ព័ត៌មានអន្ដរជាតិ

ប្រធានាធិបតីប៉ូឡូញ៖ វត្តមានកងទ័ពអាមេរិកនៅប៉ូឡូញ «កាន់តែច្រើន កាន់តែល្អ»

បានផុស

៣០ វិនាទី មុន

នៅ

ថ្ងៃចន្ទ ១៥ មិថុនា ២០២៦

ដោយ

ពេលខ្លះសហរដ្ឋអាមេរិកចង់ដកទ័ព សព្វាវុធ ចេញពីអឺរ៉ុប ព្រោះចង់ឱ្យសមាជិកណាតូ ចេះរៀនរស់ដោយខ្លួនឯង ដោយមិនបាច់ពឹងលើអាមេរិកក្នុងវិស័យការពារជាតិ ប៉ុន្តែការដកសម្ភារៈទាំងនោះចេញភ្លាមៗ គឺជាការគំរាមហែងដល់អឺរ៉ុបទៅវិញទេ។

ប្រធានាធិបតីប៉ូឡូញ លោក Karol Nawrocki លើកឡើងកាលពីថ្ងៃអាទិត្យ អំឡុងពេលទស្សនកិច្ចនៅសហរដ្ឋអាមេរិក ថា គោលបំណងជាយុទ្ធសាស្ត្ររបស់ប្រទេសប៉ូឡូញគឺមានវត្តមានយោធាអាមេរិកជាអចិន្ត្រៃយ៍ នៅលើទឹកដីខ្លួន។

យោងតាមទីភ្នាក់ងារសារព័ត៌មានតួកគី Anadolu ផ្សាយថ្ងៃទី១៥ ខែមិថុនា ឆ្នាំ២០២៦ ថ្លែងអំឡុងដំណើរទស្សនកិច្ចនៅទីក្រុងវ៉ាស៊ីនតោន លោក Nawrocki និយាយថា៖ « ទាហានអាមេរិកនៅប៉ូឡូញកាន់តែច្រើន កាន់តែល្អ។ វត្តមានយោធាអាមេរិកជាអចិន្ត្រៃយ៍ នៅតែជាគោលដៅសំខាន់របស់ប៉ូឡូញ។ ទំនាក់ទំនងជិតស្និទ្ធរវាងប្រធានាធិបតីប៉ូឡូញ និងសហរដ្ឋអាមេរិកគឺស្ថិតក្នុងផលប្រយោជន៍ជាតិរបស់ប្រទេសប៉ូឡូញ»។

ប្រធានាធិបតីប៉ូឡូញ លោក Karol Nawrocki និង លោក ដូណាល់ ត្រាំ។ រូបភាព៖ BI

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរទស្សនកិច្ចនេះកើតឡើង ចំពេលមានការជជែកវែកញែកឡើងវិញអំពីអនាគតនៃវត្តមានយោធាអាមេរិកនៅអឺរ៉ុប។

កាលពីដើមឆ្នាំនេះ រដ្ឋបាល លោក ដូណាល់ ត្រាំ បានពិនិត្យនូវការដាក់ពង្រាយកម្លាំងអាមេរិកនៅទ្វីបអឺរ៉ុបឡើងវិញ ដែលបង្កើនការព្រួយបារម្ភដល់ទីក្រុងវ៉ាសូវី ថា ចំនួនកងទ័ពអាមេរិកអាចត្រូវកាត់បន្ថយ។

យ៉ាងណា ក្តីបារម្ភទាំងនោះបានធូរស្រាលក្នុងខែឧសភាវិញ ពេល លោក ត្រាំ ប្រកាសថា សហរដ្ឋអាមេរិកនឹងដាក់ពង្រាយកងទ័ពបន្ថែមចំនួន ៥ ០០០នាក់ ទៅកាន់ប៉ូឡូញ ដោយលើកឡើងពីការចំណាយលើវិស័យការពារជាតិរបស់ប៉ូឡូញ និងទំនាក់ទំនងរបស់លោក ជាមួយលោក Nawrocki ។

គួរបញ្ជាក់ថា រដ្ឋាភិបាលប៉ូឡូញបានស្វែងរកវត្តមានយោធាអាមេរិកជាបន្តបន្ទាប់ ដើម្បីទទួលបានច្រើននិងអចិន្ត្រៃយ៍ជាងមុន ជាពិសេសចាប់តាំងពីការឈ្លានពានទ្រង់ទ្រាយធំរបស់រុស្ស៊ីលើអ៊ុយក្រែនក្នុងឆ្នាំ២០២២ ។

ទីក្រុងវ៉ាសូវីអះអាងថា ប្រទេសប៉ូឡូញ ក្នុងនាមជារដ្ឋជួរមុខរបស់ណាតូ នៅផ្នែកខាងកើតនៃសម្ព័ន្ធមិត្ត នឹងផ្តល់ទីតាំងសមហេតុផលបំផុតសម្រាប់ការដាក់ពង្រាយរបស់អាមេរិករយៈពេលវែង។

បច្ចុប្បន្នប្រទេសនេះបានចំណាយជិត ៥% នៃផលិតផលក្នុងស្រុកសរុបលើវិស័យការពារជាតិ ខ្ពស់បំផុតក្នុងចំណោមសមាជិកណាតូទាំងអស់ ហើយវិនិយោគយ៉ាងច្រើនលើហេដ្ឋារចនាសម្ព័ន្ធយោធា ដើម្បីគាំទ្រកងកម្លាំងអាមេរិក៕

សម្រួល៖ ណឺ មិនា