ស្វាមី វ៉ាន់ នីឡា ចេញមុខបកស្រាយក្រោយផ្ទុះការរិះគន់រឿងពាក់ស្បែកជើងតម្លៃជាង១ពាន់ដុល្លារ

បន្ទាប់ពីមានការរិះគន់ និងចែករំលែកនូវរូបភាពនៃថ្ងៃមង្គលការរបស់តារាកំប្លែង វ៉ាន់ នីឡា និងស្វាមីដោយមានការជជែកវែកញែករឿងស្វាមីនាងពាក់ស្បែកជើងតម្លៃជាង១០០០ដុល្លារនោះ ពេលនេះស្វាមីខ្លួនបានចេញមកបកស្រាយការពិតហើយ។

ជាការពិតតារាកំប្លែងវ័យក្មេងកូនស្រីបណ្តូលចិត្តលោក សុវណ្ណ រិទ្ធី ហៅលោកតា វ៉ិចទ័រ គឺកញ្ញា វ៉ាន់ នីឡា កាលពីថ្ងៃទី១៩ ខែមីនា ឆ្នាំ២០២២កន្លងទៅនេះ បានសម្រេចក្តីសុបិនតាមរយ:ការចូលរោងជ័យជាផ្លូវការជាមួយស្វាមីរូបសង្ហា។កត់សម្គាល់នៅក្នុងថ្ងៃសិរីមង្គលរបស់កូនក្រមុំដែលជាតារាកំប្លែង វ៉ាន់ នីឡា និងកូនកម្លោះរូបសង្ហាវ័យប្រហែលគ្នានេះ បើចាប់អារម្មណ៍ទៅមើលទិដ្ឋភាពមង្គលការគឺបានរៀបចំតុបតែងយ៉ាងស្រស់ស្អាត។

កម្មវិធីនេះបានរៀបចំធ្វើឡើងទៅតាមការណែនាំរបស់ក្រសួងសុខាភិបាលទាំងអស់​ ទោះជាពេលនេះរាជរដ្ឋាភិបាលបានបើកឲ្យមានពិធីរៀបអាពាហ៍ពិពាហ៍ឡើងវិញក្ដី។ ដោយឡែកក្រោយពេលកម្មវិធីមង្គលការនោះបញ្ចប់ស្រាប់តែគេបានចាប់អារម្មណ៍ទៅលើស្បែកជើងកូនកំលោះដែលជាស្វាមី វ៉ាន់ នីឡា ពាក់បង្ហាញនាថ្ងៃពិសេសរបស់ខ្លួន។

ស្បែកជើងដែលស្វាមីអ្នកនាង វ៉ាន់ នីឡា ពាក់នោះ ត្រូវបានគេស្គាល់ថា គឺជាម៉ាកល្បីតម្លៃជាង១ពាន់ដុល្លារឯណ្ណោះទើបមានការនិយាយបែបរិះគន់ថា ស្វាមី នីឡា ពាក់នេះ គឺដើម្បីអួតភ្ញៀវដែលចូលរួមចំពោះភាពហាយសូររបស់ខ្លួន។ដោយសារមានហេតុផលនេះ ទើបសាមីខ្លួនដែលជាស្វាមី វ៉ាន់ នីឡា បានចេញមកបញ្ជាក់ច្បាស់ៗថា វាមិនពិតដូចការលើកឡើងនេះទេ។

លោកបានរៀបរាប់ថា លោកគ្មានបំណងពាក់ស្បែកជើងមួយគូនោះក្នុងន័យអួតបង្ហាញពីភាពហាយសូរនៃតម្លៃរបស់វាឡើយ ព្រោះថាស្បែកនោះលោកយកមកពាក់ថតរូបមួយភ្លែតៗប៉ុណ្ណោះ។ ម្យ៉ាងទៀតលោកក៏មិនបានតាំងចិត្តពាក់វាដែរតែចៃដន្យប្អូនប្រុសរបស់លោកបានយកឲ្យពាក់ចំមួយគូនេះ ទើបលោកពាក់វាតែម្ដងទៀត៕

អត្ថបទ៖ ចាន់រ៉ា