្ទឺ ២ ស្រុកបាណន់ ដោយលោកបានដាំពោតហើយនៅខាងក្រោមលោកបានដាំឪឡឹកចំនួន ៣ ប្រភេទ ដែលនេះគឺជាការដាំតាមបែបលក្ខណៈគ្រួសារ ដើម្បីរកប្រាក់ចំណូលគ្រាន់នឹងទ្រទ្រង់​ជីវភាពប្រចាំថ្ងៃ។

លោកបានបន្តថា ចាប់តាំងពីដើមខែមេសាមក គឺជាពេលវេលាដែលត្រូវប្រមូលផលឪឡឹក ដើម្បីដឹកយកទៅលក់លើទីផ្សារ ដែលក្នុងនោះក៏មានបងប្អូនកូនក្មួយមកជួយបេះនឹងជួយលក់ផងដែរ។

សម្រាប់ពូជឪឡឹកទាំង ៣ ប្រភេទ គឺមានឈ្មោះផ្សេងៗគ្នា ដោយឪឡឹកដែលមានសាច់ពណ៌ក្រហម វាមានឈ្មោះថា (វណ្ណា៥០៣) ចំពោះឪឡឹកដែលមានសាច់ពណ៌លឿង វាមានឈ្មោះថា (យេឡូស្ទូន) រីឯឪឡឹកដែលមានសាច់ពណ៌ផ្កាឈូក វាមានឈ្មោះថា (លឿងរាជ) ហើយពួកវាមានរសជាតិខុសៗគ្នា ប៉ុន្តែសម្រាប់ឪឡឹកដែលមានសាច់ពណ៌លឿង និងព៌ណផ្កាឈូក គឺមានតម្លៃថ្លៃជាងឪឡឹកដែលមានសាច់ក្រហម។

កសិកររូបនេះបានប្រាប់ឱ្យដឹងថា ការដាំឪឡឹកទាំងនេះគឺលោកមិនបានប្រើជីគីមី ឬថ្នាំសម្លាប់សត្វល្អិតអ្វីបន្តិចនោះទេ គឺដាំក្នុងរបៀបធម្មជាតិសុទ្ធសាធ ដូច្នេះហើយទើបមានផ្លែខ្លះស្នាមស្រមោចស៊ីតាមសំបកបន្តិចបន្តួច ហើយការដឹកគោយន្តច្នៃមកដាក់លក់នៅលើទីផ្សារក្នុងក្រុងបាត់ដំបង គឺឪឡឹកក្រហម ក្នុងមួយផ្លែលក់បានតម្លៃចាប់ពី ៣០០០ រៀល ដល់ ៥០០០ រៀល ដោយឡែកចំពោះឪឡឹកដែលមានពណ៌ផ្កាឈូក និងពណ៌លឿង គឺលក់បានតម្លៃចាប់ពី ៥០០០ រៀល ដល់ ១២០០០ រៀល ក្នុងមួយផ្លែទៅតាមទំហំតូចធំ បើកាត់កងទៅលើការចំណាយ គឺលោកអាចសល់ខ្លះសម្រាប់ជួយដល់សេដ្ឋកិច្ចគ្រួសារ និងលើការចំណាយប្រចាំថ្ងៃ៕

អត្ថបទ : សោ និយមរ័ត្ន

The post កសិករអះអាងថា ផ្លែឪឡឹកលឿង មានតម្លៃទីផ្សារខ្ពស់ នៅរដូវប្រមូលផល appeared first on Kampuchea Thmey Daily.

ដើមឡើយ ក្រូចពោធិ៍សាត់ដែលដាំនៅលើទឹកដីស្រុកបាណន់ គឺមានភាពល្បីល្បាញ រន្ទឺសុះសាយ ទៅទូទាំងប្រទេស អំពីរសជាតិ ផ្អែមឆ្ងាញ់ ដោយគ្មានក្រូចពោធិ៍សាត់នៅស្រុកណា ឬខេត្តណា មកប្រៀបផ្ទឹមបានឡើយ ប៉ុន្តែរយៈពេលប៉ុន្មានឆ្នាំកន្លងមក ក្រូចពោធិ៍សាត់នៅស្រុកបាណន់ ក៏ចាប់ផ្ដើមអន់ថយ ទំនងជាដីខ្សោះជីជាតិ ឬយ៉ាងណានោះទេ ព្រោះ​​ផ្លែក្រូចចាប់ផ្ដើមក្រាសុី និងមានសភាពស្កក ធ្វើឱ្យផ្លែក្រូចពោធិ៍សាត់នៅក្នុងតំបន់នោះចាប់ផ្ដើមធ្លាក់ចុះលែងមានអ្នកពេញនិយម និងចូលចិត្តតាំងពីពេលនោះមក។

មួយរយៈចុងក្រោយនេះ ក្រូចពោធិ៍សាត់ដែលចាប់ផ្ដើមល្បី ដោយសាររសជាតិផ្អែមឆ្ងាញ់នោះ គឺក្រូចដែលបេះមកពីភូមិ​អូរខ្ជាយ និងអូរដំបង បើទោះបីជាផ្លែក្រូចនៅតំបន់នេះមានសម្បុរឲ្យខ្មៅៗតិចតួចក៏ដោយ ក៏រសជាតិផ្អែមឆ្ងាញ់ និងធ្វើឲ្យ​អ្នកផងទាំងពួងចាប់ផ្ដើមចូលចិត្ត និងនិយមទិញយកទៅពិសាផងដែរ។

លោក ឈឺន រ៉ើន រស់នៅភូមិអូរខ្ជាយខាងកើត ក្នុងឃុំអូដំបូង១ ស្រុកសង្កែ ខេត្តបាត់ដំបង បានរៀបរាប់ថា លោកមានផ្ទៃដីធំល្មមដែលបច្ចុប្បន្នគឺមានដំណាំដើមក្រូចពោធិ៍សាត់នេះ ច្រើនបង្គួរ ហើយលោកក៏បានដាំជាយូរមកហើយ ដែលបច្ចុប្បន្នកំពុងប្រមូលផលជាបណ្ដើរៗហើយ ដែលភាគច្រើនលោកមិនបានបេះយកទៅលក់នៅទីផ្សារដោយខ្លួនឯងនោះឡើយ គឺមានឈ្មួញមកម៉ៅទិញដល់ចម្ការតែម្ដង។

លោកបានបន្ថែមថា កាលពីប៉ុន្មានឆ្នាំមុនគឺផ្លែក្រូចពោធិ៍សាត់នៅក្នុងភូមិអូខ្ជាយនេះ មិនទាន់ល្បីល្បាញប៉ុន្មានទេ ដោយ​សារនៅតំបន់ផ្សេងក៏គេមានរសជាតិឆ្ងាញ់ពិសារផងដែរ ប៉ុន្តែស្រាប់តែពេលថ្មីៗនេះក៏ចាប់ផ្ដើមល្បី មកលើក្រូចភូមិអូរខ្ជាយ​នេះទៅវិញ ដោយឡែក សម្រាប់រសជាតវិញ គឺពិតជាឆ្ងាញ់ពិសាតែម្ដង។

អ្នកស្រី ផន ណារ៉ា ជាអាជីវករលក់ក្រូចពោធិ៍សាត់ នៅក្នុងផ្សារលើ បានបញ្ជាក់ថា សព្វថ្ងៃអ្នកស្រីទិញក្រូចពីម៉ូយដែល​យកមកពីភូមិអូរខ្ជាយ និងភូមិអូរដំបង ដើម្បីយកមកលក់នៅលើទីផ្សារ ព្រោះប្រភេទក្រូចខាងលើនេះសំបូរភ្ញៀវចូលចិត្តសួររក ដើម្បីទិញយកទៅពិសារ ឬផ្ញើបងប្អូននៅតាមបណ្ដាខេត្តនានា។

អ្នកស្រីបានលើកឡើងថា ក្រូចដែលអ្នកស្រីយកមកលក់ គឺបានបែងចែកជាបីប្រភេទ ដោយមានតម្លៃចាប់ពី ២៥.០០០ រៀល ដល់ ៤០.០០០ រៀល ក្នុងមួយផ្លូន ដែលការលក់ជាផ្លូននេះគឺមានប្រវត្តិតាំងពីយូរលង់ណាស់មកហើយ ដែលជាទូទៅក្នុងមួយផ្លូន មានចំនួន ៤០ ផ្លែ ហើយបើគេទិញមួយផ្លូន ត្រូវមានក្បាច់ថែមឲ្យគេចំនួនមួយដំប ស្មើនឹង ៤ ផ្លែ បន្ថែម​​ឲ្យគេទៀត ទៅពេញលក្ខណៈចំនួនមួយផ្លូន ដែលសព្វថ្ងៃសម្បូរអតិថិជនមកទិញដើម្បីយកតែពិសារ ហើយមុខរបរ​លក់​ក្រូចនេះអ្នកស្រីបានរកស៊ីយូរឆ្នាំមកហើយ៕

អត្ថបទ៖ សោ និយមរ័ត្ន

The post ល្បីក្រូចពោធិ៍សាត់នៅភូមិអូរខ្ជាយ មានរសជាតិផ្អែមឆ្ងាញ់ appeared first on Kampuchea Thmey Daily.

លោក ចាន់ សិល្បសុជាតិ អគ្គនាយក នៃក្រុមហ៊ុនផលិតទឹកត្រី និងទឹកស៊ីអ៊ីវ ង៉ូវហេង ខេត្តកំពត ប្រាប់កម្ពុជាថ្មី ថា ក្រុមហ៊ុនរបស់លោក កំពុងតែដាក់ផែនការពង្រីកការផលិតក្នុងបរិមាណច្រើនជាងមុន ដើម្បីឆ្លើយតបទៅនឹងតម្រូវការទីផ្សារ។

លោក សិល្បសុជាតិ ថ្លែងបន្តថា ស្របពេលប្រជាជនខ្មែរធ្វើពហិការមិនប្រើប្រាស់ផលិតផលរបស់ថៃ ដោយផ្ដើមចេញពីរឿងជម្លោះព្រំដែនមួយរយៈចុងក្រោយមកនេះ ក្រុមហ៊ុនរបស់លោក ក៏កំពុងតែព្យាយាមដាក់ផែនការពង្រីក និងពង្រឹងគុណភាពទៅលើផលិតផលរបស់ខ្លួនសម្រាប់ចែកចាយជូនដល់ប្រជាជនខ្មែរទាំងក្នុង និងក្រៅប្រទេស។

ជាក់ស្ដែងថ្មីៗនេះ លោក សិល្បសុជាតិ សង្កេតឃើញថា ប្រជាជនខ្មែរទាំងក្នុង និងក្រៅប្រទេសបានងាកមកគាំទ្រផលិតក្នុងស្រុកស្ទើរតែទាំងស្រុង ដែលនេះអាចចាត់ទុកថាជាស្មារតីជាតិនិយមមួយរបស់ប្រជាជនខ្មែរនាពេលបច្ចុប្បន្ននេះ។

ក្រុមហ៊ុនផលិតទឹកត្រី និងទឹកស៊ីអ៊ីវ ង៉ូវហេង ជានិច្ចជាកាលតែងតែបានជួយដល់ប្រជាជនខ្មែរឱ្យមានការងារធ្វើតាមរយៈកម្លាំងពលកម្ម ពិសេសគឺប្រជានេសាទ និងប្រជាកសិករដែលជាអ្នកដាំសណ្ដែកដី ឱ្យមានទីផ្សារក្នុងល្អ ក្នុងការងាររបស់ពួកគាត់រហូតមកផងដែរ។

សម្រាប់ពេលបច្ចុប្បន្ន ក្រុមហ៊ុនរបស់លោក ចាន់ សិល្បសុជាតិ មានផលិតផលជាច្រើនមុខដែលផលិតដោយស្នាដៃកូនខ្មែរផ្ទាល់ ក្នុងនោះមានដូចជា៖ ទឹកត្រី ទឹកស៊ីអ៊ីវ ទឹកម្ទេស ទឹកសៀង ទឹកប្រេងខ្យង អំបិល និងម្រេចកំពត ដែលភាគច្រើនសុទ្ធសឹងតែជាទំនិញសម្គាល់ភូមិសាស្រ្ដប្រចាំខេត្តកំពត-កែប។

ក្រៅពីការផលិតស​ម្រាប់ចែកចាយក្នុងស្រុក ក្រុមហ៊ុនផលិតទឹកត្រី ង៉ូវហេង ក៏បាននាំយកផលិតផលរបស់ខ្លួនទៅដាក់លក់នៅលើឆាកអន្តរជាតិ ដែលមានដូចជា៖ សហរដ្ឋអាមេរិក និងបណ្ដាប្រទេសអឺរ៉ុបមួយចំនួន ដូចជាប្រទេសអូស្ដ្រាលី ជាដើម។

យ៉ាងណាមិញ លោក សិល្បសុជាតិ ក្នុងនាមលោកជាសហគ្រិនខ្មែរម្នាក់ ក៏សូមលើកទឹកចិត្តប្រជាជនខ្មែរចាប់ពីពេលវេលានេះតទៅ សូមនឹកឃើញដល់ផលិតផលរបស់ខ្មែរជាជម្រើសទី១ បន្ទាប់ពីផលិតផលនាំចូល ដើម្បីចូលរួមចំណែកដល់ការលើកស្ទួយផលិតផលជាតិឱ្យកាន់តែរីកចម្រើនបន្តទៅមុខទៀត។

ក្រុមហ៊ុនផលិតទឹកត្រី ង៉ូវហេង ជាសហគ្រាសក្នុងស្រុកមួយដែលបង្កើតឡើងតាំងពីឆ្នាំ ១៩៩៥ មកម្ល៉េះ គិតមកទល់ពេលនេះ ក្រុមហ៊ុនរបស់កូនខ្មែរមួយនេះ មានអាយុកាលប្រមាណ៣០ឆ្នាំមកហើយ៕

អត្ថបទ ៖ សួស សិត

The post សហគ្រាសផលិតទឹកត្រីង៉ូវហេង ដាក់ផែនការពង្រីកការផលិតរបស់ខ្លួន ខណៈប្រជាជនខ្មែរពហិការឈប់ប្រើទំនិញថៃ appeared first on Kampuchea Thmey Daily.

ជាងនេះទៀត តារាមួយចំនួនធំទៀតដែលធ្លាប់ទស្សនាកម្ពុជា និងកម្ពុជាយល់ឃើញថា ជាកន្លែងស្អាត និងសុខសប្បាយ តែជាប្រទេសដែលមានប្រជាជនគាំទ្រ និងគាំទ្រក្នុងវិស័យសង្គម។

ទី១ តារាហូលីវូដ Angelina Jolie

បន្ទាប់ពីថតភាពយន្តមួយកាលពីឆ្នាំ២០១១ ក្រោមចំណងជើងថា «Lara Croft: Tomb Raider» នៅក្នុងខេត្តសៀមរាប តួកុនហូលីវូដរូបនេះស្រាប់តែជាប់ចិត្តនឹងទឹកដីកម្ពុជាភ្លាមៗ។ Angelina បាននិយាយថា «ការស្នាក់ពីរបីថ្ងៃនៅក្នុងប្រទេសកម្ពុជា បាននាំឲ្យខ្ញុំជួបប្រជាជនក្នុងស្រុកដ៏កក់ក្តៅ ហើយខ្ញុំមានអារម្មណ៍ថា ដួងចិត្តរបស់ខ្ញុំបានធូរស្បើយឡើងវិញ»។ នេះក៏ជាការរាយការណ៍ពីការរស់នៅជាមួយប្រជាជនកម្ពុជា ដែលធ្វើឲ្យនាងមានអារម្មណ៍ក្លាយជាមនុស្សកាន់តែស្រឡាញ់ជីវិតលើសមុន។

ដោយសារតែចិត្តស្រលាញដពុំរួចនៅលើដែនដីសុវណ្ណភូមិ តារាស្រីវ័យ៥០ឆ្នាំបានបន្តធ្វើទស្សនកិច្ចជាច្រើនជាមួយ UN ហើយក៏បានយកចិត្តទុកដាក់ក្នុងការថែទាំកម្ពុជាយ៉ាងជ្រាលជ្រៅ តាមរយៈការយក Maddox ទៅចិញ្ចឹម និងការថតខ្សែភាពយន្តខ្មែរក្រហម «First They Killed My Father» នៅកាលឆ្នាំ ២០១៦ជាដើម។

ទី២ តារាស្រី Susan Sarandon

តារាហូលីវូដរូបនេះបានចូលរួមសហការជាមួយ UNHCR (អង្គការសហប្រជាជាតិទទួលបន្ទុកជនភៀសខ្លួន) នៅលើទឹកដីកម្ពុជា ក្រិយបានទស្សនកិច្ចបានម្ដងគត់ លោកស្រីបានព្រលយវាចាមួយថា «ប្រទេស​កម្ពុជា​កំពុង​ស្វាគមន៍​ភ្ញៀវ​ទេសចរ ប្រជាជន​ពិតជា​ស្រស់​ស្អាត និងរួសរាយណាស់។

ទី៣ តារាបូលីវូដឥណ្ឌាលោក Gagan Malik

លោក GAGAN Malik តារាបូលីវូដឥណ្ឌាដ៏ល្បី ដែលគេស្គាល់ថាជាតួអង្គសម្ដែងជាព្រះពុទ្ធ បានបង្ហាញវត្តមានជាថ្មីលើទឹកដីនៃព្រះរាជាណាចក្រកម្ពុជា និងបានទស្សនាកន្លែងនានា ដោយទទួលបានការស្វាគមន៍យ៉ាងកក់ក្តៅពីមន្ត្រីជាន់ខ្ពស់កម្ពុជា ក៏ដូចជាទេសចរជាតិ-អន្តរជាតិ។ ក្រោយមកលោកទួលបានការតែងតាំងជាទូតសុច្ឆន្ទៈជាផ្លូវការប្រចាំក្រសួងទេសចរណ៍កម្ពុជា ក្រោមកិច្ចផ្សព្វផ្សាយសក្តានុពលទេសចរណ៍កម្ពុជា ព្រមនិងសុវត្ថិភាពទេសចរពិតនៅកម្ពុជា នាពេលកន្លងមក។

ទី៤ Jackie Chan ឬឈិនឡុង

តារាសម្តែងក្បាច់គុន ឈិន ឡុង ឬ Jackie Chan ធ្លាបមកទស្សនាប្រទេសកម្ពុជាកាលពិឆ្នាំ២០០៤ ក្នុងនាមជា ឯកអគ្គរដ្ឋទូត​សុច្ឆន្ទៈ​របស់​អង្គការសហប្រជាជាតិ គាំទ្រ​អង្គការ UNICEF និង UNAIDS ។ ការមកដល់លើកដំបូងរបស់
តារាសម្តែង​​​​​ប្រកប​ដោយ​ទេពកោសល្យ​​រូបនេះនាំឲ្យលោកពោលវាចាថា កម្ពុជាជាដែនដីអច្ឆរិយៈ មានប្រជាជនកកក្ដៅ និងរួសរាយរាក់ទាកបំផុត។

ទី៥ ស្តេចកំប្លែង Charlie Chaplin ឬតួសាក់ឡូ

ស្តេចកំប្លែង Charlie បានមកទស្សនាខេត្តសៀមរាប ក្នុងឆ្នាំ ១៩៣៦ ដើម្បីអង្គរវត្ត និងប្រាសាទបាយ័នព្រមទាំងទីកន្លែងផ្សេងៗទៀត។ ការមកដល់របស់លោក បានធ្វើឲ្យប្រជាជនកម្ពុជាស្វាគមន៍យ៉ាងកក់ក្ដៅ ខណៈដែលលោកបានលើកសរសើរកម្ពុជាថា ជាប្រទេសដ៏ស្រស់ស្អាតបំផុត។

យ៉ាងណាមិញ កន្លងមកមានតារាល្បីៗទូទាំងពិភលោកជាច្រើនធ្លាប់បានមកទស្សនាប្រទេសកម្ពុជា ហើយថែមទាំងលើសរសើរទឹកដីសុវណ្ណភូមិថាល្អឯក និថអស្ចារ្យបំផុត។ ជាពិសេសនោះគឺ មានប្រជាជនរួសរាយរាកទាក់និងចិត្តល្អ សប្បុរធម៌ មានទាំងទឹកចិត្ត មិនប្រកាន់វណ្ណ ឬរើសអើងថាជាជនជាតិណាឡើយ៕

អត្ថបទ៖ សាង ស្រីល័ក្ខ

ចុចអាន៖Influencer ល្បីៗ និយាយការពារ កម្ពុជា ថា ជាប្រទេសមានប្រជាជនល្អ និង រួសរាយរាក់ទាក់

The post មកលេងតែម្ដងសោះ តារាបរទេសប៉ុន្មានរូប លើកសរសើរថា កម្ពុជា មានប្រជាជនដ៏កក់ក្ដៅបំផុត appeared first on Kampuchea Thmey Daily.

លោក ម៉ិច ចាន់នី ពលរដ្ឋរស់នៅភូមិស្ទឹងកាច់ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានបង្ហាញពីភាពរីករាយចំពោះការចិញ្ចឹមមាន់ជាលក្ខណៈគ្រួសារ ដោយលោកបានប្រាប់ឱ្យដឹងថា មុខរបរនេះបានជួយឱ្យលោករកបានប្រាក់ចំណូលសមរម្យ សម្រាប់ផ្គត់ផ្គង់ជីវភាពគ្រួសារ ហើយមាន់មានតម្លៃល្អ និងសម្បូរទីផ្សារ នៅចំពេលដែលបិទព្រំដែន-កម្ពុជាថៃ។

លោក ម៉ិច ចាន់នី បានចាប់មុខរបរចិញ្ចឹមមាន់ តាំងពីឆ្នាំ២០១៦ ក្រោមការជួយជ្រោមជ្រែងបច្ចេកទេសពីមន្ទីរកសិកម្ម ខេត្តប៉ៃលិន មកដល់ពេលនេះ លោកមានមាន់សរុបជាង៣០០ក្បាល ក្នុងនោះមានមាន់សាច់ជាង ២០០ក្បាល ពូជមាន់ញីជាង ៨០ក្បាល និងពូជមាន់ឈ្មោលជាច្រើនទៀត។

សម្រាប់មាន់យកសាច់ ត្រូវបានរៀបចំចំណី និងលែងឱ្យដើររកចំណីបន្ថែម ក្នុងបរិវេណមួយ ដែលមានហ៊ុមព័ទ្ធដោយសំណាញ់ និងមានទ្រុងដាក់ខ័ណ្ឌចែកដាច់គ្នា រវាងពូជមាន់ ញី និងពូជមាន់ឈ្មោល។

ក្រៅអំពីចិញ្ចឹមមាន់ យកសាច់លក់ លោក ម៉ិច ចាន់នី មានបច្ចេកទេស ក្នុងការយក ស្ពែម មាន់ឈ្មោល មកចាក់បញ្ចូល ជាមួយមាន់ញី បង្កាត់ពូជមាន់ និងមានទូសម្រាប់ភ្ញាស់ពងមាន់ សម្រាប់លក់ឱ្យប្រជាកសិករផ្សេងទៀតផងដែរ។

លោក ម៉ិច ចាន់នី បានបន្តថា កូនមាន់ ដែលមានអាយុ២៨ ថ្ងៃ ឬ៣០ថ្ងៃ ក្រោយពីចាក់វាំងសាំងរួចចំនួន៣ដង គឺអាច​យក​ទៅលក់ឱ្យអតិថិជន ទាំងនៅក្នុងខេត្តប៉ៃលិន និងនៅក្នុងខេត្តបាត់ដំបង ក្នុងតម្លៃ៥០០០រៀល ក្នុង១ក្បាល។

ជាមួយគ្នានេះលោក ក៏បានជំរុញដល់ប្រជាកសិករ គួរយកចិត្តទុកដាក់ ក្នុងការចិញ្ចឹមមាន់លក្ខណៈគ្រួសារ តាមបែបធម្មជាតិ ដែលមានបច្ចេកេសច្បាស់លាស់ ក្រៅអំពីការដាំដំណាំផ្សេងៗ ហើយរូបលោកសន្យា នឹងជួយផ្តល់ប្រឹក្សាផ្នែកបច្ចេទេស និងពូជមាន់ ដល់ប្រជាកសិករយើងផងដែរ។

បើតាមប្រភពព័ត៌មានពីមន្ត្រីជំនាញ នៃមន្ទីរកសិកម្ម រុក្ខាប្រម៉ាញ់ និងនេសាទខេត្ត បានឲ្យកម្ពុជាថ្មីដឹងថា៖ ដើម្បីឱ្យការចិញ្ចឹមមាន់ ទទួលបានជោគជ័យ និងទទួលបានផលខ្ពស់ ប្រជាកសិករគួរបង្កើនការយល់ដឹង អំពីបច្ចេកទេសសំខាន់ៗមួយចំនួនដូចជា ៖ទី១.ជ្រើសរើសពូជមាន់គឺ ការជ្រើសរើសពូជមាន់ ដែលមានគុណភាពល្អ ធន់នឹងជំងឺ និងមានអត្រាលូតលាស់លឿន គឺជារឿងសំខាន់បំផុត។

ពូជមាន់ ដែលពេញនិយមចិញ្ចឹម នៅកម្ពុជាមានដូចជា មាន់ស្រែ មាន់ខ្មៅ មាន់កសិដ្ឋាន (Broiler) និងមាន់យកពង (Layer)។ ទី២.ការសាងសង់ទ្រុង គឺទ្រុងត្រូវតែមានអនាម័យល្អ មានខ្យល់ចេញចូលគ្រប់គ្រាន់ ការពារបាន ពីសត្វចង្រៃ និងមានទំហំសមស្រប តាមចំនួនមាន់។ ត្រូវមានទីតាំងសមរម្យ សម្រាប់ចំណី ទឹក និងកន្លែងសម្រាប់មាន់សម្រាកផងដែរ។

ការចិញ្ចឹមមាន់ គឺជាមុខរបរមួយ ដែលមានសក្ដានុពលខ្ពស់ នៅក្នុងប្រទេសកម្ពុជា ប្រសិនបើកសិករមានការយល់ដឹងត្រឹមត្រូវ អំពីបច្ចេកទេសចិញ្ចឹម និងមានឆន្ទៈខ្ពស់ក្នុងការអនុវត្ត។ វាអាចជួយលើកកម្ពស់ជីវភាពរស់នៅ របស់ប្រជាពលរដ្ឋ និងចូលរួមចំណែក ក្នុងការអភិវឌ្ឍសេដ្ឋកិច្ចជាតិផងដែរ៕

អត្ថបទ៖ សេង សុវណ្ណារិទ្ធ

The post មុខរបរចិញ្ចឹមមាន់នៅតែមានទីផ្សារល្អ នៅចំពេលដែលថៃបិទព្រំដែនជាមួយកម្ពុជា appeared first on Kampuchea Thmey Daily.

ស្ត្រីអាជីវករលក់ចេក វន សាយ័ន ដែលជាអ្នកប្រកបរបរលក់ផ្លែកចេកជាច្រើនប្រភេទនៅក្នុងផ្សារ​កណ្ដាលក្រុងបាត់ដំបងបានរៀបរាប់ថា អ្នកស្រី​បានប្រកបមុខរបរលក់ផ្លែចេក​ច្រើនឆ្នាំមក​ហើយ មានដូចជា ចេកណាំវ៉ា ចេកពងមាន់ ចេកស្នាប់មុខ និងចេកអំបូងជាដើម។

អាជីវកររូបនេះបានបន្តថា ជាទូទៅការប្រកបមុខរបររកស៊ីតែងមានចំណេញតិច ចំណេញច្រើន ឬអាចខាតក៏មានដែរ ប៉ុន្តែទោះបីជាយ៉ាងណា ការរកស៊ីនៅតែបន្តទៅមុខជារៀងរាល់ថ្ងៃ ដោយ​មិនសូវមានថ្ងៃឈប់សម្រាកឡើយ ព្រោះជាមុខរបរចិញ្ចឹមជីវិតរាល់ថ្ងៃ។

សព្វថ្ងៃសម្រាប់ចេកណាំវ៉ា គឺមានទីផ្សារល្អជាងគេ ដោយសារតែតម្រូវការរបស់ប្រជាពលរដ្ឋមាន​ច្រើន​យ៉ាង ដូចជាយកទៅសែនព្រេន ធ្វើនំ ឬធ្វើចេកចៀន​ ដោយហេតុដូច្នេះហើយ​ទើបចេក​ណាំវ៉ា​មិនសូវលក់សល់នោះឡើយ។

ដោយឡែកសម្រាប់តម្លៃសព្វថ្ងៃនេះ គឺលក់ទៅតាមទំហំស្និត ដោយចាប់ពី ១.៥០០ រៀល ដល់ ៣.៥០០ រៀល ហើយចេកទាំងនេះគឺគាត់ដើរទិញ​គេតាមស្រុកនានា ពិសេសនៅស្រុកបាណន់​តែម្ដង។

អ្នកស្រីបានត្អូញត្អែរថា ការលក់ដូរមិនទៀងទាត់នោះទេ ដោយតម្លៃជួនឡើង ជួនចុះភ្លាមៗ ដោយ​ពុំមានតម្លៃឋិតថេរនោះឡើយ ដូច្នេះហើយការទិញពីតាមចំការរបស់ប្រជាពលរដ្ឋយកមកលក់បន្ត ក៏មានការលំបាកខ្លះដែរក្នុងការជួលគេដឹកជញ្ជូន​ដើម្បីមកដល់ទីផ្សារ ហើយបើលក់មិនបាន​កម្រៃ​ខ្លះ​ទេក៏ជាផលវិបាកដែរ ប៉ុន្តែបើទោះបីជាចំណេញតិចក៏ដោយក៏ជាជាងដេកស្ងៀម​នៅឯផ្ទះដោយ​គ្មាន​​ចំណូលនោះឡើយ៕

អត្ថបទ៖ សោ និយមរ័ត្ន

The post អាជីវករលើកឡើងថា ចេកណាំវ៉ា មានទីផ្សារល្អ appeared first on Kampuchea Thmey Daily.

ក្នុងចំណោមដំណាំកសិកម្មទាំងអស់នោះដំណាំម្រេចក៏ជាដំណាំដែលមានសក្ដានុពលខ្លាំងណាស់ដែរនៅក្នុងខេត្តមណ្ឌលគិរី ដែលប្រជាពលរដ្ឋនិយមដាំច្រើនជាងគេគឺនៅក្នុងស្រុកពេជ្រាដា។

អ្នកស្រី ពេជ្រ សំអិត មានអាយុ៤០ឆ្នាំជាកសិករ រស់នៅក្នុងឃុំប៊ូស្រាស្រុកពេជ្រាដា ខេត្តមណ្ឌលគិរីបានប្រាប់ «កម្ពុជាថ្មី»ថា អ្នកស្រីបានប្រកបរបរកសិកម្មដាំដុះដំណាំម្រេចនេះរយៈពេល១០ឆ្នាំកន្លងមកហើយ។ ហើយសព្វថ្ងៃគាត់មានប្រ​កបរបរកសិកម្មដាំដំណាំម្រេចនៅលើផ្ទៃដីជាងកន្លះហិកតារនិងបានទទួលផលជារៀងរាល់ឆ្នាំ។

អ្នកស្រីបន្តថា ដំណាំម្រេចដែលកសិករចាប់ផ្ដើមប្រមូលផលមានចំនួន៦ខែក្នុងមួយឆ្នាំចន្លោះចាប់ពីខែ១២រហូតទៅដល់​ខែ៥ទើបស្បើយការប្រមូលផល។ ហើយថា ដោយសារអាកាសធាតុក្នុងឆ្នាំនេះ អំណោយផលការប្រមូលទិន្នផលម្រេចនៅក្នុងចម្ការរបស់គាត់នៅក្នុងឆ្នាំនេះហាក់បង្កើនទិន្នផលច្រើនជាងមុនបន្ថែមទៀត។

លើសពីនេះ អ្វីដែលជាការសប្បាយចិត្តរីករាយសម្រាប់កសិករដែលប្រកបរបរកសិកម្មដាំម្រេចនេះគឺតម្លៃទៅលើទីផ្សារ នៅក្នុងឆ្នាំនេះហាក់ឡើងថ្លៃ។

កសិកររូបនេះបានបញ្ជាក់ថា តម្លៃម្រេចនៅក្នុងដើមឆ្នាំពេលចាប់ផ្តើមប្រមូលផលបានរហូតទៅដល់២៧០០០រៀលក្នុង១គីឡូក្រាម ប៉ុន្តែចាប់ពីការប្រមូលផលមកដល់ពេលចុងឆ្នាំនេះតម្លៃនៅត្រឹមតែ២៥០០០រៀលប៉ុណ្ណោះ។

ប៉ុន្តែយ៉ាងណាមិញ ទោះបីជាមានការតម្លៃហាក់ធ្លាក់ថ្លៃបន្តិចបន្ទួច ប៉ុន្តែឈ្មួញទិញតាមតម្លៃទីផ្សារហាងឆេងប្រចាំថ្ងៃ ឡើង​ចុះជាការធម្មតា។

ក្នុងនាមអ្នកស្រីជាកសិករដាំម្រេចម្នាក់នៅក្នុងខេត្តមណ្ឌលគិរី រំពឹងថាតម្លៃម្រេចមិនមានការធ្លាក់ចុះវិញ ហើយនឹងអាច​កើន​ឡើងតម្លៃបន្ថែមទៀតនៅពេលខាងមុខនៅឆ្នាំក្រោយៗទៀត។

ជាមួយគ្នានេះ លោក សុង ឃាង ប្រធានមន្ទីរកសិកម្មរុក្ខាប្រមាញ់និងនេសាទ បានប្រាប់ «កម្ពុជាថ្មី» ឲ្យផងដែរថា ដំ​ណាំ​ម្រេច ក្នុងឆ្នាំ២០២៤ ផ្ទៃដីអនុវត្តបានសរុបចំនួន ១ ៣១២​ហិកតា កើនលើឆ្នាំមុន០៤ហិកតា។

បច្ចុប្បន្ន ក្នុងឆ្នាំ​២០២៥​នេះតម្លៃល្អជាងឆ្នាំមុន (ក្នុងចន្លោះពី ២ ៤០០០រៀល ទៅ ២ ៤៥០០រៀលក្នុង១គីឡូក្រាម កើន​លើស​ឆ្នាំមុនពី ៦ ០០០រៀល ទៅ ៦៥០០រៀលក្នុង១គីឡូក្រាម៕

អត្ថបទ៖ រៀម សុខហេង

The post កសិករដាំម្រេច នៅខេត្តមណ្ឌលគិរីរីករាយពេលទទួលបានទិន្នផល និងតម្លៃកើនឡើងខ្ពស់ appeared first on Kampuchea Thmey Daily.