ក្តៅៗ ទីបំផុត ឥណ្ឌា ចាប់ផ្តើមចែកចាយថ្នាំព្យាបាលជំងឺកូវីដ-១៩ហើយ

នៅទីបំផុត ប្រទេសឥណ្ឌា បានចាប់ផ្តើមចែកចាយថ្នាំព្យាបាលជំងឺកូវីដ-១៩ ដែលត្រូវបានអភិវឌ្ឍនៅក្នុងស្រុកហើយ។

អាជ្ញាធរបានអនុម័តថ្នាំគ្រាប់ 2-DG ហើយវាត្រូវបានប្រើជាលើកដំបូងនៅក្នុងមន្ទីរពេទ្យ ទូទាំងរដ្ឋធានីដែលី។

យោងតាមសេចក្តីថ្លែងការណ៍របស់រដ្ឋាភិបាលបានឲ្យដឹងថា វានឹងមានអត្ថប្រយោជន៍យ៉ាងធំធេងសម្រាប់ប្រជាជនដែលរងទុក្ខដោយសារជំងឺកូវីដ-១៩ នៅក្នុងប្រទេសឥណ្ឌា។

ទោះបីជាយ៉ាងណាក៏ដោយ ក្រុមអ្នករិះគន់មួយចំនួនកំពុងព្រមានថា មិនមានទិន្នន័យគ្រប់គ្រាន់ដើម្បីគាំទ្រការអនុម័តជាបន្ទាន់ លើថ្នាំសម្រាប់ជាការព្យាបាលជំងឺកូវីដ-១៩នេះទេ។

ថ្នាំ 2-deoxy-D-glucose ឬ 2-DG ត្រូវបានបង្កើតឡើងដោយអង្គការស្រាវជ្រាវនិងអភិវឌ្ឍផ្នែកការពារជាតិ (DRDO) ដោយសហការជាមួយក្រុមហ៊ុនឱសថ Dr Reddy’s។

រដ្ឋាភិបាលបាននិយាយថា “លទ្ធផលនៃការសាកល្បងបានបង្ហាញថា ម៉ូលេគុលនេះ អាចជួយឲ្យអ្នកជំងឺជាសះស្បើយពីវីរុសកូវីដ-១៩កាន់តែលឿន និងកាត់បន្ថយការពឹងផ្អែកលើអុកស៊ីសែន”។

ប៉ុន្តែអ្នកជំនាញផ្នែកសុខភាពនិយាយថា កង្វះទិន្នន័យអំពីប្រសិទ្ធភាពរបស់ថ្នាំក្នុងការសាកល្បងលើមនុស្ស បានបង្កឲ្យមានសំណួរអំពីប្រសិទ្ធភាពរបស់វា។

បច្ចុប្បន្ននេះ មិនទាន់មានថ្នាំផ្លូវការសម្រាប់ការព្យាបាលជំងឺកូវីដ-១៩ទេ ហើយថ្នាំដែលត្រូវបានប្រើដើម្បីបន្ធូរបន្ថយរោគសញ្ញា កំពុងខ្វះខាតយ៉ាងខ្លាំងនៅក្នុងប្រទេសឥណ្ឌា។

ជាមួយករណីឆ្លងជាង២៤លានករណី និងមនុស្សស្លាប់ ២៧០,០០០នាក់ ពេលនេះ ឥណ្ឌាគឺជាប្រទេសរងគ្រោះខ្លាំងជាងគេបំផុតដោយសារជំងឺកូវីដ-១៩នៅលើពិភពលោក៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ មិនធម្មតា! ថ្នាំគ្រាប់ព្យាបាលកូវីដរបស់ឥណ្ឌា​ ក៏មានប្រសិទ្ធភាពខ្លាំងប្រឆាំងវីរុសបំប្លែងខ្លួនដែរ