អាយុទើប ១១ឆ្នាំ អតីត “កូនតុក្កតាស្អាតបំផុតលើលោក” អាចរកលុយដោយខ្លួនឯងខ្ទង់លានដុល្លារ

ស្ថិតក្នុងអាយុ ១១ឆ្នាំ កុមារី Anastasia Knyazeva ដែលជាអតីត “កូនតុក្កតាស្អាតបំផុតលើលោក” មានទ្រព្យសម្បត្តិរកដោយដៃឯងប្រមាណ ១.៥លានដុល្លារអាមេរិក។

ប្រិយមិត្តមួយចំនួនប្រហែលនៅចាំ​កាលពីឆ្នាំ២០១៥ កន្លងទៅ បណ្តាញសង្គមជុំវិញពិភពលោកបាននាំគ្នាចាប់អារម្មណ៍ខ្លាំងលើសម្រស់កុមារីវ័យ ៤ឆ្នាំ Anastasia Knyazeva ដែលកាលណោះនាងបង្ហាញខ្លួនមកជាមួយនឹងស្បែកសភ្លឺថ្លា សក់ពណ៌ទង់ដែងរលោង និងកែវភ្នែកពណ៌ខៀវគួរឱ្យទាក់ទាញរបស់នាង ហើយបន្ទាប់ពីផ្ទុះល្បីនាងត្រូវបានគេឱ្យនាមជា “កូនតុក្កតាស្អាតបំផុតលើលោក”។

តាមពិតមុនពេលទទួលបានប្រជាប្រិយភាពពាសពេញពិភពលោក នៅអាយុ ៤ឆ្នាំ Anastasia Knyazeva បានចាប់ផ្តើមអាជីពជាតារាម៉ូដែល តាំងពីអាយុ ២ឆ្នាំមកម្ល៉េះ។ លុះអាយុ ៦ឆ្នាំ កុមារីសញ្ជាតិរុស្ស៊ីរូបនេះ ចាប់ផ្តើមក្លាយជាតំណាងឲ្យម៉ាកយីហោល្បីៗជាច្រើនក្នុងប្រទេស និងលេចមុខក្នុងការសម្តែងផងដែរ។ ដោយសារការងារពីវិស័យម៉ូដយ៉ាងមមាញឹក Anastasia អាចរកចំណូលបានយ៉ាងសន្ធឹកសន្ធាប់ ​ខណៈទ្រព្យសម្បត្តិរបស់នាងកើនដល់ ២៥ម៉ឺនដុល្លារ កាលពីឆ្នាំ២០១៧​ ហើយមកដល់ឆ្នាំ២០២២ នាងកាន់កាប់ទ្រព្យសម្បត្តិប៉ា​ន់ស្មានចំនួន ១.៥លានដុល្លារ ក្នុងវ័យត្រឹមតែ ១១ឆ្នាំ។

បច្ចុប្បន្នក្រៅពីបង្ហាញខ្លួនជាតារាម៉ូដែលវ័យក្មេង នៅសាលារៀន Anastasia ក៏ខិតខំរៀនសូត្របានពិន្ទុល្អផងដែរ។ មិនតែប៉ុណ្ណោះ នាងថែមទាំង​ចូល​រួម​ក្នុង​ថ្នាក់សិល្បៈ​​ជា​ច្រើន​ទៀត​ដូច​ជា រៀនព្យាណូ ​ច្រៀង និងធ្វើ​នំ៕

ប្រែសម្រួល៖ សន្យា

ចុចអាន៖ កន្លងទៅ ៤ឆ្នាំ ក្មេងស្រីរហ័ស្សនាម “គុជខ្មៅ” របស់ពិភពលោក ប្រែប្រួលសម្រស់យ៉ាងណាហើយ?