ខ្លាច​​កើនជម្លោះ​ជាមួយ​មីយ៉ាន់ម៉ា ថៃបិទច្រកឆ្លងកាត់​ទាំង​អស់រយៈពេល៧ថ្ងៃ

អាជ្ញាធរថៃបានបិទច្រកឆ្លងកាត់ព្រំដែនក្រៅផ្លូវការទាំងអស់នៅតំបន់ម៉ែសូតសម្រាប់រយៈពេល៧ថ្ងៃ បន្ទាប់ពីការប្រយុទ្ធគ្នាយ៉ាងខ្លាំងក្លារវាងកងកម្លាំងសហភាពជាតិកា​រ៉េន (KNU) និងកងទ័ពមីយ៉ាន់ម៉ា បានផ្ទុះឡើងនៅត្រើយម្ខាងនៃព្រំដែន ដែលធ្វើ​ឲ្យ​សំឡេងកាំភ្លើងបន្លឺឆ្លងចូលក្នុង​ដីថៃ។ មានតែស្ពានមិត្តភាពថៃ-មីយ៉ាន់ម៉ាទីមួយប៉ុណ្ណោះដែលនៅតែបើកសម្រាប់តែការធ្វើដំណើរធម្មតា។

យោង​តាម​ Amarin TV ការប៉ះទង្គិចគ្នារវាងកងពលតូចទី៦ របស់ KNU និងបញ្ជាការប្រតិបត្តិការយោធាទី២២ របស់មីយ៉ាន់ម៉ា នៅក្នុងភូមិ Min Lapa ទល់មុខភូមិ Ban Mae Kon Ken ក្នុងខេត្តតាក បានកើនឡើងចាប់ពីថ្ងៃទី៣០ខែវិច្ឆិកា។ ភាគីទាំងពីរបានបាញ់តបតគ្នាដោយកាំភ្លើងត្បាល់ទំហំ៦០មិល្លិម៉ែត្រ និង១២០មិល្លិម៉ែត្រ ខណៈដែលកងកម្លាំងមីយ៉ាន់ម៉ាក៏បានប្រើប្រាស់ដ្រូនដើម្បីទម្លាក់គ្រាប់បែកលើទីតាំង KNU ផងដែរ។

មន្ត្រីថៃបាននិយាយថា ការប្រយុទ្ធគ្នានេះមិនបានបង្កការខូចខាតនៅត្រើយម្ខាងនៃប្រទេសថៃទេ បើទោះបីជាភាពតានតឹងនៅតែខ្ពស់ក៏ដោយ។ កាលពីថ្ងៃទី៣០ខែវិច្ឆិកា គ្រាប់កាំភ្លើងត្បាល់ចំនួន៥គ្រាប់ពីប្រទេសមីយ៉ាន់ម៉ា បានធ្លាក់ក្នុងទឹកដីថៃ ដែលបណ្តាល​ឲ្យ​ជនជាតិមីយ៉ាន់ម៉ា២នាក់ដែលរស់នៅជាមួយប្រជាជនថៃរងរបួស។

លោក Maitri Chupricha មេបញ្ជាការកងកម្លាំងពិសេស Naresuan និងមន្ត្រីស្រុកម៉ែសូត នៅតែ​ឈរ​ជើង​​ក្នុងតំបន់នេះ ដោយបញ្ជា​ឲ្យ​កងទ័ព​ថៃពង្រឹង​សន្តិសុខ​ព្រំដែន។ កងកម្លាំងសន្តិសុខត្រូវបានណែនាំ​ឲ្យ​ឆ្លើយតបជាបន្ទាន់ ប្រសិនបើមានគ្រាប់ផ្លោង​ណាមួយធ្លាក់ចូលក្នុងទឹកដីថៃបន្ថែមទៀត៕

ប្រែសម្រួល៖ ឈាង