ត្រឹម​១សប្ដាហ៍ កុមារជិត ​៦០នាក់នៅលីបង់ ស្លាប់ និង​របួស ទោះមានបទ​ឈប់បាញ់ជាមួយ​អ៊ីស្រាអែល

កិច្ចព្រមព្រៀងឈប់បាញ់ជាមួយ​អ៊ីស្រាអែល ដែលបានចូលជាធរមានតាំងពីពាក់កណ្តាលខែមេសា ឆ្នាំ២០២៦ មិន​អាច​ជួយ​ឱ្យ​ស្ថានការណ៍នៅប្រទេសលីបង់ គេចផុត​ពី​គ្រោះថ្នាក់ទេ​ ជាពិសេសសម្រាប់កុមារ។

យោងតាមរបាយការណ៍ថ្មីបំផុតពីមូលនិធិសង្គ្រោះកុមារនៃអង្គការសហប្រជាជាតិ (UNICEF) ដែល​ត្រូវ​បាន​ចុះផ្សាយ​ដោយ​សារព័ត៌មាន The Star នា​ថ្ងៃទី​១៤ ខែ​ឧសភា នៅក្នុងរយៈពេលត្រឹមតែមួយសប្តាហ៍ចុងក្រោយនេះ កុមារយ៉ាងហោចណាស់ ៥៩នាក់ ត្រូវគេ​រាយការណ៍ថា បាន​ស្លាប់ ឬរងរបួស។

តួលេខដ៏គួរឱ្យរន្ធត់នេះ បានបន្ថែមទៅលើចំនួនអ្នករងគ្រោះសរុប ចាប់តាំងពីការផ្ទុះឡើងនៃជម្លោះកាលពីថ្ងៃទី២ ខែមីនា ដោយមានកុមាររហូតដល់ ២០០នាក់បានស្លាប់ និង ៨០៦នាក់ទៀតបានរងរបួស។ កាលពីថ្ងៃពុធ​ ការកើនឡើងនៃការវាយប្រហារតាមផ្លូវអាកាសរបស់អ៊ីស្រាអែលនៅភាគខាងត្បូង និងកណ្តាលប្រទេសលីបង់ បានបណ្តាលឱ្យមនុស្សយ៉ាងហោចណាស់ ៣៣នាក់បានស្លាប់ ដែលក្នុងនោះមានស្ត្រី និងកុមារផងដែរ។

លោក Edouard Beigbeder នាយកប្រចាំតំបន់មជ្ឈិមបូព៌ា និងអាហ្វ្រិកខាងជើងរបស់ UNICEF បានសម្តែងក្តីព្រួយបារម្ភយ៉ាងខ្លាំង ដោយលើកឡើងថា «កុមារកំពុងត្រូវគេសម្លាប់ និងបង្កឱ្យរងរបួស ក្នុងពេលដែលពួកគេ គួរតែបានត្រឡប់ទៅសាលារៀន លេងជាមួយមិត្តភក្តិ និងជាសះស្បើយពីការភ័យខ្លាច អស់រយៈពេលជាច្រើនខែកន្លងមកនេះ»។

ក្រៅពីការរងរបួស និងការបាត់បង់ជីវិត UNICEF ក៏បានព្រមានអំពីផលប៉ះពាល់ផ្លូវចិត្តដ៏ធ្ងន់ធ្ងរ ដែលនឹងបន្តលង​បន្លាច​​កុមារទាំងនេះពេញមួយជីវិត។ បច្ចុប្បន្ន កុមារប្រមាណ ៧៧០ ០០០នាក់នៅទូទាំងប្រទេសលីបង់ កំពុងរស់នៅក្នុងស្ថានភាពតានតឹងផ្លូវចិត្តយ៉ាងខ្លាំង ដោយសារតែការប្រឈមមុខនឹងអំពើហិង្សា ការផ្លាស់ប្តូរទីលំនៅ និងការបាត់បង់មនុស្សជាទីស្រឡាញ់។ រោគសញ្ញាដែលកុមារទាំងនេះកំពុងជួបប្រទះ រួមមាន ការភ័យខ្លាចខ្លាំង ការថប់បារម្ភ ការយល់សប្តិឃើញរឿងរ៉ាវអាក្រក់ ការដេកមិនលក់ និងភាពអស់សង្ឃឹម។

ទោះបីជាកិច្ចព្រមព្រៀងឈប់បាញ់នេះត្រូវបានគេមើលឃើញថាជាក្តីសង្ឃឹមមួយក៏ដោយ ក៏ការវាយប្រហារជាបន្តបន្ទាប់នៅតែធ្វើឱ្យកិច្ចព្រមព្រៀងនេះស្ថិតក្នុងសភាព «ផុយស្រួយ»។ អង្គការជំនួយអន្តរជាតិនានា បានរាយការណ៍ថា ការបំផ្លិចបំផ្លាញលើហេដ្ឋារចនាសម្ព័ន្ធស៊ីវិលនៅតំបន់មួយចំនួន បានធ្វើឱ្យលំនៅដ្ឋានមិនអាចរស់នៅបាន ហើយការវិលត្រឡប់របស់ប្រជាពលរដ្ឋទៅកាន់ភូមិកំណើតវិញ កាន់តែមានភាពស្មុគស្មាញ និងគ្រោះថ្នាក់៕

ប្រែសម្រួល៖ ឈាង