Meta ឲ្យអូស្ត្រាលីពិចារណាលើបម្រាមប្រើបណ្តាញសង្គមចំពោះកុមារ​ ក្រោយលុបគណនីជាង៥៤ម៉ឺន

ក្រុមហ៊ុនបច្ចេកវិទ្យាយក្ស Meta បានអំពាវនាវ​ឲ្យ​រដ្ឋាភិបាលអូស្ត្រាលី ពិចារណាឡើងវិញនូវច្បាប់ជាប្រវត្តិសាស្ត្រ​របស់​ខ្លួន ដែលហាមឃាត់កុមារអាយុក្រោម១៦ឆ្នាំ មិន​​ឲ្យ​ប្រើប្រាស់បណ្តាញសង្គម ខណៈដែលក្រុមហ៊ុននេះបានរាយការណ៍ថា ខ្លួនបានបិទគណនីអ្នកប្រើប្រាស់អស់ជាង ៥៤៤ ០០០​គណនីរួចមកហើយ ចាប់តាំងពីច្បាប់នេះចូលជាធរមាន។

យោង​តាម AFP ចាប់តាំងពីថ្ងៃទី១០ខែធ្នូ​ឆ្នាំ២០២៥​មក ប្រទេសអូស្ត្រាលីបានតម្រូវ​ឲ្យ​បណ្តាញសង្គមធំៗ រួមមាន TikTok និង YouTube បញ្ឈប់អ្នកប្រើប្រាស់ដែលមិនទាន់គ្រប់​អាយុ​កំណត់ មិនឲ្យមានគណនីប្រើប្រាស់ បើមិនដូច្នោះទេ នឹងត្រូវប្រឈមនឹងការផាកពិន័យរហូតដល់ ៤៩.៥លានដុល្លារអូស្ត្រាលី។ ក្រុមហ៊ុន Meta បានបង្ហើបថា ត្រឹមតែក្នុងសប្តាហ៍ដំបូងនៃការអនុវត្តច្បាប់ ខ្លួនបានលុបគណនីចំនួន ៣៣១ ០០០គណនី ចេញពី Instagram ១៧៣ ០០០គណនី ចេញពី Facebook និង ៤០ ០០០គណនី ទៀតចេញពី Threads។

ទោះបីជាកំពុងអនុវត្តតាមច្បាប់ក៏ដោយ ក្រុមហ៊ុន Meta បានលើកឡើងថា បម្រាម​​នេះ ប្រហែលជាមិនអាចសម្រេចបាននូវគោលដៅសុវត្ថិភាពនោះទេ ដោយក្រុមហ៊ុនបារម្ភថា វាអាចធ្វើឲ្យយុវជននៅដាច់ឆ្ងាយពីសង្គម ឬរុញច្រានពួកគេឲ្យទៅប្រើប្រាស់កម្មវិធីដែលគ្មានការត្រួតពិនិត្យ និងមានគ្រោះថ្នាក់ជាងមុន។ ក្រុមហ៊ុនបានស្នើ​ឲ្យ​រដ្ឋាភិបាលងាកមកបង្កើតស្តង់ដាររួមមួយ ដែលផ្តោតលើឯកជនភាព និងការផ្តល់បទពិសោធន៍តាមអ៊ីនធឺណិតឲ្យសមស្របតាមវ័យ ជំនួសឲ្យការហាមឃាត់ទាំងស្រុង។ ជាមួយគ្នានេះ Meta ក៏បានស្នើជាថ្មីឲ្យបណ្តាញចែកចាយកម្មវិធី (App Stores) ជាអ្នកទទួលខុសត្រូវលើការផ្ទៀងផ្ទាត់អាយុ និងការយល់ព្រមពីមាតាបិតា ព្រមទាំងបានប្រកាសពីការចូលរួមក្នុងគំនិតផ្តួចផ្តើម «OpenAge» ដើម្បីបង្កើតឧបករណ៍ផ្ទៀងផ្ទាត់អាយុដោយឯករាជ្យផងដែរ៕

ប្រែសម្រួល៖ ឈាង