អាមេរិកជឿថា ចិនគឺជា «គន្លឹះ» ដ៏សំខាន់ក្នុងការបញ្ចប់សង្គ្រាមនៅអ៊ុយក្រែន

សមាជិកព្រឹទ្ធសភាអាមេរិក លោក Lindsey Graham បានលើកឡើង​ថា ប្រទេសចិនអាចដើរតួនាទីយ៉ាងសំខាន់ ក្នុងការដាក់សម្ពាធលើប្រទេសរុស្ស៊ី ដើម្បីឱ្យឈានទៅរកការចរចាសន្តិភាព និងបញ្ចប់សង្គ្រាមនៅអ៊ុយក្រែន។

យោងតាម​ទីភ្នាក់ងារ​ព័ត៌មាន Reuters ចុះផ្សាយ​នៅ​ថ្ងៃ​សៅរ៍ ទី​១១ ខែ​កក្កដា ឆ្នាំ​២០២៦ នេះ ក្នុងអំឡុងពេលបំពេញទស្សនកិច្ចនៅទីក្រុងកៀវ លោក Graham បានជួបពិភាក្សាជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី អំពីតម្រូវការការពារដែនអាកាស និងការដាក់ទណ្ឌកម្មថ្មីៗលើប្រទេសរុស្ស៊ី។

លោក Graham បានបញ្ជាក់ប្រាប់អ្នកសារព័ត៌មាននៅទីក្រុងកៀវ​ កាល​ពី​ថ្ងៃ​សុក្រ ​ថា ផ្លូវឆ្ពោះទៅរកសន្តិភាពមិនមែនស្ថិតនៅលើក្រុងវ៉ាស៊ីនតោន កៀវ ឬមូស្គូនោះទេ ប៉ុន្តែគឺស្ថិតនៅលើទីក្រុងប៉េកាំង។ លោកយល់ថា ប្រទេសចិនមានឥទ្ធិពលយ៉ាងខ្លាំងលើរុស្ស៊ី ហើយ​បើចិនប្រើប្រាស់ឥទ្ធិពលនេះក្នុងផ្លូវដ៏ល្អ នោះសង្គ្រាមនឹងអាចបញ្ចប់បានយ៉ាងឆាប់រហ័ស។ លោកជឿជាក់ថា ទោះបីជាលោក ពូទីន មិនទាន់ត្រៀមខ្លួន សម្រាប់សន្តិភាពនៅពេលនេះក៏ដោយ ក៏​តែវាមិនមែនជារឿងពិបាកនោះទេ ក្នុងការជំរុញឱ្យលោកផ្លាស់ប្តូរចិត្ត បើមានកិច្ចខិតខំប្រឹងប្រែងការទូតដ៏ត្រឹមត្រូវ។

ទន្ទឹមនោះ រដ្ឋបាលរបស់លោកប្រធានាធិបតី ដូណាល់ ត្រាំ កំពុងព្យាយាមយ៉ាងខ្លាំង ក្នុងការស្វែងរកដំណោះស្រាយតាមផ្លូវការទូត ដើម្បីបញ្ចប់សង្គ្រាមដែលកំពុងអូសបន្លាយនេះ ទោះបីជាមិនទាន់ឃើញលទ្ធផលជាក់ស្តែងណាមួយក៏ដោយ។ នៅលើសមរភូមិជួរមុខដែលលាតសន្ធឹងជាង ១ ២០០គីឡូម៉ែត្រ ការប្រយុទ្ធគ្នានៅតែបន្តយ៉ាងខ្លាំងក្លា ខណៈដែលអ៊ុយក្រែន ក៏បានបង្កើនការវាយប្រហារដោយ​ដ្រូនចូលទៅក្នុងទឹកដីរុស្ស៊ី ដើម្បីបំផ្លាញប្រព័ន្ធសេដ្ឋកិច្ច និងរោងចក្រផលិតអាវុធរបស់រុស្ស៊ីផងដែរ។

លោក ហ្សេលេនស្គី ដែលទើបតែបានជួបពិភាក្សាជាមួយលោក ត្រាំ កាលពីដើមសប្តាហ៍នេះ ក៏បានលើកឡើងថា លោកបានពិភាក្សាអំពីតួនាទីរបស់ចិន ក្នុងការបញ្ចប់សង្គ្រាមជាមួយមេដឹកនាំអាមេរិក និងអឺរ៉ុបមួយចំនួនរួចហើយ។ លើសពីនេះ លោក Graham បានបង្ហើបឱ្យដឹងថា ក្រុមការងាររបស់លោក ត្រាំ កំពុងតែឯកភាពគ្នាលើសេចក្តីព្រាងច្បាប់ដាក់ទណ្ឌកម្មលើរុស្ស៊ី ដែលនឹងជួយកាត់ផ្តាច់ប្រភពហិរញ្ញវត្ថុ សម្រាប់ប្រតិបត្តិការយោធារបស់រុស្ស៊ី។ លោកបានសម្តែងក្តីសង្ឃឹមយ៉ាងមុតមាំថា ប្រសិនបើ​គ្រប់ភាគីរួមគ្នាពង្រឹងសមត្ថភាពការពាររបស់អ៊ុយក្រែន និងជំរុញឱ្យមានកិច្ចសហការអន្តរជាតិប្រឆាំងនឹងការគាំទ្រដល់រុស្ស៊ី នោះឱកាសមាសសម្រាប់ការបញ្ចប់សង្គ្រាមក្នុងរយៈពេលប៉ុន្មានខែខាងមុខនេះ នឹងអាចសម្រេចទៅបាន៕

ប្រែសម្រួល៖ ឈាង