ជើង​ហោះ​ហើរ​ដំបូងគេនៅ អាមេរិក​ បើកបំរើសេវាកម្មសម្រាប់សត្វ​ឆ្កែ​​ជាពិសេស

Bark ដែលជាក្រុមហ៊ុនឈានមុខគេមានមូលដ្ឋាននៅសហរដ្ឋអាមេរិក និងផ្តល់សេវាកម្មជាចម្បងសម្រាប់សត្វឆ្កែបានប្រកាសលើគេហទំព័ររបស់ខ្លួន​ថា នឹងបើកដំណើរការ Bark Air ហើយគ្រោងនឹងបង្ហាញខ្លួននៅថ្ងៃទី ២៣ ខែឧសភា វាជាសេវាកម្មធ្វើដំណើរតាមយន្តហោះដំបូងគេ មិនធ្លាប់មានដោយអនុញ្ញាតឲ្យសត្វឆ្កែរីករាយនឹងការហោះហើរថ្នាក់ដំបូង។

លោក Matt Meeker សហស្ថាបនិក បាននិយាយថា “យើងពិតជារំភើបក្នុងការទទួលយកការយល់ដឹងដែលយើងបានរៀនអស់ជាច្រើនឆ្នាំ ដើម្បីបង្កើតបទពិសោធន៍មួយសម្រាប់សត្វចិញ្ចឹមដំបូង”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនអាកាសចរណ៍បាននិយាយថា​ អ្នកដំណើរអាចកក់ជើងហោះហើរដើម្បីធ្វើដំណើរជាមួយសត្វឆ្កែរបស់ពួកគេចាប់ពីថ្ងៃទី ១១ ខែមេសា។ បច្ចុប្បន្ននេះមានផ្លូវហោះហើរតែពីរប៉ុណ្ណោះ ដែលអាចរកបានពីអាកាសយានដ្ឋាន Westchester County នៃទីក្រុងញូវយ៉កទៅកាន់ Van Nuys នៃទីក្រុង Los Angeles និងអាកាសយានដ្ឋាន Stansted របស់ទីក្រុងឡុងដ៍។

ដោយឡែក កាសែត The Island បានរាយការណ៍ដែរថា ពីទីក្រុងញូវយ៉កទៅអាកាសយានដ្ឋាន Stansted ទីក្រុងឡុងដ៍ តម្លៃសំបុត្រយន្តហោះសម្រាប់ឆ្កែមួយក្បាល និងអ្នកដំណើរម្នាក់មានតម្លៃ ៨,០០០ ដុល្លារក្នុងមួយជើង និងទៅអាកាសយានដ្ឋាន Van Nuys នៃទីក្រុង Los Angeles តម្លៃ ៦,០០០ ដុល្លារក្នុងមួយជើង។

អ្នកដំណើររបស់ Bark Air អាចរំលងកន្លែងត្រួតពិនិត្យសុវត្ថិភាព និងការបញ្ចាំង ហើយជំនួសមកវិញនូវបទពិសោធន៍នៃដំណើរការឆែកឆេរដ៏សាមញ្ញមួយ។ នៅពេលឡើងយន្តហោះ Bark Air ត្រៀមរួចជាស្រេច ដើម្បីធានាថាសត្វឆ្កែសម្របខ្លួនទៅនឹងបរិស្ថានបានល្អ។

លើសពីនេះ ក្រុមហ៊ុនអាកាសចរណ៍បាននិយាយថា បទពិសោធន៍ក្នុងយន្តហោះសម្រាប់សត្វចិញ្ចឹមរួមមាន ការព្យាបាល ជំនួយស្ងប់ស្ងាត់ ក្រវិលបិទសំឡេងរំខាន និងភេសជ្ជៈពិសេសដើម្បីការពារភាពមិនស្រួលដែលបណ្តាលមកពីការផ្លាស់ប្តូរសម្ពាធក្នុងកាប៊ីន។

យ៉ាងណាក៏ដោយ យោងតាមបទប្បញ្ញត្តិរបស់ Bark Air អ្នកដំណើរជាម្ចាស់ត្រូវតែមានអាយុចាប់ពី ១៨ ឆ្នាំឡើងទៅ។ ទោះបីជាយន្តហោះរបស់ខ្លួនត្រូវបានរចនាឡើងដើម្បីផ្ទុកសត្វឆ្កែចំនួន ១៥ ក្បាល និងម្ចាស់របស់វាក៏ដោយ ក៏ Bark Air បាននិយាយថា ខ្លួននឹងមិនលក់សំបុត្រលើសពី ១០ ទេ ដើម្បីធានាបាននូវកន្លែងដែលមានផាសុខភាព៕

អត្ថបទ៖ សាង ស្រីល័ក្ខ

ចុចអាន៖ក្រោយតុលាការសម្រេចកាត់ទោស​ប្រហារជីវិត អតីតសេដ្ឋិនី វៀតណាម ប្តឹង​ឧទ្ធរណ៍ទៅវិញ