ជីវិតកម្សាន្ដ

កវីជើងចាស់អ្នកស្រី ងិន ម៉ានីយ៉ា តូចចិត្ត ខណៈអ្នកចម្រៀងល្បីមួយចំនួនមិនផ្ដល់តម្លៃអ្នកនិពន្ធ

បានផុស

៣ years មុន

នៅ

ថ្ងៃពុធ ៩ សីហា ២០២៣

ដោយ

កវីជើងចាស់អ្នកស្រី ងិន ម៉ានីយ៉ា បានបញ្ចេញទស្សនៈតាមរយៈសារផ្ដាំទៅកាន់កំពូលតារាចម្រៀងល្បីៗ មួយចំនួន សូមកុំភ្លេចឈ្មោះអ្នកធ្លាប់និពន្ធទំនុកច្រៀងល្អៗ ឲ្យអ្នកបានល្បីដូចសព្វថ្ងៃនេះ ខណៈអ្នកស្រីក៏ធ្លាប់ជាអ្នកនិពន្ធឆ្នើមមួយរូបផងដែរនាពេលកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ងិន ម៉ានីយ៉ា បានលើកឡើងថា «ថ្ងៃនេះ នាងខ្ញុំ សូមផ្ញើសារដល់កំពូលៗ តារាចម្រៀង ដែលល្បីល្បាញដោយសារទំនុកច្រៀងរបស់នាងខ្ញុំគ្រប់ៗគ្នា ឲ្យបានជ្រាបថា បើអ្នកមានវាសនាបានល្បីល្បាញ មានកិត្តិយស កេរ្តិ៍ឈ្មោះ ទ្រព្យសម្បត្តិហូរហៀរហើយ បើមិននឹកគុណដល់ខ្ញុំ ក៏មិនអីដែរ។ គ្រាន់តែសូមកុំភ្លេចឈ្មោះអ្នកដែលធ្លាប់និពន្ធទំនុកច្រៀងល្អៗឲ្យអ្នកបានល្បីដូចសព្វថ្ងៃនេះ ទៅបានហើយ»។

កវីជើងចាស់រូបនេះ បញ្ជាក់ថា «មិនមែនទាមទារគុណស្រ័យអ្វីទេ គ្រាន់តែតូចចិត្តថា ហេតុអ្វីសង្គមខ្មែរយើងមិនព្រមផ្ដល់តម្លៃកិត្តិយស និងលើកតម្កើងអ្នកនិពន្ធសោះអញ្ចឹង? រៀនកតញ្ញូខ្លះទៅទើបល្អ កុំចាំដល់ពេលខ្ញុំស្លាប់រលត់វិញ្ញាណបាត់ទៅទើបចេញមកថ្លែងអំណរផ្ដល់តម្លៃ និងកិត្តិយសអ្វីនោះទេ ព្រោះខ្ញុំលែងដឹង ស្ដាប់លែងឮហើយ»។

សូមបញ្ជាក់ថា អ្នកស្រី ងិន ម៉ានីយ៉ា គឺជាកវីជើងចាស់ដែលបានសាងស្នាដៃនិពន្ធបទចម្រៀងជាច្រើនដល់តារាចម្រៀងប្រុស-ស្រីរបស់ខ្មែរទទួលបានភាពល្បីល្បាញ។ ចំពោះស្នាដៃ នៃបទចម្រៀងជាទឹកដៃនិពន្ធរបស់កវីជើងចាស់រូបនេះក៏ឃើញតារាចម្រៀងប្រុសស្រីល្បីៗចាស់វស្សានៅហង្សមាសធ្លាប់ច្រៀងដែលរួមមានដូចជា ៖ បទ«មយូរាទឹកកក» ,បទ«បន់ទេពច្យុតិ» ,បទ «១ ០០០ ឆ្នាំទៀតក៏នៅចាំអូន» ,បទ«ទីក្រុងគ្មានមេឃ» ,បទ«អូ!អូ! យេ!យេ!» ,បទ«ពាក្យពេជ្រ» ,និងបទ«ស្ម័គ្រជូតទឹកភ្នែក» ជាដើម៕

អត្ថបទ ៖ ចាន់រ៉ា