លោកណេតាន់យ៉ាហ៊ូ បដិសេធ​ការចោទដែល​ថា លោកចាក់រុក​ឲ្យ​ត្រាំ បង្ក​សង្គ្រាមជាមួយ​អ៊ីរ៉ង់

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានច្រានចោលរបាយការណ៍ដែលថា លោកគឺជាអ្នករៀបចំផែនការ​ឲ្យ​សហរដ្ឋអាមេរិកចូលរួមក្នុងសង្គ្រាមយោធានៅអ៊ីរ៉ង់ ដោយហៅការចោទប្រកាន់នេះថាជា «រឿងកំប្លែង»។

ក្នុងបទសម្ភាសន៍ជាមួយ Fox News កាលពីថ្ងៃចន្ទ​ទី​២​ខែ​មីនា​ឆ្នាំ​២០២៦ លោក​ណេតាន់យ៉ាហ៊ូ​បានអះអាងថា ប្រធានាធិបតី ដូណាល់ ត្រាំ គឺជា «មេដឹកនាំដែលរឹងមាំបំផុតក្នុងលោក» ហើយធ្វើអ្វីៗផ្អែកលើអ្វីដែលលោកគិតថាត្រឹមត្រូវសម្រាប់អនាគតអាមេរិក។ លោកបានសង្កត់ធ្ងន់ថា លោក​ត្រាំ​យល់ច្បាស់ពីការគំរាមកំហែងរបស់ទីក្រុងតេហេរ៉ង់ ហើយមិនចាំបាច់មានការអូសទាញឡើយ។

ការលើកឡើងរបស់នាយករដ្ឋមន្ត្រីរូបនេះ ធ្វើឡើងដើម្បីឆ្លើយតបទៅនឹងរបាយការណ៍របស់សារព័ត៌មាន New York Times ដែលបានចោទថា លោកណេតាន់យ៉ាហ៊ូបានដើរតួយ៉ាងសំខាន់ ក្នុងការដឹកនាំសហរដ្ឋអាមេរិក​ឲ្យ​ឈានទៅរកសង្គ្រាម តាមរយៈការបញ្ចុះបញ្ចូលផ្ទាល់ខ្លួនអស់រយៈពេលជាច្រើនខែ។ យោងតាមរបាយការណ៍ លោកណេតាន់យ៉ាហ៊ូ បានលើកឡើងពីលទ្ធភាពនៃការវាយប្រហារលើទីតាំងមីស៊ីលរបស់អ៊ីរ៉ង់ដំបូងគេនៅ Mar-a-Lago កាលពីខែធ្នូ ហើយក្រោយមកបានសម្រេចនូវកិច្ចសហការកាន់តែទូលំទូលាយជាមួយអាមេរិក ដើម្បីកម្ចាត់ថ្នាក់ដឹកនាំអ៊ីរ៉ង់។

ជម្លោះនេះបានចាប់ផ្តើមកាល​ពី​ព្រឹកថ្ងៃសៅរ៍សប្ដាហ៍​មុន ជាមួយនឹងប្រតិបត្តិការ «Lion’s Roar» របស់អ៊ីស្រាអែល ដែលត្រូវបានពិពណ៌នាថាជាការវាយប្រហារបង្ការទុកជាមុន ស្របពេលជាមួយនឹងប្រតិបត្តិការ «Epic Fury» របស់អាមេរិក។ ការវាយប្រហារទាំងនេះបានកើតឡើង ទោះបីជាមានការចរចានុយក្លេអ៊ែរនៅទីក្រុងហ្សឺណែវក្រោមការសម្របសម្រួលរបស់អូម៉ង់ក៏ដោយ។ ជាការសងសឹក ទីក្រុងតេហេរ៉ង់បានបង្ហោះដ្រូន និងបាញ់មីស៊ីលគោលដៅលើទីតាំងពាក់ព័ន្ធនឹងអាមេរិកក្នុងតំបន់ឈូងសមុទ្រ ដែលបណ្តាល​ឲ្យ​សមាជិកយោធាអាមេរិក ៦នាក់ស្លាប់ និងជាច្រើននាក់ទៀតរងរបួសធ្ងន់៕

ប្រែសម្រួល៖ ឈាង