អឺរ៉ុប ត្រូវរលកកម្ដៅខ្លាំងបំផុត គ្របដណ្តប់, សម្លាប់មនុស្ស រាប់ពាន់នាក់ រួចទៅហើយ

រលកកម្ដៅដ៏ខ្លាំងក្លាមិនធ្លាប់មាន បាននិងកំពុង គ្របដណ្តប់ និងវាយប្រហារយ៉ាងធ្ងន់ធ្ងរ នៅទូទាំងតំបន់អឺរ៉ុប គិតចាប់តាំងពីចុងខែមិថុនា រហូតមកដល់ដើមខែកក្កដា ឆ្នាំ២០២៦ នេះ។

រលកកម្ដៅនេះ គឺបណ្តាលមកពីការរួមផ្សំគ្នារវាង បម្រែបម្រួលអាកាសធាតុសកល និងការកកើតឡើងវិញនៃបាតុភូត Super El Niño។

នៅអឺរ៉ុប សីតុណ្ហភាព ក្នុងប្រទេសជាច្រើន បានបំបែកកំណត់ត្រាអាកាសធាតុក្តៅបំផុតប្រចាំប្រវត្តិសាស្ត្រ រួចទៅហើយ ក្នុងខែមិថុនា និងកក្កដា។

នៅ សាធារណរដ្ឋឆែក សីតុណ្ហភាព ជាមធ្យម បានហក់ឡើងដល់ ៤១.១ អង្សាសេ, ប៉ូឡូញ ៤០.៥ អង្សាសេ, បារាំង ៣០អង្សាសេ (តំបន់ខ្លះឡើងដល់ ៤៣.៨ អង្សាសេ និងចក្រភពអង់គ្លេស ឡើងដល់ ៣៧.៧ អង្សាសេ ខណៈអាល្លឺម៉ង់ ឈានដល់ ៤១.៧ អង្សាសេ ហើយនៅទីនោះធ្ងន់ធ្ងរខ្លាំង ដល់ថ្នាក់ធ្វើឲ្យរលាយផ្លូវរថភ្លើងអគ្គិសនី និងប្រេះហើបផ្លូវល្បឿនលឿន ទៀតផង។

ទន្ទឹមនោះ អង្គការសុខភាពពិភពលោក (WHO) បានប្រកាសថា មនុស្សស្លាប់ដោយសារកម្ដៅខ្លាំងនៅអឺរ៉ុប បានកើនលើស ១ ៣០០នាក់ហើយ គិតត្រឹមចុងខែមិថុនា ខណៈគ្រាន់តែនៅបារាំងម្នាក់ឯង មានករណីស្លាប់ ជាង ១ ០០០នាក់ទៅហើយ ត្រឹមរយៈពេល ៣ថ្ងៃ។

មិនត្រឹមប៉ុណ្ណឹង រលកកម្តៅខ្លាំងជ្រុល ក៏ជះឥទ្ធិពលអាក្រក់ដល់ហេដ្ឋារចនាសម្ព័ន្ធនានាផងដែរ ពោលគឺ សាលារៀន និងសារមន្ទីរមួយចំនួន ត្រូវបង្ខំចិត្តបិទទ្វារមុនម៉ោង ហើយប្រភពទឹកតាមទន្លេសំខាន់ៗ មានការស្រកចុះ ដែលប៉ះពាល់ដល់ការផលិតថាមពលអគ្គិសនី និងវិស័យកសិកម្ម។

លើសពីនេះ នៅបារាំង និងបណ្តាប្រទេសអឺរ៉ុបខាងកើតមួយចំនួន កំពុងប្រឈមនឹងការប្រកាសអាសន្នព័ណ៌ក្រហម នៃហានិភ័យភ្លើងឆេះព្រៃដោយសារខ្យល់ស្ងួត និងកម្ដៅហួតហែង៕

អត្ថបទ៖ សុវណ្ណ