ជីវិតកម្សាន្ដ

ខាត់ សួស្តី ក្តៅស្លឹកត្រចៀក ក្រោយរងការចោទប្រកាន់ជាន់ឈ្លីសិល្បៈវប្បធម៌ខ្មែរយ៉ាងគឃ្លើន

បានផុស

២ years មុន

នៅ

ថ្ងៃព្រហស្បតិ៍ ៤ កក្កដា ២០២៤

ដោយ

តារាចម្រៀងត្រកូល”ខាត់” គឺ កញ្ញា ខាត់ សួស្តី បានបង្ហាញការហួសចិត្តជាខ្លាំង ខណៈត្រូវបានអ្នកសិល្បៈរៀមច្បងម្នាក់ ធ្វើការរិះគន់ និងចោទប្រកាន់ថា នាងជាន់ឈ្លីសិល្បៈវប្បធម៌ខ្មែរយ៉ាងគឃ្លើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីត្បិតប្រតិកម្មដោយសម្តែងការមិនសប្បាយចិត្តពីសំណាក់តារាចម្រៀង កញ្ញា ខាត់ សួស្តី ចំពោះទង្វើរិះគន់របស់អ្នកសិល្បៈដូចគ្នាយ៉ាងណាក្តី តែនាងមិនបានបញ្ចេញអត្តសញ្ញាណថាបុគ្គលម្នាក់នោះជានរណាឡើយ ដោយ ខាត់ សួស្តី ចាត់ទុកថានេះមិនមែនជាការរិះគន់ដើម្បីស្ថាបនាទេ គឺជាការជេរប្រមាថតែម្ដង។

កញ្ញា ខាត់ សួស្តី បានបញ្ជាក់ថា “ឃើញថា លោកពូជាអ្នកសិល្បៈដូចក្មួយៗ ដែរ ហេតុអ្វីក៏ប្រកាន់ក្រុមខ្ញុំម្ល៉េះ? ស៊ែរផុសពីផេកខ្ញុំ និយាយថា ខ្ញុំបំផ្លាញវប្បធម៌ ខ្ញុំទប់ណាស់ អត់ទាន់តបលោកពូ គឺដោយសារខ្ញុំនៅគោរពលោកពូជាលោកគ្រូ ជាលោកអ៊ំ ជាលោកពូ ជាមនុស្សចាស់ដែលខ្ញុំគួរតែគោរព តែកុំឲ្យលើស អ្វីៗ តែងមានកំណត់ សូមអធ្យាស្រ័យ”។

បន្ថែមពីនេះ កញ្ញា ខាត់ សួស្តី ដែលជាប្អូនស្រីអ្នកនាង ខាត់ សុឃីម បានថ្លែងប្រាប់ទៀតថា មូលហេតុ ដោយសារគេថាពួកនាងជាន់ឈ្លីសិល្បៈវប្បធម៌ខ្មែរយ៉ាងគឃ្លើន។ នាងថា ”ពេលខ្លះ មិនចង់ផុស តែឃើញគាត់ស៊ែរវាលើសជាងយើងផុស ២០-៣០ ដង ទៅទៀត ដោយការប្រមាថមើលងាយ”។

តារាចម្រៀង ខាត់ សួស្តី បាននិយាយថា នាងមិនចង់បញ្ចេញឈ្មោះ ព្រោះថាកុំឲ្យអ្នកសិល្បៈជើងចាស់រូបនេះថានាងជាក្មេងឈ្លើយ ទំនើង តទល់ជាមួយគាត់ តែគាត់ស៊ែរមើលងាយតែម្ដង ហើយនេះមិនមែនស្ថាបនាទេ គឺជេរប្រមាថសព្វគ្រប់ ហើយគាត់ក៏ជាអ្នកសិល្បៈដូចគ្នាទៀត៕

អត្ថបទ ៖ ចាន់រ៉ា