មីស៊ីល Flamingo ជំនាន់ថ្មីរបស់អ៊ុយក្រែន ហោះបាន ៥ ០០០​គីឡូម៉ែត្រ ជាមួយក្បាលគ្រាប់ទម្ងន់មួយតោន

ខណៈពេលដែលសង្គ្រាមកំពុងអូសបន្លាយ ឧស្សាហកម្មយោធាក្នុងស្រុករបស់អ៊ុយក្រែន បានសម្រេចនូវសមិទ្ធផលដ៏គួរឱ្យភ្ញាក់ផ្អើលមួយ ដែលបានផ្លាស់ប្តូររូបភាពនៃសមរភូមិទាំងស្រុង។

តាម​ការ​ផ្សាយ​របស់​សារព័ត៌មាន​យោធា​ NSJ ចុះផ្សាយ​ថ្ងៃទី​១១ ខែ​កក្កដា ឆ្នាំ​២០២៦ អ៊ុយក្រែន បាន​បង្កើតមីស៊ីលគ្រូសស៊េរីថ្មី ដែលមានឈ្មោះថា «FP-5 Flamingo» ដែល​វា​មិនត្រឹមតែបង្ហាញពីការវិវត្តនៃបច្ចេកវិទ្យា ដែលអ៊ុយក្រែនសម្រេចបានដោយខ្លួនឯងប៉ុណ្ណោះទេ ប៉ុន្តែនេះ​ក៏ជាសញ្ញាព្រមានដ៏ខ្លាំងក្លាមួយទៅកាន់ទីក្រុងមូស្គូផងដែរ។

យោងតាមការបញ្ជាក់ពីក្រុមហ៊ុនផលិតយោធាអ៊ុយក្រែន Fire Point មីស៊ីល Flamingo ថ្មី ត្រូវបានរចនាឡើង ដើម្បីក្លាយជាអាវុធវាយប្រហាររយៈចម្ងាយឆ្ងាយដ៏មានប្រសិទ្ធភាពបំផុតមួយ។ វាអាចហោះហើរបានចម្ងាយរហូតដល់ ៣ ១០០ម៉ាយ (ប្រមាណ ៥ ០០០គីឡូម៉ែត្រ) ដែលល្មមគ្រប់គ្រាន់ ក្នុងការវាយប្រហារដល់ទីក្រុងសំខាន់ៗ និងមូលដ្ឋានយោធា ដែលស្ថិតនៅជ្រៅបំផុតក្នុងទឹកដីរុស្ស៊ី។ អ្វីដែលធ្វើឱ្យមីស៊ីលនេះ កាន់តែមានឥទ្ធិពលនោះ គឺសមត្ថភាពផ្ទុកក្បាលគ្រាប់ដែលមានទម្ងន់លើសពីមួយតោន ដែលអាចបង្កការខូចខាតយ៉ាងធ្ងន់ធ្ងរដល់គោលដៅយុទ្ធសាស្ត្រ រួមមាន រោងចក្រចម្រាញ់ប្រេង មូលដ្ឋានទ័ពអាកាស និងឃ្លាំងអាវុធធំៗ។

ការអភិវឌ្ឍអាវុធដ៏មានអានុភាពនេះ គឺជាផ្នែកមួយនៃយុទ្ធសាស្ត្ររបស់អ៊ុយក្រែន ក្នុងការកាត់បន្ថយការពឹងផ្អែកលើជំនួយបរទេស និងការធានាបាននូវអធិបតេយ្យភាពជាតិ។ ដោយប្រើប្រាស់ការរចនាបែបកូនកាត់ និងបច្ចេកទេសកែលម្អម៉ាស៊ីនពីសម័យសូវៀត ដើម្បីសម្រួលដល់ការផលិតក្នុងទ្រង់ទ្រាយធំ អ៊ុយក្រែនបានបង្ហាញឱ្យពិភពលោកឃើញថា ខ្លួនមានសមត្ថភាពបង្កើតបច្ចេកវិទ្យាយោធា ដែលមានគុណភាពខ្ពស់ ប៉ុន្តែមានតម្លៃសមរម្យ។ សម្រាប់ប្រជាជនអ៊ុយក្រែន និងកងទ័ពរបស់ពួកគេ Flamingo មិនមែនគ្រាន់តែជាមីស៊ីលមួយប៉ុណ្ណោះទេ ប៉ុន្តែវាជាឧបករណ៍នៃការតស៊ូដែលបង្ហាញថា អ៊ុយក្រែននឹងមិនងាយបោះបង់ចោលឡើយ ទោះបីជាស្ថានការណ៍នយោបាយពិភពលោកមានការប្រែប្រួលយ៉ាងណាក៏ដោយ៕

ប្រែសម្រួល៖ ឈាង