ការផ្តល់ថ្នាំពន្យារកំណើតដល់សត្វ អាចបង្កឱ្យប៉ះពាល់ដល់ជីវិតរបស់ពួកវា

មនុស្សគ្រប់រូបនៅពេលដែលមានសត្វចិញ្ចឹមជាភេទញី មិនថា សត្វឆ្កែ សត្វឆ្មា ឬ សត្វផ្សេងទៀតឡើយ គឺពួកគេតែងតែចាក់ថ្នាំពន្យារកំណើតទៅដល់សត្វភេទញីទាំងនោះ ដើម្បីកុំឱ្យពួកវាមានកូនច្រើន ព្រោះពិបាកក្នុងការមើលថែ និងចិញ្ចឹម។ ប៉ុន្តែ ក្នុងនាមពួកគេជាម្ចាស់ពុំបានដឹងឡើយថា ការចាក់ថ្នាំ ឬ ផ្តល់ជាថ្នាំគ្រាប់សម្រាប់ពន្យារកំណើត អាចប៉ះពាល់ដល់ជីវិតសត្វទាំងអស់នោះ។

អង្គការដែលអភិរក្សសត្វមិនរកប្រាក់ចំណេញ និងជួយការពារសត្វអនាថានៅកម្ពុជាមាន ឈ្មោះថា  Animal Rescue Cambodia (ARC) បានលើកឡើងថា ការចាក់ថ្នាំពន្យារកំណើតដល់សត្វចិញ្ចឹមដូចជា ឆ្កែ ឬឆ្មាញី អាចធ្វើឱ្យសត្វទាំងនោះស្លាប់បាន។ ការពន្យារកំណើតប្រើថ្នាំទៅដល់សត្វអាចបណ្តាលឱ្យមានដុំខ្ទុះ និងអាចបណ្តាលឱ្យមានការឆ្លងរោគក្នុងស្បូនសត្វរហូតដល់ស្លាប់។ ជាពិសេស គឺនៅពេលដែលម្ចាស់សត្វធ្វើការចាក់ថ្នាំពន្យារកំណើតដល់ពួកគេ កំឡុងពេលដែលសត្វកំពុងមានផ្ទៃពោះ ក៏អាចបង្កឱ្យកូនក្នុងផ្ទៃ និងសត្វដែលជាមេឈានដល់ការបាត់បង់ជីវិតទៀតផង។

អង្គការ ARC បានប្រាប់ពីវិធីសាស្រ្តក្នុងការការពារសត្វពីការកើតកូនលើសចំនួន និងមានសុវត្ថិភាពចំពោះសត្វ គឺការគ្រៀវឆ្មា ឬឆ្កែញី ជាវិធីសាស្ត្រដ៏ល្អបំផុតដើម្បី ជួយសត្វទាំងនោះឱ្យរូចផុតពីសេចក្តីស្លាប់ដោយអចេតនា។

គួររំលឹកថា ការពន្យារកំណើតរបស់សត្វមាន៥ប្រភេទ ក្នុងនោះ មានដូចជា ការវះកាត់ ថ្នាំគ្រាប់ ការផ្សាំ ថ្នាំចាក់ និងពន្យារកំណើតដោយថ្នាំរាវ។ ជាធម្មតា ការពន្យាកំណើតដោយការចាក់ថ្នាំ គឺត្រូវតែចាក់រៀងរាល់ ៥ ខែម្តង។ ប៉ុន្តែសម្រាប់នៅកម្ពុជា ប្រជាជនពុំសូវបានដឹងពីបញ្ហានេះទេ ពោល គឺយកថ្នាំពន្យារកំណើតរបស់មនុស្សចាក់ឱ្យសត្វ ដោយមិនបានតាមដានដិតដល់ ក៏អាចប៉ះពាល់ដល់ជីវិតសត្វផងដែរ៕

ដោយ ៖ អុន ស្រីមាន