​ប្រជាជន​អាមេរិក​កើន​ថ្លៃ​ចំណាយ​​​លើ​ឥន្ធនៈ​ រហូត​៦០​ពាន់​លាន​ដុល្លារ ចាប់ពីត្រាំ​ធ្វើសង្គ្រាម​នៅអ៊ីរ៉ង់

សកម្មភាពយោធារបស់សហរដ្ឋអាមេរិកប្រឆាំងនឹងអ៊ីរ៉ង់ ក្រោមរដ្ឋបាល​ប្រធានាធិបតី​ ដូណាល់ ត្រាំ បានធ្វើឱ្យអ្នកប្រើប្រាស់​អាមេរិក​ខាតបង់យ៉ាងហោចណាស់ ៥៩ពាន់លានដុល្លារនៃថ្លៃ​ចំណាយ​លើ​ប្រេងឥន្ធនៈដែលកើនឡើងខ្ពស់ ដែល​លុបបំបាត់ការសងប្រាក់ពន្ធជាមធ្យមសម្រាប់គ្រួសារនៅឆ្នាំនេះ។ នេះបើយោងតាមរបាយការណ៍សេដ្ឋកិច្ចដែលទើបចេញផ្សាយថ្មី។

លោក Mark Zandi ប្រធានសេដ្ឋវិទូនៅ Moody’s Analytics បានប៉ាន់ប្រមាណថា ការកើនឡើងនៃតម្លៃថាមពលបានធ្វើឱ្យគ្រួសារអាមេរិកជាមធ្យមចំណាយប្រហែល ៤៥០ដុល្លារ។ បន្ទុកហិរញ្ញវត្ថុត្រូវបានជំរុញជាចម្បងដោយការកើនឡើងនៃតម្លៃប្រេងសាំង​​ បន្ទាប់មកដោយថ្លៃប្រេងម៉ាស៊ូត និងថ្លៃសំបុត្រយន្តហោះខ្ពស់ដែលបណ្តាលមកពីការ​កើន​ឡើងនៃការចំណាយប្រេងឥន្ធនៈយន្តហោះ។

លោក Zandi បានព្រមានថា ប្រសិនបើជម្លោះមិនបញ្ចប់ក្នុងពេលឆាប់ៗនេះទេ អ្នកប្រើប្រាស់អាមេរិកនឹងមិនមានជម្រើសអ្វីក្រៅពីដកការចំណាយចេញទេ ដោយកត់សម្គាល់ថា ភាពតានតឹងផ្នែកហិរញ្ញវត្ថុគំរាមកំហែងដល់សេដ្ឋកិច្ចក្នុងស្រុកដែលចុះខ្សោយរួចស្រាប់​ទៅហើយ​នោះ​​។

ក្រុមហ៊ុន Goldman Sachs បានបន្ទរការព្រួយបារម្ភទាំងនេះនៅក្នុងរបាយការណ៍ស្របគ្នា ដោយព្យាករណ៍ថា ឧបសគ្គដែលជំរុញដោយអតិផរណាទំនងជានឹងទប់ស្កាត់កំណើនការចំណាយរបស់អ្នកប្រើប្រាស់សម្រាប់រយៈពេលដែលនៅសល់នៃឆ្នាំនេះ។

ទោះបីជាមានការព្រួយបារម្ភពីសាធារណជនកាន់តែខ្លាំងឡើងក៏ដោយ ​ប្រធានាធិបតី​ ត្រាំ​ បានបដិសេធម្តងហើយម្តងទៀតចំពោះ​សម្ពាធ​​អំពីការកើនឡើងនៃថ្លៃថាមពល។ យោងតាមទិន្នន័យពីសមាគមរថយន្តអាមេរិក (AAA) តម្លៃជាមធ្យមសម្រាប់ប្រេងសាំងធម្មតាដែលគ្មានសារធាតុសំណបានឡើងដល់ ៤,៣៩ ដុល្លារក្នុងមួយហ្គាឡុងនៅថ្ងៃសុក្រ ដែលជាការកើនឡើងជិត ៤០% ពី ៣,១៧ ដុល្លារក្នុងមួយហ្គាឡុងក្នុងអំឡុងពេលដូចគ្នាកាលពីឆ្នាំមុន។

​បន្ទាប់ពីបើកប្រតិបត្តិការយោធាប្រឆាំងនឹងអ៊ីរ៉ង់នៅថ្ងៃទី ២៨ ខែកុម្ភៈ មិន​ដល់​មួយសប្តាហ៍​​​ក្រោយ​​​កា​រវាយ​ប្រហារ លោក ត្រាំ​ បានកាត់បន្ថយផលប៉ះពាល់សេដ្ឋកិច្ច។ លោកបានអះអាងថា តម្លៃឥន្ធនៈ​នឹងធ្លាក់ចុះយ៉ាងឆាប់រហ័សនៅពេលដែលវិបត្តិបានបញ្ចប់ ដោយបន្ថែមថា ការដំឡើងថ្លៃដែលអាចកើតមានគឺអាចទទួលយកបាន ពីព្រោះ​កា​រវាយ​ប្រហារ​​​ដែល​សំដៅ​បំផ្លាញ​​ហេដ្ឋារចនាសម្ព័ន្ធ​យោធា​ និង​សមត្ថភាព​នុយក្លេអ៊ែរ​អ៊ីរ៉ង់ មានសារៈសំខាន់ជាងការកើនឡើងតិចតួចនៃតម្លៃប្រេងសាំង៕​​

ប្រែសម្រួល រើយ