ស្ងាត់ៗ! បទចង្វាក់ប្រជាប្រិយរបស់ ខាត់ សួស្តី លោតលើលេខរៀងកំពូលទាំង៥ Trending Music

«ម៉េចបងមិនចូលរាំ» ដែលជាចម្រៀងចង្វាក់ប្រជាប្រិយរបស់កញ្ញា ខាត់ សួស្តី បានលោតនៅលេខរៀងទី៥ ជា Trending Music លើប្រព័ន្ធផ្សព្វផ្សាយដ៏ល្បី You Tube ខណៈទទួលបានការទស្សនាដល់ជាង ៤.៤លានដងឯណោះ។

ជាមួយសំនៀងពីរោះរណ្តំ ផ្សំនឹងក្បាច់រាំបែបប្រពៃណី បទថ្មីដែលជាការផលិតក្រោមផលិតកម្ម Galaxy Navatra ចំណងជើង «ម៉េចបងមិនចូលរាំ» ច្រៀងដោយកូនស្រីគ្រួសារវង់ភ្លេងដ៏ល្បីត្រកូលខាត់ បានទាញយកចំណាប់អារម្មណ៍ពីសាធារណជនដែលជាអ្នកគាំទ្រខ្លាំង។ តួយ៉ាង ចម្រៀងមួយបទនេះ ជាបទចង្វាក់ប្រពៃណីដែលបានកំដរមហាជនឱ្យរាំកម្សាន្តសប្បាយ ពិសេសឱកាសបុណ្យចូលឆ្នាំប្រពៃណីជាតិ ដែលទើបកន្លងផុតទៅថ្មីៗ។

ដោយឡែកអ្វីដែលគួរឱ្យចាប់អារម្មណ៍ គឺចម្រៀងមួយបទនេះ បានបង្ហាញលើបញ្ជី Trending Music នឹងគេដែរ មិនចាញ់បទចម្រៀងរ៉េបដែលភាគច្រើន តែងប្រជែងបានតំណែង Top លើ You Tube នោះឡើយ។ ម៉្យាងវិញទៀត កន្លងមក បទចម្រៀងបែបប្រជាប្រិយរបស់តារាចម្រៀងរូបនេះ ក៏មិនសូវជាបានបង្ហាញលើ Top ប៉ុន្មាននោះដែរ។

គួរជម្រាបថា ក្រៅពីអាជីពច្រៀងនិងលេងភ្លេងបុរាណ កូនស្រីគ្រួសារវង់ភ្លេងប្រពៃណីត្រកូលខាត់រូបនេះ បច្ចុប្បន្នក៏ជាតារាចម្រៀងប្រចាំជ្រកក្រោមផលិតធំ Galaxy Navatra និងបានចេញចម្រៀងជាច្រើនបទរួចមកហើយ ខណៈភាគច្រើន ជាប្រភេទបែបប្រជាប្រិយ៕