ព័ត៌មានអន្ដរជាតិ

អាមេរិកវាយប្រហារស្ទាក់កប៉ាល់នៅសមុទ្រអូម៉ង់ បើកសំដៅទៅអ៊ីរ៉ង់ ក្រោយព្រមាន២០ដង

បានផុស

១ ខែ មុន

នៅ

ថ្ងៃអាទិត្យ ៣១ ឧសភា ២០២៦

ដោយ

កងកម្លាំងយោធាជើងទឹកសហរដ្ឋអាមេរិកប្រចាំការនៅតំបន់ឈូងសមុទ្រជិតពែក្សរ៍ បាន «បិទ» កប៉ាល់ដែលបំពាក់ទង់ជាតិហ្គាំប៊ីមួយគ្រឿង ដែលព្យាយាមបើកសំដៅទៅកាន់កំពង់ផែរបស់ប្រទេសអ៊ីរ៉ង់។ នេះបើតាម បញ្ជាការកណ្តាលយោធាសហរដ្ឋអាមេរិក (CENTCOM) ដែលបានបង្ហោះនៅលើបណ្តាញសង្គម X។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ជាការកណ្តាលយោធាសហរដ្ឋអាមេរិក បានលើកឡើងថា កងកម្លាំងយោធាអាមេរិក «បានសង្កេតឃើញ នាវាមួយគ្រឿង ឈ្មោះ M/V Lian Star បានឆ្លងកាត់ដែនទឹកអន្តរជាតិឆ្ពោះទៅកាន់កំពង់ផែអ៊ីរ៉ង់មួយនៅលើឈូងសមុទ្រអូម៉ង់ ហើយបានចេញការព្រមានជាង ២០ ដង ខណៈពេលដែលជូនដំណឹងដល់នាវាថា ពួកគេកំពុងរំលោភលើការបិទផ្លូវរបស់សហរដ្ឋអាមេរិក»។

ក្នុងការវាយប្រហារនោះ យោធាអាមេរិក បានប្រើប្រាស់ប្រភេទ មីស៊ីល Hellfire សម្រាប់ការវាយប្រហារកប៉ាល់ដែលឆ្ពោះទៅកាន់ប្រទេសអ៊ីរ៉ង់ ដែលជាសញ្ញាបង្ហាញថា ស្ថានភាពនៅច្រកសមុទ្រហ័រមូស រួមទាំងជម្លោះនៅមជ្ឈិមបូព៌ាមិនទាន់ធូរស្រាល ហើយ ការចរចារកដំណោះស្រាយនៅបន្តជាប់គាំង។

«យន្តហោះអាមេរិកមួយគ្រឿងបានបិទផ្លូវនាវាដោយបាញ់មីស៊ីល Hellfire ចូលទៅក្នុងបន្ទប់ម៉ាស៊ីនរបស់នាវា បន្ទាប់ពីក្រុមនាវិករបស់កប៉ាល Lian Star មិនគោរពតាម។ កប៉ាលនេះលែងឆ្លងកាត់ទៅកាន់ប្រទេសអ៊ីរ៉ង់ទៀតហើយ»។

សេចក្តីប្រកាសរបស់ CENTCOM ដដែល បញ្ជាក់ថា កងកម្លាំងអាមេរិកបានបិទផ្លូវនាវាពាណិជ្ជកម្មចំនួនប្រាំគ្រឿង និងបានបង្វែរទិសដៅកប៉ាលចំនួន ១១៦ គ្រឿង ដើម្បីអនុវត្តការបិទផ្លូវនេះឲ្យបានពេញលេញ៕

រ៉ាន់ រើយ