ព័ត៌មានអន្ដរជាតិ

អធិការបតីអាល្លឺម៉ង់ថ្លែងចំៗ ថា សង្គ្រាមនៅអ៊ីរ៉ង់«ខ្វះមូលដ្ឋានច្បាប់» និង បដិសេធចូលរួម

បានផុស

៣ ខែ មុន

នៅ

ថ្ងៃអង្គារ ១៧ មីនា ២០២៦

ដោយ

អធិការបតីអាល្លឺម៉ង់ លោក Friedrich Merz បានប្រកាសជាសាធារណៈថា អាល្លឺម៉ង់នឹងមិនចូលរួមក្នុងសង្គ្រាមនៅអ៊ីរ៉ង់ដែលដឹកនាំដោយសហរដ្ឋអាមេរិក និង អ៊ីស្រាអែលនោះទេ ដោយសារតែសង្គ្រាមនេះគ្មានមូលដ្ឋានច្បាប់ដែលអនុញ្ញាតឲ្យអាល្លឺម៉ង់ចូលរួម។

អធិការបតីអាល្លឺម៉ង់ លោក Friedrich Merz។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងរបស់ប្រមុខដឹកនាំអាល្លឺម៉ង់ បានកើតមានឡើងបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានអំពាវនាវឲ្យប្រទេសក្នុងសម្ត័ន្ធមិត្តណាតូជួយ និងបង្កើតសម្ព័ន្ធមិត្តថ្មីដើម្បីធានាសុវត្ថិភាពដោយការអមដំណើរនាវាដឹកប្រេងតាមច្រកសមុទ្រ Hormuz ដែលគ្រប់គ្រងទាំងស្រុងដោយអ៊ីរ៉ង់នោះ។

នៅក្នុងសន្និសីទសារព័ត៌មាននៅអីក្រុងប៊ែរឡាំងនៅថ្ងៃចន្ទ អធិការបតីអាល្លឺម៉ង់ លោក Friedrich Merz និយាយថា៖«យើងខ្វះការអនុម័តពីអង្គការសហប្រជាជាតិ សហភាពអឺរ៉ុបឬក៏ អង្គការណាតូ ដែលទាមទារស្ថិតនៅក្រោមច្បាប់ជាមូលដ្ឋាន»។ តាមសេចក្តីរាយការណ៍របស់រ៉យទ័រនៅថ្ងៃទី១៧ខែមីនានេះ។

មិនត្រឹមតែប៉ុណ្ណោះទេ ប្រមុខដឹកនាំរដ្ឋាភិបាលអាល្លឺម៉ង់ បាននិយាយថា អំពើប្រទូសរ៉ាសដែលកំពុងកើនឡើង នឹងបង្កហានិភ័យកាន់តែធំចំពោះតំបន់ ដែលរហូតមកដល់ពេលនេះចំនួនអ្នកស្លាប់នៅប្រទេសអ៊ីរ៉ង់បានកើនឡើងរហូដល់ប្រមាណ១៥០០នាក់ ខណៈដែលអ៊ីរ៉ង់បានវាយប្រហារតបតវិញលើប្រទេសនានានៅឈូងសមុទ្រដែលមានមូលដ្ឋានទ័ពសហរដ្ឋអាមេរិក។

តាមសេចក្តីរាយការណ៍របស់ Al Jazeera ប្រទេសចំនួន១២ដែលមានប្រជាជនស្លាប់និងរបួសដោយសារតែការវាយប្រហារនៅមជ្ឈិមបូព៌ា។

លោក Merz និយាយថា៖«ព្រោះហេតុនោះ សង្គ្រាមនេះត្រូវតែបញ្ចប់ឲ្យបានឆាប់តាមដែលអាចធ្វើទៅបាន ជាមួយផែនការនិងយុទ្ធសាស្រ្តជាក់លាក់»។

ប្រមុខដឹកនាំអាល្លឺម៉ង់ក៏បានព្រលយដែរថា មុនសង្គ្រាមនេះផ្ទុះឡើង អាល្លឺម៉ង់មិនត្រូវបានពិភាក្សានោះទេ ហើយ អធិការបតីបានសម្តែងការគាំទ្រចំពោះដំណោះស្រាយការទូតមិនមែនយោធាទេចំពោះជម្លោះបែបនេះ៕

រ៉ាន់ រើយ