ទីបំផុត COVER បទ«សុរា» លុបចេញពី You tube

អ្នកគាំទ្រនិងប្រើប្រាស់បណ្តាញសង្គមហ្វេសប៊ុកបានផ្ទុះការចាប់អារម្មណ៍គ្រប់គ្នា បន្ទាប់មានការប្រកាសជូនដំណឹងថា COVER ចម្រៀងបទ «សុរា» ត្រូវបានលុបចេញពីបណ្តាញសង្គម Youtube ដោយគ្មានការជូនដំណឹងណាមួយ​ឬទុកឱកាសឲ្យពួកគេបានលុបដោយខ្លួនឯង។

គេនៅចាំបានថា បទចម្រៀងដែលមានចំណងជើងថា«សុរា»ជាសំនៀងដើមរបស់ ឌីជេ ក្តិប ,ឌីជេ អាពីង និង Gang ដែលត្រូវបានផលិតក្នុងផលិតកម្ម KlapYaHandz និង​បានចេញផ្សព្វផ្សាយកាលពីអំឡុងឆ្នាំ២០០៧។ ប៉ុន្តែនាពេលថ្មីៗនេះក៏ត្រូវបានអ្នកសិល្បករចម្រៀងជំនាន់ក្រោយមួយក្រុម បានជ្រើសរើសផលិតបទចម្រៀងនេះច្រៀងឡើងវិញ (COVER) ដោយមានការកែសម្រួលតន្ត្រីខ្លះៗផងដែរ។

យ៉ាងណាមិញ បន្ទាប់ពីចម្រៀងCOVERបទ«សុរា »ត្រូវបានបង្ហោះផ្សព្វផ្សាយមួយរយ:ក៏ស្រាប់តែមានដំណឹង​ថា COVER បទនេះត្រូវបានលុបចេញពី Channel Youtube ទាំងស្រុង។ ជាសម្តែងនៅលើគណនីហ្វេសប៊ុក Raksa បានបង្ហោះពីការជូនដំណឹងដល់អ្នកទាំងអស់គ្នា Video -SORA [ Remix ] លែងមានក្នុង channel Youtube ខ្ញុំទៀតហើយ។ ជាដំបូងសូមអភ័យទោសដល់ម្ចាស់កម្មសិទ្ធិដែលពួកខ្ញុំយកមក Remix ដោយមិនបានសុំការអនុញ្ញាតិ។ប៉ុន្តែក៏ពួកយើងបានរក្សា credit ឲ្យពួកគាត់ដដែល។

លោកបន្តទៀតថា អ្វីដែលយើងនឹកស្មានមិនដល់គឺ Video SORA [ Remix ] ត្រូវបាន Report យកតែម្តងដោយមិនបានប្រាប់ដំណឹងជាមុនឬទុកឱកាសឲ្យពួកយើងលុបដោយខ្លួនឯងក្នុងករណីពួកគាត់មិនពេញចិត្ត។ ពួកយើងគ្រាន់ជា Artist ក្មេងៗជំនាន់ក្រោយទើបតែឈានជើងដើរបានមួយរយៈខ្លីដែរ បើសិនយើងបានធ្វើខុសគួរណាតែប្រាប់ជាមុន យើង​ទទួលរាល់កំហុសជានិច្ច។ ប៉ុន្តែអ្វីៗបានចប់ហើយវាជាមេរៀនដ៏ធំមួយសម្រាប់ពួកយើង។

ដោយឡែកភ្លាមៗនៃការលើកឡើងខាងលើនេះ គេក៏ឃើញនៅលើទំព័រហ្វេសប៊ុករបស់ DJ Chee ដែលគេស្គាល់ថាជាតារាចម្រៀងនិងអ្នកនិពន្ធទំនុកភ្លេងទំនុកច្រៀងរបស់ផលិតកម្ម KlapYaHandz ក៏បានចេញមុខបកស្រាយនឹងបញ្ជាក់ច្បាស់ៗទៅវិញថា បទ KlapYaHandz ទាំងអស់ គឺនៅក្រោម Pe rformance Right Organizations ដែលហៅកាត់ថា PRO ហើយមិនមែន១ក្រុមហ៊ុនទេ។ ក្រុមហ៊ុនដែលចាំចាប់ copyright ឱ្យមិនក្រោម ១០ orga nizations។

ប្រភពបានលើកឡើកបន្ថែមថា យើងបានធ្វើការជាមួយ The Orchard ដែលជា Distributer ក្រោម Sony Music រាប់ឆ្នាំហើយ។ រាល់បទទាំងអស់ គឺគេអ្នកចាត់ចែងដោយយើងមិនបាច់ទៅខ្វល់អង្គុយ Report ទេ! អរគុណ!ដោយសារអ្នកខ្លះគាត់គិតថាយើង report៕

អត្ថបទ៖ ចាន់រ៉ា