ជីវិតកម្សាន្ដ

ថៃ អតិជាតិបុត្រ ចេញមុខទទួលរឿងជំពាក់លុយគេ និងសន្យាសងម្ចាស់បំណុល

បានផុស

៨ ខែ មុន

នៅ

ថ្ងៃសៅរ៍ ៣ សីហា ២០២៤

ដោយ

ទីបំផុតតារាចម្រៀងប្រុសវ័យក្មេងម្ចាស់បទ «គ្រាស្នេហ៍» លោក ថៃ អតិជាតិបុត្រ បានចេញមុខទទួលស្គាល់ការពិតរឿងជំពាក់លុយគេ និងសន្យាត្រូវតែសងម្ចាស់លុយ។ យ៉ាងណាលោកក៏បានអះអាងថា នឹងស្ដារកិត្តិយសដែលបាត់បង់មកវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេនៅចាំបានថា កាលពីរសៀលថ្ងៃទី ១៤ ខែមិថុនា ឆ្នាំ ២០២៤ កន្លងទៅ មានការបង្ហោះចែករំលែកនៅលើបណ្តាញសង្គមហ្វេសប៊ុក បង្កការភ្ញាក់ផ្អើល និងចាប់អារម្មណ៍ដល់មហាជន បន្ទាប់ពីឃើញម្ចាស់គណនីហ្វេសប៊ុកមួយ បានទម្លាយខ្លឹមសារជុំវិញរឿង លោក ថៃ អតិជាតិបុត្រ ថា តារាចម្រៀងវ័យក្មេងរូបនេះ កំពុងគេចវេះ មិនដោះស្រាយបំណុលដែលលោកជំពាក់។ ប៉ុន្តែភ្លាមៗនោះដែរ មិនត្រឹមមិនទទួលស្គាល់ការពិតនោះទេ កំលោះសង្ហា លោក ថៃ អតិជាតិបុត្រ បានចេញមុខទាមទាររកយុត្តិធម៌ និងស្ដារកិត្តិយសរបស់ខ្លួនមកវិញ ក្រោយមានអ្នកទម្លាយរឿងជំពាក់លុយមិនសង និងថែមទាំងព្យាយាមគេចវេះពីការឆ្លើយឆ្លងជាមួយម្ចាស់បំណុល។

ខណៈរឿងរ៉ាវនេះបានស្ងប់ស្ងាត់មួយរយៈខ្លី ស្រាប់តែតារាប្រុសវ័យក្មេង ថៃ អតិជាតិបុត្រ ចេញទទួលស្គាល់រឿងជំពាក់លុយគេ និងសន្យាសងទៅម្ចាស់ដើមផងដែរ។

លោកបានបង្ហោះខ្លឹមសារថា «ទទួលស្គាល់ជំពាក់លុយគេត្រូវសងគេ ខ្ញុំទទួលខុសត្រូវ ព្រួញខ្ញុំបាញ់ច្រើនដងហើយ តែតម្រង់មិនត្រូវសោះ ម្ដងហើយ ម្ដងទៀត តែពេលនេះព្រួញចុងក្រោយខ្ញុំបាញ់វាចំគោលដៅហើយ»។

តារាសម្តែង លោក ថៃ អតិជាតិបុត្រ បានបន្ថែមដែរថា លោកមិនអាចទទួលការប្រមាថបានទេ ព្រួញចុងក្រោយនេះនឹងស្ដារកិត្តិយសដែលលោកបាត់បង់មកវិញ។ ជាមួយគ្នានេះ ក៏មានការលើកទឹកចិត្តដល់តារាប្រុសរូបនេះ ដែលមានភាពក្លាហានទទួលស្គាល់ការពិត៕

អត្ថបទ ៖ ចាន់រ៉ា