លោកហ្សេលេនស្គី ជំរុញឲ្យ​អឺរ៉ុបបង្កើតប្រព័ន្ធការពារមីស៊ីលផ្ទាល់ខ្លួន ដើម្បីទប់ទល់នឹងរុស្ស៊ី

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានលើកឡើង​កាលពីថ្ងៃអាទិត្យ​ទី​១៩ខែមេសា​ឆ្នាំ​២០២៦​ថា ទ្វីបអឺរ៉ុបចាំបាច់ត្រូវតែមានប្រព័ន្ធការពារខ្លួនពីអាវុធបាលិស្ទិក ជារបស់ខ្លួនឯង ហើយបច្ចុប្បន្នអ៊ុយក្រែនកំពុងតែចរចាជាមួយប្រទេសជាច្រើនដើម្បីសម្រេចកិច្ចការនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាម​ការ​ផ្សាយ​របស់ The Star ការការពារប្រឆាំងនឹងមីស៊ីលបាលិស្ទិក គឺជាបញ្ហាប្រឈមដ៏ធំបំផុតមួយសម្រាប់អ៊ុយក្រែនក្នុងសង្គ្រាមជាមួយរុស្ស៊ី ព្រោះថាមានតែគ្រាប់មីស៊ីលមួយចំនួនតូចនៃប្រព័ន្ធ Patriot របស់អាមេរិកប៉ុណ្ណោះ ដែលមានសមត្ថភាពអាចបាញ់ស្ទាក់មីស៊ីលប្រភេទនេះបាន។

កន្លងមក រុស្ស៊ីបានប្រើប្រាស់មីស៊ីលបាលិស្ទិកយ៉ាងច្រើន​សន្ធឹកសន្ធាប់​ដើម្បីវាយប្រហារលើហេដ្ឋារចនាសម្ព័ន្ធថាមពលរបស់អ៊ុយក្រែន ដែលបណ្តាល​ឲ្យ​រោងចក្រផលិតអគ្គិសនី និងប្រព័ន្ធបញ្ជូនចរន្តអគ្គិសនីជាច្រើនត្រូវបានបំផ្លិចបំផ្លាញ។ លោកហ្សេលេនស្គី បានបញ្ជាក់ក្នុងបទសម្ភាសន៍ទូរទស្សន៍ថា លោកមានគំនិតចង់ឲ្យ​អឺរ៉ុបមានប្រព័ន្ធការពារមីស៊ីលរួមគ្នា ហើយលោកកំពុងជំរុញឲ្យ​ការសាងសង់ប្រព័ន្ធការពារនេះលេចចេញជារូបរាងឡើងក្នុងរយៈពេលតែមួយឆ្នាំប៉ុណ្ណោះ ទោះបីជាលោកដឹងថាវាជាកិច្ចការដ៏លំបាកបំផុត ប៉ុន្តែលោកជឿជាក់ថាវាអាចទៅរួច។

ទន្ទឹមនឹងការខិតខំប្រឹងប្រែងផ្នែកការទូតនេះ ក្រុមហ៊ុន Fire Point ដែលជាអ្នកផលិតមីស៊ីល Flamingo របស់អ៊ុយក្រែន ក៏បានបង្ហើបឲ្យ​ដឹងដែរថា ពួកគេកំពុងពិភាក្សាជាមួយក្រុមហ៊ុនអឺរ៉ុបជាច្រើន ដើម្បីបង្កើតប្រព័ន្ធការពារអាកាសថ្មីមួយនៅឆ្នាំក្រោយ។ ប្រព័ន្ធថ្មីនេះនឹងមានតម្លៃទាបជាងមុន ដើម្បីមកជំនួសប្រព័ន្ធ Patriot ដែលបច្ចុប្បន្នកំពុងមានការខ្វះខាតយ៉ាងខ្លាំង ដោយសារអាមេរិកត្រូវយកទៅប្រើប្រាស់ច្រើននៅតំបន់ឈូងសមុទ្រដើម្បីទប់ទល់នឹងការវាយប្រហារពីអ៊ីរ៉ង់។ សព្វថ្ងៃ ប្រព័ន្ធ SAMP/T របស់អ៊ីតាលី និងបារាំង ដែលជាប្រព័ន្ធការពារបាលិស្ទិកតែមួយគត់របស់អឺរ៉ុបនៅពេលនេះ ក៏មានការផលិតក្នុងចំនួនតិចតួចនៅឡើយ ដែលមិនទាន់អាចឆ្លើយតបនឹងតម្រូវការសង្គ្រាមបានពេញលេញនោះទេ៕

ប្រែសម្រួល៖ ឈាង