នាយ ចឺម ចាប់ផ្តើមមានទឹកមាត់លេបឡើងវិញ ក្រោយបើកប្រទេស

កន្លងមកតារាចម្រៀងវ័យក្មេងសំឡេងស្រឡះនាយ ចឺម ធ្លាប់ប្រាប់ឲ្យដឹងថា ដោយសារតែអាជីពសិល្ប:ត្រូវជាប់គាំងព្រោះជំងឺកូវីដ-១៩ ទើបបច្ចុប្បន្នខ្លួនងាកមកចាប់មុខរបរថ្មីលើវិស័យអនឡាញវិញម្តង។

ប៉ុន្តែយ៉ាងណាមិញ ក្រោយពេលរាជរដ្ឋាភិបាលប្រកាសសម្រេចបើកប្រទេសឡើងវិញ នាយ ចឺម បានសម្តែងការអបអរ និងបង្ហាញអារម្មណ៍រំភើបរីករាយខ្លាំង ព្រមទាំងថ្លែងអំណរអរគុណសម្តេចតេជោ ហ៊ុនសែ ន ដែលអនុញ្ញាតបើកប្រទេសឡើងវិញផងដែរ។

ថ្លែងប្រាប់ កម្ពុជាថ្មី កាលពីថ្មីៗនេះ នាយ ចឺម បានលើកឡើងទាំងសប្បាយចិត្តថា ខ្លួនពិតជារំភើបណាស់ដែលរាជរដ្ឋាភិបាលបានសម្រេចបើកប្រទេសឡើងវិញ។ មិនតែប៉ុណ្ណោះចំពោះអាជីពសិល្ប:របស់លោកក៏ចាប់ផ្តើមមានទឹកមាត់លេបឡើងវិញផងដែរ បន្ទាប់ពីផ្អាករយ:ធំមកនេះ។

តារាប្រុសរូបនេះ បញ្ជាក់ថា អំឡុងពេលប៉ុន្មានថ្ងៃ ក្រោយពេលប្រកាសបើកប្រទេសឡើងវិញឃើញថា មានអតិថិជនបានទាក់ទងមកបន្តបន្ទាប់ដើម្បីជួលតន្រ្តីសម័យរបស់ខ្លួន (អកកេះ អកកាដង់)។ ចំណែកឯកម្មវិធីតន្រ្តីមិនទាន់មាននៅឡើយទេ ប៉ុន្តែវាក៏ជាសញ្ញាល្អផងដែរ ព្រោះថាអាចនឹងមានឆាប់ៗនេះហើយ។

ជាមួយគ្នានេះ នាយ ចឺម ក៏បន្តអំពាវនាវឲ្យមហាជនត្រូវប្រុងប្រយ័ត្ន និងការពារខ្លួនពីជំងឺកូវីដ-១៩ផងដែរ ព្រោះថាយើងអាចភ្លេចកូវីដ តែកូវីដមិនអាចភ្លេចយើងទេ ដូច្នេះត្រូវចូលរួមអនុវត្តការណែនាំរបស់ក្រសួង ៣កុំ ៣ការពារ ទាំងអស់គ្នា៕

អត្ថបទ៖ ចាន់រ៉ា

ចុចអាន៖ ក្រុមគ្រួសាររៀបចំពិធីបុណ្យសែនចេតិយ ឧទ្ទិសកុសល​ដល់​រាជិនី​សំឡេង​មាស រស់ សេរី​សុទ្ធា

ចុចអាន៖ ផលិតករទម្លាយថា «Wedding 93» វីដេអូដើមសាហាវជាង Trailer ទៅទៀត