ប្រធានសមាគមសិល្បៈ ស្នើសុំការយោគយល់ ករណីនាយ​ ក្រឹម​ លេងសេីច​ភ្លេចខ្លួន​ និងជ្រុលជ្រួស

ប្រធានសមាគមមិត្តសិល្ប:ស្ម័គ្រចិត្តជួយសង្គម លោក ហេង ឡុង បានចេញមុខស្នើសុំការយោគយល់ពីសំណាក់មហាជន ពិសេសគឺបងប្អូនភេទទី៣ ( ខ្ទើយ) ជុំករណីតារាកំប្លែងល្បីឈ្មោះនាយ ក្រឹម ដែលបាននិយាយលេងសេីច​ភ្លេចខ្លួន​ និងជ្រុលជ្រួសប៉ះពាល់អារម្មណ៍ភេទទី៣។

លោក ហេង ឡុង បានលើកឡើងថា ករណីតារាកំប្លែងលោក​ អ៊ូ​ ប៊ុណ្ណារ៉ាត់​ ហៅ នាយ​ ក្រឹម​ ដែលបាននិយាយទៅកាន់ប្អូន​ ណុប​ ដាណេ​ ហាក់ជាការលេងសេីចដោយភ្លេចខ្លួន ​និងជ្រុលជ្រួសធ្វេីឱ្យមហាជនខ្មែរ​ ជាពិសេសបងប្អូនមានទំនោរស្រឡាញ់ភេទដូចគ្នាមានការថ្នាំងថ្នាក់យ៉ាងខ្លាំង។

ប្រធានសមាគមមិត្តសិល្ប:ស្ម័គ្រចិត្តជួយសង្គម រូបនេះបញ្ជាក់ថា“ខ្ញុំជឿថា​គ្មាននរណាម្នាក់ចង់ខុសនោះទេ​កាន់តែពិបាករកមនុស្សដែលញញឹមសប្បាយចិត្តនៅពេលត្រូវគេប្រមាថសូមបងប្អូនទាំងអស់​ មានការយោគយល់គាត់​ដែលជាសិល្បករជេីងចាស់មួយរូបធ្លា ប់ផ្ដល់សំណេីច​ និងស្នាមញញឹមរាប់មិនអស់ដល់ពួកយេីងរហូតមក“។

បន្ថែមពីលើនេះដែរលោក ហេង ឡុង បាននិយាយថា លោកសង្ឃឹមថា​ ករណីនេះជាផ្នែកមួយ​ជួយឱ្យកាន់តែមានការផ្ដល់តម្លៃ​ និងលុបបំបាត់ការរេីសអេីងចំពោះអ្នកស្រឡាញ់ភេទដូចគ្នានៅក្នុងសង្គមខ្មែរ ។

សូមបញ្ជាក់ដែរថា កាលពីយប់ថ្ងៃទី៣០ ខែតុលា នាយ ក្រឹម បន្ទាប់ពីមានការិះយ៉ាងច្រើនបានចេញមកបញ្ជាក់ថា លោកមិនបានរើសអើងពួកគាត់ភេទទី៣ឬខ្ទើយទេ៕

អត្ថបទ៖ ចាន់រ៉ា