ជីវិតកម្សាន្ដ

ម៉ៃ សុគន្ធ ផ្ដាំដល់យុវវ័យទាំងអស់ សូមកុំយកគំរូអាក្រក់តាមខ្លួន និងសន្យាកែប្រែកំហុសឆ្គង

បានផុស

៩ ខែ មុន

នៅ

ថ្ងៃសុក្រ ៦ កញ្ញា ២០២៤

ដោយ

ក្រោយដឹងកំហុសឆ្គងរបស់ខ្លួន តារាចម្រៀង លោក ម៉ៃ សុគន្ធ បានចេញមុខសុំទោសជាសាធារណៈចំពោះថ្នាក់ដឹកនាំ និងមហាជន ព្រមទាំងផ្ញើសារដល់យុវវ័យទាំងអស់ កុំយកគំរូអាក្រក់តាមខ្លួន និងសន្យាកែប្រែកំហុសឆ្គងចាប់ពីពេលនេះតទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ៃ សុគន្ធ បានរៀបរាប់ខ្លឹមសារកាលពីយប់ថ្ងៃទី ០៥ ខែកញ្ញា ឆ្នាំ ២០២៤ ថា «ខ្ញុំបាទ ម៉ៃ សុគន្ធ ជាដំបូងសូមលើកម្រាមដៃ ១០ ជម្រាបសួរ និង គោរពដល់ថ្នាក់ដឹកនាំគ្រប់ជាន់ថ្នាក់ សម្តេចពុក សម្តេចម៉ែ សម្តេចបវរធិបតី ហ៊ុន ម៉ាណែត និង លោកជំទាវបណ្ឌិត ពេជ្រ ចន្ទមុន្នី និងសូមគោរពដល់លោកពូអគ្គស្នងការ ស ថេត និងលោកស្នងការនគរបាលរាជធានីភ្នំពេញ និងអគ្គស្នងការរង លោកពូ ជួន ណារិន្ទ គោរពដល់លោកជំទាវ ម៉ៅ ចំណាន ដែលជាប្រធានសមាគមសិល្បៈខ្មែរ»។

តារាចម្រៀង ម៉ៃ សុគន្ធ បន្តទៀតថា «ខ្ញុំក្រាបសុំទោស និងលើកម្រាមដៃ ១០ ជូនចំពោះថ្នាក់ដឹកនាំ ដោយយប់មិញ (ថ្ងៃព្រហស្បតិ៍ ទី ០៥ ខែកញ្ញា ឆ្នាំ ២០២៤ ដោយខ្ញុំបាទបើកបររថយន្តមិនបានគោរពច្បាប់ចរាចរណ៍ ដោយខ្ញុំបាទបានចេញកម្មវិធីមានញ៉ាំជាតិស្រវឹងជាប់ក្នុងខ្លួន បើកបរបំពានច្បាប់ចរាចរណ៍ និងមិនបានគោរពតាមសញ្ញាបញ្ជារបស់នគរបាលចរាចរណ៍ដែលអនុវត្តរឹតបណ្តឹងច្បាប់លើដងផ្លូវ»។

លោកនិយាយទៀតថា ដោយពេលនោះ លោកមានការភ័យពេក លោកគ្មានចេតនាអ្វីលើសពីហ្នឹងទេ គ្រាន់តែរូបលោកខ្លាចពេលដល់ចុះទៅផាកពិន័យមានអ្នកកាសែតមកថត ខ្លាចបាត់បង់កិត្តិយស ជាចុងក្រោយ លោកសុំលើកម្រាមដៃ ១០ ក្រាបសំពះម្តងទៀត គោរពទៅដល់ថ្នាក់ដឹកនាំគ្រប់ជាន់ថ្នាក់ សូមមេត្តាលើកទោសដល់រូបលោកផង។

លោក ម៉ៃ សុគន្ធ បញ្ជាក់ទៀតថា «ខ្ញុំសូមសន្យាចាប់ពីថ្ងៃនេះទៅ នឹងកែប្រែកំហុសខុសឆ្គងមួយនេះ ហើយ ខ្ញុំបាទ ម៉ៃ សុគន្ធ សូមផ្ញើសារមួយនេះ សូមបងប្អូនយុវវ័យទាំងអស់កុំយកគំរូអាក្រក់តាមខ្ញុំ សូមពុកម៉ែបងប្អូនចូលរួមគោរពច្បាប់ចរាចរណ៍ទាំងអស់គ្នា និងត្រូវគោរពបងៗ សមត្ថកិច្ចដែលអនុវត្តច្បាប់ចរាចរណ៍តាមគ្រប់គោលដៅទាំងអស់ ហើយក៏សូមទោសដល់បងៗ សមត្ថកិច្ច នៅខណ្ឌផងដែរ»។

បន្ថែមពីនេះ លោក ម៉ៃ សុគន្ធ បានបន្ថែមថា «ជាចុងបញ្ចប់សូមជូនពរពុកម៉ែបងប្អូនខ្មែរទាំងអស់សុខភាពល្អ រកទទួលមានបានទាំងអស់គ្នា និងរួបរួមគ្នា ខ្មែរស្រឡាញ់ខ្មែរ»។

គួរបញ្ជាក់ថា តារាចម្រៀងងារកំពូលទើស លោក ម៉ៃ សុគន្ធ បានបើករថយន្តស៊េរីទំនើបម៉ាក LA ND CRUISER ព្យាយាមគេចពីគោលដៅត្រួតពិនិត្យអនុវត្តច្បាប់ចរាចរណ៍ និងពិនិត្យជាតិអាកុល (គ្រឿងស្រវឹង) រហូតជ្រុលទៅបុករះកង់បីឥណ្ឌាពីរគ្រឿង និងរេចង្កូតបុករបាំងថ្មពុះចែកផ្លូវបន្ថែមទៀត។

ករណី នៃហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោងប្រមាណ ១២ និង ២៥ នាទី រំលងអធ្រាត្រ ឈានចូលថ្ងៃទី ០៥ ខែកញ្ញា ឆ្នាំ ២០២៤ ស្ថិតតាមបណ្ដោយផ្លូវសហព័ន្ធរុស្ស៊ី សង្កាត់ទទឹកថ្លា ខណ្ឌសែនសុខ រាជធានីរាជធានី៕

អត្ថបទ ៖ ចាន់រ៉ា